TZOLOM 30
Ebʼ laakamenaq naru nekeʼwakliik wiʼ chik chi yoʼyo
Kʼajoʼ narahoʼk saʼ qachʼool naq nakamk junaq li qakomon malaj li qamiiw. Joʼkan naq li Santil Hu naxye naq li kamk xikʼ naʼilok qe (1 Corintios 15:26, AC). Saʼ li tzolom 27 xaatzol naq li Jehobʼa tixsach li kamk. Abʼan kʼaru tkʼulmanq rikʼinebʼ li ak xeʼkamk? Saʼ li tzolom aʼin taatzol jun chik li xyeechiʼom li Jehobʼa: naq tixwaklesi wiʼ chik chi yoʼyo ebʼ li kamenaq re naq teʼwanq chi junelik. Teʼwakliiq wiʼ chik chi yoʼyo! Abʼan ma relik chi yaal naq tkʼulmanq aʼin? Ma saʼ choxa malaj saʼ Ruuchichʼochʼ teʼwakliiq wiʼ chik?
1. Kʼaru naraj li Jehobʼa choʼq rehebʼ li qakomon malaj li qamiiw li ak kamenaqebʼ chik?
Li Jehobʼa naxrahi ru xwaklesinkilebʼ wiʼ chik chi yoʼyo li kamenaq. Laj Job jun li winq li kaw chaq xpaabʼal, chʼolchʼo chiru naq wi tkamq tjultikaaq xbʼaan li Jehobʼa. Joʼkan naq kixye re li Yos: «Tinaabʼoq ut tatinsume» (yaabʼasi Job 14:13-15).
2. Kʼaʼut naq chʼolchʼo chiqu naq teʼwakliiq wiʼ chik chi yoʼyo ebʼ li kamenaq?
Naq li Jesús kiwank saʼ Ruuchichʼochʼ li Yos kixkʼe xwankil re naq tixwaklesi wiʼ chik chi yoʼyo ebʼ li kamenaq. Joʼkan naq li Jesús kixwaklesi wiʼ chik chi yoʼyo jun li chʼina ixqaʼal li wank 12 chihabʼ re ut li xyum jun li malkaʼan (Marcos 5:41, 42; Lucas 7:12-15). Moqon, kikamk laj Lázaro, li ramiiw, usta ak kaahibʼ kutan wank saʼ li muqlebʼaal kixwaklesi wiʼ chik chi yoʼyo. Naq ak kitijok chiru li Yos, li Jesús kixye: «Lázaro, elen chaq [...]. Ut li kamenaq kiʼelk chaq» chi yoʼyo (Juan 11:43, 44). Kʼajoʼ tana keʼsahoʼk saʼ xchʼool ebʼ li xjunkabʼal ut li ramiiw laj Lázaro!
3. Ma teʼwakliiq wiʼ chik chi yoʼyo ebʼ li qakomon ut ebʼ li qamiiw li ak xeʼkamk?
Li Santil Hu naxye «naq teʼwakliiq wiʼ chik chi yoʼyo» (Hechos 24:15). Li xeʼwaklesiik wiʼ chik chi yoʼyo moko xkohebʼ ta saʼ choxa (Juan 3:13). Chixjunilebʼ sahebʼ saʼ xchʼool naq keʼwakliik wiʼ chik chi yoʼyo saʼ Ruuchichʼochʼ. Joʼ kikʼulmank chaq, li Jesús tixwaklesihebʼ wiʼ chik chi yoʼyo li kamenaq re naq teʼwanq saʼ Ruuchichʼochʼ chi junelik. Kixye naq li Yos tixwaklesihebʼ wiʼ chik chi yoʼyo chixjunilebʼ li naxjultika usta moko patzʼajelebʼ ta chik (Juan 5:28, 29).
QASIKʼAQ XCHAMAL LI NAʼLEBʼ
Tzol kʼaʼut li naxye li Santil Hu tooxtenqʼa chi xpaabʼankil naq li Jesús tixwaklesi wiʼ chik chi yoʼyo ebʼ li kamenaq ut naq chʼolchʼo naq tixbʼaanu. Ut qilaq chanru tixkʼojobʼ laachʼool ut tixkʼe aawoybʼenihom li wakliik wiʼ chik chi yoʼyo.
4. Li Jesús kixkʼutbʼesi naq wank xwankil re xwaklesinkilebʼ wiʼ chik chi yoʼyo ebʼ li kamenaq
Tzol xkomon li naʼlebʼ chirix li kixbʼaanu li Jesús rikʼin laj Lázaro. Cheeyaabʼasi Juan 11:14 ut 38-44 ut chexʼaatinaq chirix ebʼ li patzʼom aʼin:
Chanru naqanaw naq kikamk Lázaro? (Teeril li raqal 39).
Wi laj Lázaro xkoho raj saʼ choxa, ma xkʼameʼk raj chaq wiʼ chik arin saʼ Ruuchichʼochʼ xbʼaan li Jesús?
5. Naabʼalebʼ teʼwakliiq wiʼ chik chi yoʼyo
Cheeyaabʼasi Proverbios 2:21 ut chexʼaatinaq chirix li patzʼom aʼin:
Bʼar teʼwanq chixjunilebʼ li kristiʼaan li teʼwakliiq wiʼ chik chi yoʼyo?
Li Jesús tixwaklesihebʼ chi yoʼyo chixjunilebʼ li qas qiitzʼin moko kaʼaj tawiʼ li keʼxloqʼoni ru li Jehobʼa. Cheeyaabʼasi Hechos 24:15 ut chexʼaatinaq chirix li patzʼom aʼin:
Ani taawaj rilbʼal naq teʼwakliiq wiʼ chik chi yoʼyo ebʼ li kamenaq?
Kʼoxla aʼin, moko chʼaʼaj ta chiru li Jesús xwaklesinkil wiʼ chik chi yoʼyo junaq li kamenaq, joʼ naq jun li yuwaʼbʼej moko chʼaʼaj ta chiru rajsinkil li ralal.
6. Xnawbʼal naq teʼwakliiq wiʼ chik chi yoʼyo ebʼ li kamenaq tixkʼojobʼ laachʼool ut tixkʼe aawoybʼenihom
Li naxye li Santil Hu chirix li kikʼulmank rikʼin li rabʼin malaj li rixqaʼal laj Jairo naxkʼojobʼ xchʼool naabʼalebʼ li kristiʼaan. Cheeyaabʼasi li xkʼulmank saʼ Lucas 8:40-42, 49-56.
Naq li Jesús toj maajiʼ naxwaklesi chi yoʼyo li rabʼin laj Jairo kixye re: «Matxiwak, kaʼajwiʼ naq wanq aapaabʼaal» (teeril li raqal 50). Chanru tatxtenqʼa aʼin...
... naq nakamk junaq laakomon malaj laawamiiw?
... naq wank saʼ xiwxiwal laayuʼam?
Cheerilaq li BʼIDEO ut chexʼaatinaq chirix li patzʼom aʼin:
Chanru kixkʼojobʼ xchʼool li xnaʼ xyuwaʼ li xPhelicity li oybʼenihom chirix li wakliik wiʼ chik chi yoʼyo?
WIIBʼ OXIBʼ NEKEʼXYE: «Inkʼaʼ ninpaabʼ naq arin teʼwakliiq wiʼ chik chi yoʼyo ebʼ li kamenaq».
Kʼaru nakaakʼoxla?
Kʼaru li raqal taawoksi re xkʼutbʼal naq teʼwakliiq wiʼ chik chi yoʼyo ebʼ li kamenaq arin saʼ Ruuchichʼochʼ?
LI AK XQATZOL
Li Santil Hu naxye naq chi miyon ebʼ li kristiʼaan teʼwakliiq wiʼ chik chi yoʼyo. Li Jehobʼa naraj xkʼebʼalebʼ wiʼ chik xyuʼam joʼkan naq kixkʼe xwankil li Jesús re naq tixwaklesihebʼ wiʼ chik chi yoʼyo.
Qajultikaq
Kʼaʼut naq chʼolchʼo chiqu naq li Jehobʼa ut li Jesús nekeʼraj xwaklesinkilebʼ wiʼ chik chi yoʼyo li kamenaq?
Bʼar teʼwakliiq wiʼ chik chi yoʼyo ebʼ li kamenaq, ma saʼ choxa malaj saʼ Ruuchichʼochʼ? Kʼaʼut nakaakʼoxla aʼan?
Kʼaʼut nakaapaabʼ naq naru teʼwakliiq wiʼ chik chi yoʼyo ebʼ laakomon malaj laawamiiw?
SIKʼ XKOMON LI NAʼLEBʼ
Tzol kʼaru taabʼaanu re xqʼaxbʼal ru li xrahil laachʼool.
«Li tenqʼ choʼq rehebʼ li rahebʼ xchʼool» (Ajsi aawu!, ajl 3 2018)
Ma naru aatenqʼankil li Santil Hu naq nakamk junaq laakomon?
Kʼaru natenqʼank rehebʼ li kokʼal naq nakamk junaq li xkomon malaj ramiiw.
Ma wank ani twakliiq chi yoʼyo saʼ choxa? Anihebʼ inkʼaʼ chik teʼwakliiq chi yoʼyo?
«Kʼaru naraj xyeebʼal wakliik wiʼ chik chi yoʼyo?» (Li naʼlebʼ re jw.org)