TZOLOM 17

Chanru li xnaʼlebʼ li Jesús?

Chi huhil

Naq naqatzol li kixye ut kixbʼaanu li Jesús, nokoonachʼok chixkʼatq ut chixkʼatq li Jehobʼa, li Xyuwaʼ. Bʼar wank wiibʼ oxibʼ li xchaabʼil naʼlebʼ? Ut chanru tooruuq xkʼambʼal qe rikʼin li Jesús?

1. Kʼaru naxtzol li Jesús rikʼin li Xyuwaʼ?

Chiru naabʼal chihabʼ li Jesús ak wank chaq saʼ choxa ut naxtzol re rikʼin li Xyuwaʼ. Joʼkan naq nakʼoxlak ut nanaʼlebʼak joʼ aʼan (yaabʼasi Juan 5:19). Li Jesús naxyuʼami chi tzʼaqal re ru li xnaʼlebʼ li Jehobʼa, joʼkan naq kixye: «Li xʼilok wu, xril ru li Yuwaʼbʼej» (Juan 14:9). Joʼkan naq, wi taanaw ru chiʼus li Jesús taanaw ajwiʼ ru li Jehobʼa. Jun eetalil, naq naqil naq li Jesús naxtoqʼobʼa ruhebʼ li kristiʼaan naqatzol naq joʼkan ajwiʼ li xnaʼlebʼ li Jehobʼa.

2. Chanru kixkʼut li Jesús naq naxra li Jehobʼa?

Li Jesús kixye: «Tento tixnaw li ruuchichʼochʼ naq ninra li Yuwaʼbʼej ut ninbʼaanu li xinxtaqla wiʼ chaq» (Juan 14:31). Usta kixkʼul li rahilal, li Jesús junelik kiʼabʼink chiru li Xyuwaʼ, chi joʼkan kixkʼut naq naxra. Xbʼaan naq naxra li Xyuwaʼ junelik kiʼaatinak chirix ut kixtenqʼahebʼ li junchʼol re naq teʼwanq choʼq ramiiw li Yos (Juan 14:23).

3. Chanru kixkʼut li Jesús naq naxrahebʼ li qas qiitzʼin?

Li Santil Hu naxye naq li Jesús naxtaw xsahil xchʼool «rikʼinebʼ li ralal xkʼajolebʼ li poyanam» (Proverbios 8:31). Kixkʼutbʼesi aʼin, naq chi anchal xchʼool naxtenqʼahebʼ ut naxkʼojobʼebʼ xchʼool. Naq kixbʼaanu ebʼ li sachbʼachʼoolej, moko kaʼaj tawiʼ yook xkʼutbʼesinkil li xwankil, naxkʼutbʼesi ajwiʼ li xrahom (Marcos 1:40-42). Qʼun xchʼool ut moko nasikʼok ta u ut li nekeʼabʼink re nekeʼkʼojobʼaak xchʼool. Saʼ xkʼabʼaʼ naq naxrahebʼ li kristiʼaan kixkʼulubʼa li rahilal ut li kamk. Abʼan qʼaxal wiʼ chik naxrahebʼ li nekeʼxyuʼami li naxye (yaabʼasi Juan 15:13, 14).

QASIKʼAQ XCHAMAL LI NAʼLEBʼ

Qatzolaq chanru narahok li Jesús ut nakʼehok chi anchal xchʼool ut qakʼamaq qe rikʼin.

4. Li Jesús naxra li Xyuwaʼ

Rikʼin li kixbʼaanu kixkʼut chiqu chanru xraabʼal li Jehobʼa. Cheeyaabʼasi Lucas 6:12 ut Juan 15:10; 17:26. Naq ak xeeyaabʼasi li junjunq chi raqal chexʼaatinaq chirix li patzʼom aʼin:

Joʼ kixbʼaanu li Jesús, chanru tqakʼutbʼesi naq naqara li Jehobʼa?

Li Jesús yook chi tijok. — Li Jesús naxra li Xyuwaʼ ut junelik natijok chiru.

5. Li Jesús naxkʼe xchʼool chirixebʼ li kristiʼaan

Li Jesús moko naxsikʼ ta li us kaʼajwiʼ choʼq re. Usta lubʼlu chaq naroksi li xhoonal ut li xmetzʼew re xtenqʼankilebʼ li junchʼol. Cheeyaabʼasi Marcos 6:30-44 ut chexʼaatinaq chirix ebʼ li patzʼom aʼin:

Joʼ xqil, chanru kixkʼutbʼesi li Jesús naq naxkʼe xchʼool chirixebʼ li qas qiitzʼin? (Teeril li raqal 31, 34, 41 ut 42).
Kʼaʼut naq li Jesús kixtenqʼahebʼ li poyanam? (Teeril li raqal 34).
Saʼ xkʼabʼaʼ naq li Jesús naxkʼam re rikʼin li Xyuwaʼ, kʼaru naqatzol chirix li Jehobʼa?
Chanru naru tqakʼe qachʼool chirixebʼ li qas qiitzʼin, joʼ kixbʼaanu li Jesús?

Li Jesús naxkʼehebʼ chi waʼak chi mil li winq, ixq ut kokʼal rikʼin oobʼ chi kaxlanwa ut wiibʼ chi kar. Naxkʼe rehebʼ li xtzolom re naq teʼxjekʼi.

6. Li Jesús nakʼehok chi anchal xchʼool

Usta moko bʼihom ta chaq li Jesús naxwotz li kʼaru wank re ut naraj naq joʼkan ajwiʼ tqabʼaanu laaʼo. Cheeyaabʼasi Hechos 20:35 ut chexʼaatinaq chirix li patzʼom aʼin:

Joʼ kixye li Jesús, kʼaru naxkʼe xsahil qachʼool?

Cheerilaq li BʼIDEO ut chexʼaatinaq chirix li patzʼom aʼin:

BʼIDEO: «Wank li sahil chʼoolejil saʼ li kʼehok chiru li kʼuluk» (moko chixjunil ta) (4:00)

Usta moko bʼihomo ta, chanru tooruuq chi kʼehok?

Ma nakaanaw?

Li Santil Hu naxye naq kaʼajwiʼ chiru li Jehobʼa tootijoq ut saʼ xkʼabʼaʼ li Jesús (yaabʼasi Juan 16:23, 24). Joʼkan naqakʼutbʼesi naq oxloqʼ chiqu li kixbʼaanu li Jesús re naq toowanq choʼq ramiiw li Jehobʼa.

WIIBʼ OXIBʼ NEKEʼXYE: «Maakʼaʼ naraj re li Yos wi naqakʼul li rahilal».

Xbʼaan naq li Jesús naxkʼam re rikʼin li Xyuwaʼ, chanru naxkʼutbʼesi li xbʼaanuhom naq li Jehobʼa naxkʼe xchʼool chiqix?

LI AK XQATZOL

Li Jesús naxra li Jehobʼa ut naxra ajwiʼ ebʼ li qas qiitzʼin. Xbʼaan naq li Jesús naxkʼam re rikʼin li Jehobʼa, naq tqanaw ru chiʼus, tqanaw ajwiʼ ru li Jehobʼa.