XNUMTAAK LI CHʼAʼAJKILAL

4 | Maatzʼeq laawoybʼenihom

KʼAʼUT WANK XWANKIL?

Wank saʼ li ruuchichʼochʼ li numtajenaq chi chʼaʼajkilal naxtawasi li qakʼaʼuxl ut li qajunxaqalil. Ebʼ li kristiʼaan li nekeʼrahobʼtesiik xbʼaan jun li nimla chʼaʼajkilal nekeʼxkʼoxla naq maakʼaʼ chik roybʼenihomebʼ. Kʼaru nekeʼxbʼaanu?

Wiibʼ oxibʼ maakʼaʼ chik nekeʼraj re li tkʼulmanq saʼebʼ li kutan chalk re.
Junchʼol chik nekeʼok chi kalaak ut nekeʼok roksinkil li bʼan li nakanobʼresink u.
Wankebʼ chik nekeʼxkʼoxla naq maakʼaʼ rusilal li xyuʼamebʼ ut nekeʼraj xkamsinkilebʼ ribʼ.

Ma nakaanaw?

Maare chiru wiibʼ malaj oxibʼ kutan twanq li chʼaʼajkilal ut naq taawil ak xtuqlaak chik ru.
Wi inkʼaʼ natuqlaak ru, chʼolchʼooq chaawu naq wank wiibʼ oxibʼ li naʼlebʼ li tatruuq xbʼaanunkil re xqʼaxbʼal ru.
Li Santil Hu naxye naq chixjunil ebʼ li chʼaʼajkilal t-osoʼq chi junelik.

Kʼaru tatruuq xbʼaanunkil?

Li Santil Hu naxye: «Mixik bʼiʼ eechʼool chi kʼoxlak chirix li kutan wulaj, xbʼaan naq li kutan wulaj taawanq ajwiʼ xkʼoxlankil rix. Tzʼaqalaq li chʼaʼajkilal re li junjunq chi kutan» (Mateo 6:34).

Kʼoxla rix jun ajwiʼ chi kutan. Mixik aachʼool chi xkʼoxlankil rix li chʼaʼajkilal li twanq wulaj.

Wi naʼok aakʼaʼuxl chirix junaq li chʼaʼajkilal li maare tkʼulmanq, yal tnimanq aakʼaʼuxl ut tixmaqʼ laawoybʼenihom.

CHANRU XQʼAXBʼAL RU? Wiibʼ oxibʼ li naʼlebʼ

TAW RUSILAL LAAWANJIK

Li Santil Hu naxye: «Li ra saʼ xchʼool chixjunil li kutan inkʼaʼ us choʼq re; aʼut choʼq re li sa saʼ xchʼool, chanchan junelik ninqʼe» (Proverbios 15:15). Wi kaʼajwiʼ nakaakʼe aachʼool chirix laachʼaʼajkilal inkʼaʼ taakʼe reetal naq wank chanru xtuqubʼankil ru. Abʼan wi nakaataw rusilal laawanjik, aʼin tatxtenqʼa chi xqʼaxbʼal ru.

Maasubʼ aahoonal chi rabʼinkil chixjunil li nekeʼxye saʼ li tele ut saʼ li raay.
Saʼ xraqik li kutan kʼoxla wiibʼ oxibʼ li naʼlebʼ li xaakʼul li tatruuq xbʼanyoxinkil.
Tus ru li kʼanjel li taabʼaanu chiru jun kutan. Bʼaanu chi kachʼinqil li kʼanjel li naxkʼam naabʼal hoonal, aʼin tixbʼaanu naq moko tchʼaʼajkoʼq ta chaawu xbʼaanunkil.

PATZʼ AATENQʼ

Li Santil Hu naxye: «Li naxsikʼ li us choʼq re xjunes […] xikʼ naril li chaabʼil naʼlebʼ nakʼeemank re» (Proverbios 18:1). Maaʼani naru naʼelk saʼ junaq li jul xchʼina junes. Tento naq tkelooq xbʼaan jalan chik.

Patzʼ rehebʼ laakomon malaj laawamiiw naq tateʼxtenqʼa.
Misach saʼ laachʼool naq laaʼat ajwiʼ naru naqatenqʼahebʼ laakomon malaj laawamiiw. Xbʼaanunkil aʼin tatxtenqʼa re naq moko kaʼaj tawiʼ laachʼaʼajkilal taakʼoxla rix.
Wi maakʼaʼ chik aawoybʼenihom ut nakaakʼoxla naq maakʼaʼ chik aj e naq yoʼyoqat, aajel ru naq taasikʼ aatenqʼ rikʼin junaq laj bʼanonel. Wank sut, aʼin naxkʼutbʼesi naq wank jun laayajel, joʼ li rahil chʼoolej. Naabʼalebʼ li kristiʼaan xeʼkʼiraak xbʼaan naq xeʼwulak rikʼin laj bʼanonel.a

a Li hu Ajsi aawu! moko naxye ta chanru tatbʼaneʼq.

Li Santil Hu naxkʼe qoybʼenihom

Jun rehebʼ li kitzʼiibʼank re li Salmo kixye: «Lochlookil xam laawaatin choʼq we laaʼin: aʼan nakutanobʼresink re linbʼe» (Salmo 119:105). Kʼaru naraj xyeebʼal aʼin?

Joʼ jun li xaml nokooxtenqʼa re rilbʼal li qabʼe naq wanko saʼ qʼoqyink. Joʼkan ajwiʼ, li Santil Hu naxkʼe qanaʼlebʼ re xnawbʼal kʼaru xbʼaanunkil naq wank junaq li chʼaʼajkilal.

Joʼ jun li xaml naxkutanobʼresi li wank saʼ li qasutam. Joʼkan ajwiʼ, li Santil Hu naxkʼut chiqu li osobʼtesihom li tqakʼul saʼebʼ li kutan chalk re.

Qʼaxal oxloqʼ li Santil Hu xbʼaan naq moko kaʼaj tawiʼ naʼaatinak chirix li xtiklajik ebʼ li kristiʼaan. Naxkʼe ajwiʼ li tzʼaqal oybʼenihom choʼq re li kutan chalk re. Naxsume ebʼ li patzʼom aʼin:

Chanru?

Chanru kitiklaak li rahilal? Li Santil Hu naxye: «Xbʼaan jun chi winq kiʼok chaq li maak saʼ ruuchichʼochʼ, ut xbʼaan li maak kichalk li kamk. Joʼkan naq li kamk kichalk saʼ xbʼeenebʼ chixjunil li poyanam xbʼaan naq chixjunilebʼ keʼmaakobʼk» (Romanos 5:12).

Kʼaʼut?

Kʼaʼut naq ebʼ li kristiʼaan inkʼaʼ nekeʼruuk xtuqubʼankil ru ebʼ li xchʼaʼajkilal? Li Santil Hu naxye: «Li winq moko [...] saʼ ruqʼ [ta] wank li xbʼeenik» (Jeremías 10:23). Li yook chi kʼulmank saʼ ruuchichʼochʼ naxkʼutbʼesi naq yaal aʼin.

Kʼaru?

Kʼaru tixbʼaanu li Yos re xtuqubʼankil ru li chʼaʼajkilal? Li Santil Hu naxye: «Tixchaqihobʼresi chixjunil li xyaʼalebʼ ru, ut inkʼaʼ chik taawanq kamk, chi moko yaabʼak, chi moko japok e malaj rahilal» (Apocalipsis 21:4).