Sikʼ jun li naʼaj bʼarwiʼ tattzoloq chiʼus

Ma twulaq raj chaawu xtawbʼal rusilal naq tattzoloq saʼ junesal? Ebʼ li naʼlebʼ aʼin tatxtenqʼa re naq taakʼe aachʼool chirix li nakaatzol.

• Sikʼ junaq li naʼaj bʼarwiʼ sa taawekʼa aawibʼ. Wi naru, us naq tattzoloq saʼ jun li naʼaj li yamyo ut bʼarwiʼ wank li saqenk. Naru taabʼaanu saʼ jun li meex malaj tat-elq chirix kabʼl saʼ jun li naʼaj bʼarwiʼ sa tatwanq.

• Sikʼ jun li naʼaj bʼarwiʼ tatruuq chi wank aajunes. Li Jesús xkoho chi tijok «eqʼla naq toj maajiʼ nahikʼeʼk ru li kutan» saʼ jun li naʼaj li wank xjunes (Mar. 1:35). Wi laaʼat inkʼaʼ nakatruuk chi wank aajunes, ye rehebʼ laakomon malaj laajunkabʼal naq ok aawe chi tzolok ut patzʼ rehebʼ naq inkʼaʼ tateʼxchʼiʼchʼiʼi.

• Mixik aachʼool chirix jalan chik naʼlebʼ. Wi nakaawoksi laaselular malaj laatableta re tzolok, naru taachup malaj taakubʼsi xyaabʼ re naq inkʼaʼ tatxchʼiʼchʼiʼi. Ut wi naq yookat chi tzolok nachalk saʼ aachʼool jun li naʼlebʼ li tento taabʼaanu, tzʼiibʼa re naq moqon taabʼaanu. Naru taakanabʼ tzolok junpaataq wi nakaakʼe reetal naq yook chi xik aachʼool chirix jalan chik li naʼlebʼ.