TZOLOM 45
Chanru tqakʼutbʼesi naq moko reho ta li ruuchichʼochʼ
Li Jesús kixye rehebʼ li xtzolom «moko rehex ta li ruuchichʼochʼ» (Juan 15:19). Aʼin naraj xyeebʼal naq inkʼaʼ nokootzʼaqonk saʼ xnaʼlebʼebʼ li awabʼej chi moko saʼebʼ li yalok u. Abʼan chʼaʼaj xbʼaanunkil aʼin, maare ebʼ li junchʼol tooʼeʼxseʼe. Kʼaru ttenqʼanq qe re naq inkʼaʼ tootzʼaqonq saʼ xnaʼlebʼ li ruuchichʼochʼ ut naq maajunwa tqatzʼeqtaana li Jehobʼa?
1. Kʼaru nekeʼxkʼoxla ebʼ li tzʼaqal aj paabʼanel chirixebʼ li awabʼej?
Ebʼ li tzʼaqal aj paabʼanel nekeʼroxloqʼi ebʼ li awabʼej. Li Jesús kixye: «Qʼajsihomaq re li awabʼej li kʼaru re li awabʼej». Nokooʼabʼink chiru li xchaqʼrabʼ li tenamit ut naqatoj li naxpatzʼ li awabʼej (Marcos 12:17). Li Santil Hu naxye naq ebʼ li awabʼej wankebʼ bʼayaq xwankil xbʼaan naq li Jehobʼa xkanabʼank rehebʼ (Romanos 13:1). Joʼkan naq naqanaw naq li xwankilebʼ moko juntaqʼeet ta rikʼin li xwankil li Jehobʼa. Chʼolchʼo chiqu naq li Qayos ut li Xʼawabʼejilal trisi chi junajwa chixjunil li qachʼaʼajkilal.
2. Chanru naqakʼutbʼesi naq inkʼaʼ nokootzʼaqonk chirix li xʼawabʼejilal li winq?
Joʼ kixbʼaanu li Jesús inkʼaʼ nokootzʼaqonk saʼ li xʼawabʼejilal li winq. Naq li Jesús kixbʼaanu jun li sachbʼachʼoolej ebʼ li kristiʼaan keʼxyal xxaqabʼankil joʼ awabʼej abʼanan inkʼaʼ kixkʼulubʼa (Juan 6:15). Kʼaʼut? Aʼan kixye: «Linʼawabʼejihom maawaʼ re li ruuchichʼochʼ aʼin» (Juan 18:36). Wank jalan jalanq li naʼlebʼ li naqabʼaanu bʼarwiʼ naqakʼut naq joʼ xtzolom li Jesús inkʼaʼ nokootzʼaqonk chirix li xʼawabʼejilal li winq. Jun eetalil, inkʼaʼ nokootzʼaqonk saʼebʼ li yalok u (yaabʼasi Miqueas 4:3). Usta naqoxloqʼi li reetalil li tenamit joʼ li xtʼikrul, inkʼaʼ naqaloqʼoni ru joʼ naqaloqʼoni ru li Jehobʼa (1 Juan 5:21). Chi moko nokooʼokenk chirix junaq li winq li naraj awabʼejink. Rikʼin ebʼ li naʼlebʼ aʼin ut jalan chik, naqakʼutbʼesi naq kaʼajwiʼ nokooʼokenk chirix li Xʼawabʼejilal li Yos.
QASIKʼAQ XCHAMAL LI NAʼLEBʼ
Qatzʼilaq rix wiibʼ oxibʼ li naʼlebʼ bʼarwiʼ maare tchʼaʼajkoʼq chiqu okenk kaʼajwiʼ chirix li Jehobʼa ut tqil ajwiʼ chanru tooruuq xsahobʼresinkil xchʼool li Jehobʼa rikʼin li qabʼaanuhom.
3. Ebʼ laj paabʼanel inkʼaʼ nekeʼokenk chirix li xʼawabʼejilal li winq
Li Jesús ut ebʼ li xtzolom keʼxkanabʼ qe jun chaabʼil eetalil. Cheeyaabʼasi Romanos 13:1, 5-7 ut 1 Pedro 2:13, 14. Moqon cheerilaq li BʼIDEO ut chexʼaatinaq chirix ebʼ li patzʼom aʼin:
Kʼaʼut tento tqoxloqʼihebʼ li awabʼej?
Chanru tqakʼutbʼesi naq nokooʼabʼink chiruhebʼ?
Wankebʼ li tenamit li nekeʼxye naq inkʼaʼ nekeʼokenk saʼ li yalok u abʼan naq wiibʼ chi tenamit nekeʼok chi pleetik nekeʼokenk chirixebʼ. Joʼkan bʼiʼ, kʼaru naraj xyeebʼal naq inkʼaʼ nokooʼokenk saʼ xnaʼlebʼ li ruuchichʼochʼ? Cheeyaabʼasi Juan 17:16. Moqon cheerilaq li BʼIDEO ut chexʼaatinaq chirix li patzʼom aʼin:
Kʼaru naraj xyeebʼal naq inkʼaʼ nokooʼokenk chirix li xʼawabʼejilal li winq?
Ut wi ebʼ li awabʼej teʼxye qe naq tqabʼaanu junaq li naʼlebʼ li naxqʼet li xchaqʼrabʼ li Yos? Cheeyaabʼasi Hechos 5:28, 29. Moqon cheerilaq li BʼIDEO ut chexʼaatinaq chirix ebʼ li patzʼom aʼin:
Wi li xchaqʼrabʼ li winq naxqʼet li xchaqʼrabʼ li Yos, chiru ani tooʼabʼinq?
Ma naru nakaakʼoxla junaq li naʼlebʼ bʼarwiʼ ebʼ li tzʼaqal aj paabʼanel inkʼaʼ teʼabʼinq chiruhebʼ li awabʼej?
4. Mooʼokenk chirix li ruuchichʼochʼ saʼ li qakʼaʼuxl ut li qabʼaanuhom
Cheeyaabʼasi 1 Juan 5:21. Moqon cheerilaq li BʼIDEO ut chexʼaatinaq chirix ebʼ li patzʼom aʼin:
Kʼaʼut laj Ayenge inkʼaʼ kiʼokenk chirix ebʼ li awabʼej ut inkʼaʼ kitzʼaqonk re xnimankil li xtʼikrul li tenamit?
Kʼaru nakaaye, ma us tawiʼ kinaʼlebʼak?
Kʼaru chik li naʼlebʼ truuq xbʼaanunkil naq tooʼokenq chirix li ruuchichʼochʼ? Cheerilaq li BʼIDEO ut chexʼaatinaq chirix ebʼ li patzʼom aʼin:
Chanru naqakʼutbʼesi naq inkʼaʼ nokoonaʼlebʼak joʼ li ruuchichʼochʼ naq ebʼ li tenamit nekeʼbʼatzʼunk chiribʼilebʼ ribʼ?
Chanru naqakʼutbʼesi naq inkʼaʼ nokooʼokenk saʼ li xnaʼlebʼ li ruuchichʼochʼ naq ebʼ li awabʼej nekeʼxbʼaanu junaq li naʼlebʼ?
Chanru naru naq li naqabʼi saʼebʼ li esil malaj li nekeʼxye ebʼ li kristiʼaan li naqochbʼeni naru nokooxkʼam chi okenk saʼ li xnaʼlebʼ li ruuchichʼochʼ?
Joqʼe naxkʼutbʼesi jun laj paabʼanel naq inkʼaʼ natzʼaqonk saʼ xnaʼlebʼ li ruuchichʼochʼ rikʼin li xkʼaʼuxl ut li xbʼaanuhom?
WIIBʼ OXIBʼ NEKEʼXPATZʼ: «Kʼaʼut inkʼaʼ nakaakʼe xloqʼal li xtʼikrul li tenamit ut nakaabʼicha li xbʼich?».
Kʼaru raj taasume?
LI AK XQATZOL
Ebʼ li tzʼaqal aj paabʼanel inkʼaʼ nekeʼokenk chirix li xʼawabʼejilal li winq ut nekeʼxkʼutbʼesi aʼin rikʼin li nekeʼxye, nekeʼxbʼaanu ut li nekeʼxkʼoxla.
Qajultikaq
Chanru toonaʼlebʼaq rikʼinebʼ li awabʼej?
Kʼaʼut inkʼaʼ nokooʼokenk chirixebʼ li awabʼej?
Kʼaru ebʼ li naʼlebʼ naru naxyal qix re naq tooʼokenq saʼ li xnaʼlebʼ li ruuchichʼochʼ?
SIKʼ XKOMON LI NAʼLEBʼ
Kʼaru tento tqabʼaanu re naq inkʼaʼ tooʼokenq saʼ li xnaʼlebʼ li ruuchichʼochʼ?
Chanru teʼxkawubʼresi ribʼ li junkabʼal naq toj maajiʼ nekeʼyaleʼk rix re naq teʼtzʼaqonq saʼ xnaʼlebʼ li ruuchichʼochʼ?
Mootzʼaqonk saʼ xnaʼlebʼ li ruuchichʼochʼ naq wanko saʼ xyanq ebʼ li tenamit (4:25)
Qʼaxal loqʼ chiruhebʼ li kristiʼaan xkolbʼal li xtenamit, abʼan ma yaal aʼin?
Chanru naqakʼutbʼesi naq moko reho ta li ruuchichʼochʼ naq naqasikʼ qakʼanjel?
«Li junjunq tento tixkʼam li riiq» (Laj Kʼaakʼalehom, 15 re marzo 2006)