TZOLOM 16
Kʼaru kixbʼaanu li Jesús naq kiwank saʼ Ruuchichʼochʼ?
Naabʼalebʼ li kristiʼaan nekeʼxkʼoxla naq li Jesús yal jun kʼuulaʼal, jun propeet malaj jun li winq li yook chi kamk. Abʼan naabʼal tqatzol wi tqatzʼil rix li xyuʼam li Jesús naq kiwank saʼ Ruuchichʼochʼ. Saʼ li tzolom aʼin tqatzʼil rix wiibʼ oxibʼ li xninqal ru naʼlebʼ li kixbʼaanu li Jesús ut kʼaru rusilal naxkʼam chaq aʼin choʼq aawe.
1. Kʼaru xnimal ru kʼanjel kixbʼaanu li Jesús?
Li xnimal ru kʼanjel li kixbʼaanu li Jesús aʼan xpuktesinkil li chaabʼil esil chirix «li xnimajwal awabʼejihom li Yos» (yaabʼasi Lucas 4:43). Kixye resil naq li Yos tixxaqabʼ jun li awabʼejilal li tixtuqubʼ ru ebʼ li chʼaʼajkilal.a Li Jesús kixbʼaanu chixjunil li wank saʼ ruqʼ re xyeebʼal li esil aʼin rehebʼ li kristiʼaan chiru oxibʼ chihabʼ rikʼin waqibʼ po (Mateo 9:35).
2. Kʼaru aj e naq kixbʼaanu ebʼ li sachbʼachʼoolej li Jesús?
Li Santil Hu naʼaatinak chirix naabʼal ebʼ li «sachbʼachʼoolej, xninqal ru bʼaanuhom ut eetalil li kixbʼaanu li Yos» saʼ xkʼabʼaʼ li Jesús (Hechos 2:22). Li Yos kixkʼe xwankil li Jesús re xxaqabʼankil jun li kaqsut-iqʼ, xkʼebʼal xtzekemq jun tuubʼ chi kristiʼaan, xkʼirtasinkilebʼ li yaj ut xwaklesinkilebʼ wiʼ chik chi yoʼyo li kamenaq (Mateo 8:23-27; 14:15-21; Marcos 6:56; Lucas 7:11-17). Ebʼ li sachbʼachʼoolej li kixbʼaanu li Jesús kixkʼut naq li Yos kitaqlank chaq re. Aʼin naxkʼut ajwiʼ naq li Jehobʼa wank xwankil re risinkil chixjunil ebʼ li chʼaʼajkilal.
3. Kʼaru naru naqatzol rikʼin li xyuʼam li Jesús?
Li Jesús junelik kiʼabʼink chiru li Jehobʼa (yaabʼasi Juan 8:29). Li Jesús kixbʼaanu chixjunil li kiyeheʼk chaq re xbʼaan Xyuwaʼ toj reetal naq kikamsiik. Rikʼin li kixbʼaanu kixkʼutbʼesi naq ebʼ li kristiʼaan naru nekeʼabʼink chiru li Yos usta wankebʼ saʼ chʼaʼajkilal. Joʼkan naq li Santil Hu naxye naq li Jesús «kixkʼam eebʼe re naq teetaaqe li xnums» (1 Pedro 2:21).
QASIKʼAQ XCHAMAL LI NAʼLEBʼ
Qilaq chanru li Jesús kixkʼe resil li chaabʼil esil ut chanru kixbʼaanu ebʼ li sachbʼachʼoolej.
4. Li Jesús kixye resil li chaabʼil esil
Li Jesús kixbʼeni naabʼal li bʼe li pojtzʼ ru, re xkʼebʼal chi naweʼk li chaabʼil esil rehebʼ li qas qiitzʼin. Cheeyaabʼasi Lucas 8:1 ut chexʼaatinaq chirix ebʼ li patzʼom aʼin:
Ma naxpuktesi li yaal kaʼajwiʼ rehebʼ li kristiʼaan li nekeʼwulak chi xsikʼbʼal?
Kʼaru kixbʼaanu li Jesús re xtawbʼalebʼ li kristiʼaan?
Li Yos ak kixye chaq naq li Mesiiy tixpuktesi li chaabʼil esil. Cheeyaabʼasi Isaías 61:1, 2 ut chexʼaatinaq chirix ebʼ li patzʼom aʼin:
Kʼaru kixbʼaanu li Jesús re naq ttzʼaqloq ru li propesiiy aʼin?
Ut anaqwan, ma aajel ru naq ebʼ li kristiʼaan teʼrabʼi li chaabʼil esil?
5. Li Jesús kixkʼut ebʼ li chaabʼil naʼlebʼ
Li Jesús moko kaʼaj tawiʼ kixpuktesi li chaabʼil esil chirix li Xʼawabʼejilal li Yos, kixkʼut ajwiʼ ebʼ li chaabʼil naʼlebʼ li naru nokooxtenqʼa saʼ li qayuʼam. Qilaq wiibʼ oxibʼ li naʼlebʼ li kixye li Jesús saʼ li xseeraqʼ saʼ xbʼeen li tzuul. Cheeyaabʼasi Mateo 6:14, 34 ut 7:12 ut chexʼaatinaq chirix ebʼ li patzʼom aʼin:
Kʼaru ebʼ li chaabʼil naʼlebʼ kixkʼe li Jesús saʼebʼ li raqal aʼin?
Ma taaye raj naq ebʼ li naʼlebʼ aʼin toj nakʼanjelak saʼebʼ li qakutan?
6. Li Jesús kixbʼaanu ebʼ li sachbʼachʼoolej
Li Jehobʼa kixkʼe xwankil li Jesús re naq tixbʼaanu naabʼal li sachbʼachʼoolej. Re rilbʼal jun eetalil cheeyaabʼasi Marcos 5:25-34 malaj cheerilaq li BʼIDEO. Moqon chexʼaatinaq chirix ebʼ li patzʼom aʼin:
Kʼaru naxpaabʼ chaq li ixq?
Kʼaru xwulak chaawu chirix li kixbʼaanu li Jesús?
Cheeyaabʼasi Juan 5:36 ut chexʼaatinaq chirix li patzʼom aʼin:
Kʼaru naxkʼut chiqu ebʼ li sachbʼachʼoolej li kixbʼaanu li Jesús?
Ma nakaanaw?
Chixjunil li naqanaw chirix li xyuʼam li Jesús naqataw saʼebʼ li hu Mateo, Marcos, Lucas ut Juan. Ebʼ aʼan keʼxtzʼiibʼa jalan jalanq li naʼlebʼ chirix li Jesús, naq naqil li kaahibʼ chi hu aʼin naqanaw chanru chaq li xyuʼam li Jesús.
LAJ MATEO
kixtzʼiibʼa li xbʼeen hu. Aʼan kiʼaatinak chirix li xkʼutum li Jesús ut xbʼeen xbʼeen chirix li Xʼawabʼejilal li Yos.
LAJ MARCOS
kixtzʼiibʼa li hu li kachʼin roq. Nasach qachʼool chi rilbʼal li kixtzʼiibʼa.
LAJ LUCAS
kixye naq kixkʼe xwankil li tijok ut naq naroxloqʼihebʼ li ixq.
LAJ JUAN
kixye chirix kʼaru kiʼaatinak li Jesús rikʼinebʼ li ramiiw ut ebʼ li junchʼol. Aʼin nokooxtenqʼa chi xnawbʼal chanru nanaʼlebʼak li Jesús.
WIIBʼ OXIBʼ NEKEʼXYE: «Li Jesús aʼan li Nimajwal Yos».
Kʼaru nakaakʼoxla laaʼat?
LI AK XQATZOL
Li Jesús kixkʼe resil li Xʼawabʼejilal li Yos, kixbʼaanu li sachbʼachʼoolej ut junelik kiʼabʼink chiru li Jehobʼa.
Qajultikaq
Kʼaru li xnimal ru kʼanjel kixbʼaanu li Jesús naq kiwank saʼ Ruuchichʼochʼ?
Kʼaru nekeʼxkʼutbʼesi li sachbʼachʼoolej li kixbʼaanu li Jesús?
Kʼaru ebʼ li chaabʼil naʼlebʼ li kixkʼut li Jesús nokooxtenqʼa saʼ li qayuʼam?
SIKʼ XKOMON LI NAʼLEBʼ
Kʼaru li xnimal ru esil kixkʼe chi naweʼk li Jesús?
Tzol kʼaʼut naq naru naqapaabʼ naq yaal naq kikʼulmank li sachbʼachʼoolej li kixbʼaanu li Jesús.
Tzol chanru jun li winq kixjal li xyuʼam naq kixnaw naq li Jesús naxkʼe xchʼool chirixebʼ li kristiʼaan.
«Kaʼajwiʼ chiwix ninkʼe inchʼool» (Laj Kʼaakʼalehom, 1 re octubre 2014)
Tzol chi tustu ru wiibʼ oxibʼ li naʼlebʼ li kixbʼaanu li Jesús.
«Naq li Jesús kixtikibʼ li xkʼanjel li Yos» (Li tooxtenqʼa chi xtzolbʼal Raatin li Yos, 4-B)
a Saʼ li tzolom 31 toj 33 tchʼolobʼamanq chiʼus kʼaru li Xʼawabʼejilal li Yos.