Ma kawresinbʼilat re wank saʼ li chʼinaʼusil naʼajej?

KAWRESINBʼILO RE XCHʼINAʼUSINKIL LI RUUCHICHʼOCHʼ

Naq li Jehobʼa kixye rehebʼ li poyanam «chenujobʼresi li ruuchichʼochʼ ut chereechanihaq», kiraj xyeebʼal naq saʼ jun kutan li Ruuchichʼochʼ twanq joʼ jun chʼinaʼusil naʼajej (Gén. 1:28). Li teʼwanq xyuʼam chi junelik tento naq teʼxpaabʼ li najteril chaqʼrabʼ aʼin. Li Ruuchichʼochʼ moko twanq ta joʼ jun chaabʼil naʼajej saʼ xtiklajik xbʼaan naq li naʼajej Edén najter nasach. Twanq naabʼal li qakʼanjel, xbʼaan naq ebʼ li poyanam xeʼxtzʼajni ru li Ruuchichʼochʼ. Jwal naabʼalaq li kʼanjel!

Ebʼ laj Israel xeʼxbʼaanu ajwiʼ chaq aʼin naq xeʼsutqʼiik chaq Jerusalén, naq ak xnumeʼk 70 chihabʼ. Teʼruuq xchʼinaʼusinkil wiʼ chik li tenamit rikʼin xtenqʼ li Jehobʼa, joʼ kixye li propeet Isaías: «Tinsutqʼisi li chaqichʼochʼ choʼq sahil naʼajej, ut li joxkʼ chʼochʼ tkanaaq choʼq xnaʼaj li Qaawaʼ» (Is. 51:3). Ebʼ laj Israel xeʼxbʼaanu naq tchʼinaʼusoʼq wiʼ chik li xnaʼajebʼ. Joʼkan ajwiʼ, rikʼin li rosobʼtesihom li Jehobʼa, li teʼrechani li Ruuchichʼochʼ teʼruuq xbʼaanunkil naq tchʼinaʼusoʼq wiʼ chik. Chalen anaqwan wank naabʼal li tooruuq xbʼaanunkil re xkʼutbʼesinkil naq naqaj tzʼaqonq saʼ li kʼanjel aʼan.

Naru nakaayal aaqʼe naq laawochoch ut laasutam saabʼesinbʼilaq ru. Usta ebʼ laawechkabʼal inkʼaʼ nekeʼxbʼaanu aʼin us raj naq taabʼaanu. Tatruuq ajwiʼ okenk chi xsaabʼesinkil ut xyiibʼankil li Chʼutlebʼaal Kabʼl ut li naʼajej bʼarwiʼ naʼuxmank li nimla chʼutam. Ut wi nakatruhank naru nakaayeechiʼi aawibʼ re xtenqʼankilebʼ li nekeʼxkʼul junaq li rahilal. Chi joʼkan taakʼutbʼesi naq nakaawaj xtenqʼankilebʼ li junchʼol. Kʼoxla: «Ma naru nintzol junaq li naʼlebʼ li tkʼanjelaq chiwu wi li Jehobʼa tixbʼaanu naq tinwanq saʼ li chʼinaʼusil naʼajej?».

KAWRESINBʼILO RE XKʼULBʼALEBʼ LI TEʼWAKLIIQ CHI YOʼYO

Naq kiwaklesiik chi yoʼyo li xrabʼin laj Jairo, li Jesús kixye naq teʼxkʼe xwa (Mar. 5:42, 43). Xchʼolaninkil junaq li ixqaʼal li wank 12 chihabʼ re moko chʼaʼaj ta. Abʼan ma naqakʼoxla li nimla kʼanjel li twanq naq ttzʼaqloq ru li xyeechiʼom li Jesús: «Chixjunilebʼ li wanqebʼ saʼ muqlebʼaal kamenaq teʼrabʼi xyaabʼ xkux ut teʼelq chaq» (Juan 5:28, 29). Usta li Santil Hu inkʼaʼ naxye chi tzʼaqal re ru, us xkʼoxlankil naq ebʼ li teʼwakliiq chi yoʼyo t-ajmanq chiruhebʼ li xtzekemqebʼ, li xtʼikr ut li naʼajej bʼar teʼkanaaq. Ma naru nakaakʼutbʼesi anaqwan naq nakaawaj wank aran re tenqʼank? Kʼoxla ebʼ li patzʼom aʼin.

Naq saʼ laachʼuut nakʼemank li esil naq twulaq li cheekel winq li naʼulaʼanink chʼuut, ma nakaayeechiʼi aawibʼ chi xkʼebʼal li tzakahemq? Ut maare junaq li kiwank Betel nataqlaak chi puktesink malaj junaq li cheekel winq li naʼulaʼanink chʼuut naraqeʼk li xkʼanjel. Ma naru nakaayeechiʼi aawibʼ chi xsikʼbʼal junaq li naʼaj bʼarwiʼ naru teʼwanq? Ut wi nawank junaq li nimla chʼutam re oxibʼ kutan malaj re jun kutan bʼarwiʼ wankat, ma nakaayeechiʼi aawibʼ chi tenqʼank naq toj maajiʼ natiklaak, malaj ak xraqeʼk li nimla chʼutam malaj re xkʼulbʼalebʼ li ulaʼ?

KAWRESINBʼILO RE XTZOLBʼALEBʼ LI TEʼWAKLIIQ CHI YOʼYO

Li naxye Hechos 24:15 nokooxkʼe chi kʼoxlak naq chi miyon li kristiʼaan teʼwakliiq chi yoʼyo. Naabʼalebʼ rehebʼ aʼin naq toj yoʼyokebʼ inkʼaʼ xeʼruuk xnawbʼal ru li Jehobʼa, abʼan saʼ li akʼ ruuchichʼochʼ teʼruuq xnawbʼal ru.a Li xeʼkʼanjelak chiru li Jehobʼa chiru naabʼal chihabʼ teʼruuq chi tenqʼank saʼ li nimla kʼanjel aʼin re xtzolbʼalebʼ li poyanam (Is. 11:9). Li xCharlotte, jun li hermaan li kipuktesink Europa, Sudamérica ut África, qʼaxal naraj naq twulaq li hoonal aʼan. Seʼseʼ ru naq naxye: «Nawaj xtzolbʼalebʼ li teʼwakliiq chi yoʼyo. Naq ninyaabʼasi resil junaq li ak xkamk ninkʼoxla: “Wi li kristiʼaan aʼan kiruuk raj xnawbʼal ru li Jehobʼa, jalan raj xyuʼam”. Nawaj raj naq ak yookin xyeebʼal rehebʼ li xeʼruuk raj xtawbʼal wi xeʼxtzol raj li yaal».

Ebʼ li xmoos li Yos li xeʼwank naq toj maajiʼ nachalk li Jesús saʼ Ruuchichʼochʼ tento naq naabʼal teʼxtzol. Qʼaxal sahaq saʼ qachʼool ut twulaq chiqu xchʼolobʼankil chiru laj Daniel chanru kitzʼaqlok ru li propesiiy li kixtzʼiibʼa usta aʼan inkʼaʼ kixtaw ru (Dan. 12:8). Joʼkan ajwiʼ qʼaxal chʼinaʼusaq xchʼolobʼankil chiru li xRut ut li xNoemí naq saʼ li xjunkabʼal kichalk li Mesiiy. Qʼaxal chʼinaʼusaq tzʼaqonk saʼ li kʼanjel aʼin re xtzolbʼalebʼ li kristiʼaan chirix li Santil Hu, xbʼaan naq maakʼaʼ chik tchʼaʼajkinq qe ut maakʼaʼaq chik li maaʼusilal.

Chanru nakaakʼutbʼesi naq nakaawaj tzʼaqonk saʼ li kʼanjel aʼin? Naq nakaayal aaqʼe chi kʼutuk chiʼus chirix li Santil Hu ut elk rajlal saʼ puktesink (Mat. 24:14). Usta anaqwan inkʼaʼ nakatruuk puktesink saʼ xkʼabʼaʼ laachihabʼ malaj xbʼaan jalan chik naʼlebʼ, naru nakaakʼutbʼesi naq nakaawaj xtzolbʼalebʼ li teʼwakliiq chi yoʼyo, wi nakaabʼaanu anaqwan chixjunil li wank saʼ aawuqʼ.

Us xkʼoxlankil ebʼ li patzʼom aʼin: ma qʼaxal nakaawaj rechaninkil li Ruuchichʼochʼ?, ma nasahoʼk saʼ laachʼool re tzʼaqonk chi xchʼinaʼusinkil wiʼ chik li Ruuchichʼochʼ, xchʼolaninkilebʼ ut xkʼutbʼal li yaal chiruhebʼ li teʼwakliiq chi yoʼyo? Taakʼutbʼesi naq yoʼon wankat wi nakaabʼaanu chixjunil li wank saʼ aawuqʼ anaqwan re xtzolbʼalebʼ li kristiʼaan xbʼaan naq aʼin ajwiʼ li kʼanjel tbʼaanumanq saʼ li akʼ ruuchichʼochʼ.