TZOLOM 49
Kʼaru taabʼaanu re naq sahaq saʼ xchʼool laajunkabʼal? (tasal 1)
Li tojeʼ xeʼsumlaak nekeʼraj naq li sahil chʼoolejil li xeʼrekʼa naq xeʼsumlaak maajoqʼe t-osoʼq. Ut naru xbʼaanunkil. Ebʼ li tzʼaqal aj paabʼanel li najter nekeʼsumlaak nekeʼxnaw naq naru naq sahaqebʼ saʼ xchʼool saʼ li xsumlajik wi nekeʼxyuʼami li naxye li Santil Hu.
1. Kʼaru li naʼlebʼ naxkʼe li Santil Hu choʼq re li bʼeelomej?
Li Jehobʼa kixtenebʼ saʼ xbʼeen li bʼeelomej xjolominkil li xjunkabʼal (yaabʼasi Efesios 5:23). Li Jehobʼa naroybʼeni naq li tixbʼaanu li bʼeelomej tixkʼam chaq rusilal choʼq re li xjunkabʼal. Li Santil Hu naxye aʼin rehebʼ: «Chera leerixaqil» (Efesios 5:25). Kʼaru naraj xyeebʼal aʼin? Li chaabʼil bʼeelomej naxra ut naroxloqʼi li rixaqil chiruhebʼ li junchʼol ut naq wankebʼ xjunes. Naxyal xqʼe re naq maakʼaʼ tixkʼul, sahaq saʼ xchʼool ut naxkʼe re li naʼajmank chiru (1 Timoteo 5:8). Abʼan, li jwal wank xwankil chiru, aʼan xtenqʼankil li rixaqil re naq wanq saʼ amiiwil rikʼin li Jehobʼa (Mateo 4:4). Jun eetalil, naru nekeʼtijok ut nekeʼril xsaʼ li Santil Hu saʼ wiibʼal. Wi li bʼeelomej naxkʼe xchʼool chirix li rixaqil chaabʼilaq li ramiiwil rikʼin li Jehobʼa (yaabʼasi 1 Pedro 3:7).
2. Kʼaru li naʼlebʼ naxkʼe li Santil Hu choʼq re li ixaqilbʼej?
Li Santil Hu naxye naq «li ixaqilbʼej chiroxloqʼi li xbʼeelom» (Efesios 5:33). Chanru tixbʼaanu aʼin? Naq naxkʼoxla rix li xchaabʼil naʼlebʼ li xbʼeelom ut chanru aʼan naxkʼe xchʼool chi xwenteninkilebʼ. Naxkʼutbʼesi ajwiʼ naq naroxloqʼi naq naxkʼe saʼ ajl li naxkʼoxla xbʼaanunkil ut naraatina saʼ xyaalal usta aʼan moko naxloqʼoni ta ru li Jehobʼa.
3. Kʼaru truuq xbʼaanunkil jun li sumal re xkawubʼresinkil li xsumlajik?
Li Santil Hu naxye aʼin chirixebʼ li sumsukebʼ: «Junajaqebʼ aj chik chi tzʼejwalej teʼkanaaq chi xkabʼichalebʼ» (Mateo 19:5). Aʼin naraj xyeebʼal naq tento teʼxyal xqʼe re naq maakʼaʼ tjachoq rehebʼ. Joʼkan naq nekeʼxkʼe xhoonal re aatinak saʼ wiibʼal, re xyeebʼal kʼaru nekeʼxkʼoxla ut nekeʼrekʼa ut re xkʼutbʼesinkil ajwiʼ naq nekeʼxra ribʼebʼ. Joʼkan naq li sumsukebʼ kaʼajwiʼ li Jehobʼa nekeʼxkʼe chiʼubʼej chiru li xsumʼaatin. Ut weent ajwiʼ teʼxbʼaanu re naq inkʼaʼ teʼoq saʼ amiiwil rikʼin junaq li kristiʼaan li maawaʼ li xsumʼaatin.
QASIKʼAQ XCHAMAL LI NAʼLEBʼ
Qatzʼilaq rix kʼaru xnaʼlebʼ li Santil Hu naru naxkawubʼresi laasumlajik.
4. Ex bʼeelomej cheera ut cheerilaq leerixaqil
Li Santil Hu naxye: «Ebʼ li winq tento teʼxra li rixaqil, kamaʼ naq nekeʼxra li xtzʼejwalebʼ» (Efesios 5:28, 29). Kʼaru naraj xyeebʼal aʼin? Cheerilaq li BʼIDEO ut chexʼaatinaq chirix li patzʼom aʼin:
Chanru naxkʼutbʼesi li bʼeelomej naq naxra ut naxkʼe xchʼool chirix li rixaqil?
Cheeyaabʼasi Colosenses 3:12 ut chexʼaatinaq chirix li patzʼom aʼin:
Chanru tixyuʼami li bʼeelomej ebʼ li naʼlebʼ aʼin saʼ li xsumlajik?
5. Ex ixaqilbʼej cheera ut cheeroxloqʼi leebʼeelom
Li Santil Hu naxye re li ixaqilbʼej naq troxloqʼi li xbʼeelom usta aj Testiiw malaj inkʼaʼ. Cheeyaabʼasi 1 Pedro 3:1, 2 ut chexʼaatinaq chirix ebʼ li patzʼom aʼin:
Wi laabʼeelom inkʼaʼ nakʼanjelak chiru li Jehobʼa maare taawaj raj naq tixbʼaanu. Kʼaru tatruuq xbʼaanunkil: Ma xyeebʼal re junelik li naxye li Santil Hu malaj wi chaabʼil nakatnaʼlebʼak joʼ ixaqilbʼej? Kʼaʼut?
Saʼ kabʼichal naru nekeʼxsikʼ chiʼus kʼaru teʼxbʼaanu. Abʼan li ixaqilbʼej moko junelik ta tixkʼulubʼa li tixye li xbʼeelom. Wi joʼkan, naru naxye li naxkʼoxla saʼ xyaalal ut saʼ tuulanil. Abʼan misach saʼ xchʼool naq li Jehobʼa kixtenebʼ saʼ xbʼeen li bʼeelomej xjolominkil li junkabʼal. Ut tixbʼaanu chixjunil li wank saʼ ruqʼ re xtenqʼankil li xbʼeelom. Wi joʼkan tixbʼaanu sahaq saʼ xchʼool li xjunkabʼal. Cheeyaabʼasi 1 Pedro 3:3-5 ut chexʼaatinaq chirix li patzʼom aʼin:
Kʼaru naxkʼoxla li Jehobʼa naq naril naq li ixaqilbʼej naroxloqʼi li xbʼeelom?
6. Tatruuq xqʼaxbʼal ru li chʼaʼajkilal li nachalk saʼ laasumlajik
Maakʼaʼ junaq li sumal li maakʼaʼ xchʼaʼajkilal, joʼkan naq tento teʼkʼanjelaq saʼ junajil re naq teʼruuq xqʼaxbʼal ru. Cheerilaq li BʼIDEO ut chexʼaatinaq chirix ebʼ li patzʼom aʼin:
Kʼaru naxkʼutbʼesi naq li sumal aʼin moko wankebʼ ta chik saʼ junajil?
Kʼaru keʼxbʼaanu re xkawubʼresinkil li xsumlajik?
Cheeyaabʼasi 1 Corintios 10:24 ut Colosenses 3:13. Naq ak xeeyaabʼasi ebʼ li raqal chexʼaatinaq chirix li patzʼom aʼin:
Chanru nakawuuk li sumlajik naq nayuʼamiik li naʼlebʼ aʼin?
Li Santil Hu naxye naq tqoxloqʼi qibʼ. Aʼin naraj xyeebʼal naq tqara ut tqoxloqʼi li qasumʼaatin. Cheeyaabʼasi Romanos 12:10 ut chexʼaatinaq chirix ebʼ li patzʼom aʼin:
Ma toj taawoybʼeni naq laasumʼaatin tatroxloqʼi? Kʼaʼut naq nakaaye chi joʼkan?
WIIBʼ OXIBʼ NEKEʼXYE: «Inkʼaʼ chik sa naqil qibʼ joʼ junxil».
Chanru taakʼut chiru naq li Santil Hu truuq xtenqʼankil saʼ li xsumlajik?
LI AK XQATZOL
Naru naq sahaqebʼ saʼ xchʼool li bʼeelomej ut li ixaqilbʼej wi nekeʼxra ribʼebʼ, nekeʼroxloqʼi ribʼebʼ ut nekeʼxyuʼami li xnaʼlebʼ li Santil Hu.
Qajultikaq
Kʼaru truuq xbʼaanunkil li bʼeelomej re naq sahaqebʼ saʼ xchʼool saʼ li xsumlajik?
Kʼaru truuq xbʼaanunkil li ixaqilbʼej re naq sahaqebʼ saʼ xchʼool saʼ li xsumlajik?
Wi ak sumsukat, kʼaru xnaʼlebʼ li Santil Hu truuq aatenqʼankil re xkawubʼresinkil laasumlajik?
SIKʼ XKOMON LI NAʼLEBʼ
Tzol wiibʼ oxibʼ li naʼlebʼ li tatxtenqʼa re naq sahaq saʼ xchʼool laajunkabʼal.
Chaawil saʼ li bʼideo kʼaru li osobʼtesink naxkʼe li Jehobʼa naq nakaayuʼami li naxye li Santil Hu saʼ laasumlajik.
Tzol kʼaru naraj xyeebʼal roxloqʼinkil naq li bʼeelomej naxjolomi li junkabʼal.
Chanru kixbʼaanu jun li sumal re xqʼaxbʼal ru ebʼ li nimla chʼaʼajkilal, joʼ li xjachbʼal li xsumlajik?
Rik’in xtenq’ li Jehob’a xqatuqub’ wi’ chik ru li qasumlajik (5:14)