Li pleetik nokooxchʼaʼajki
«Chalen saʼ li xkabʼ nimla yalok u wank li pleetik saʼ chixjunil li ruuchichʼochʼ aʼin naraj xyeebʼal naq jun re kaahibʼ li kristiʼaan malaj 2,000 miyon li kristiʼaan, wank saʼ li naʼajej bʼarwiʼ yook li pleetik».
Amina Mohammed, vicesecretaria general de las Naciones Unidas, 26 re enero 2023.
Li pleetik naru natiklaak saʼ junaq li naʼajej li wank saʼ tuqtuukilal. Naru ajwiʼ naxchʼaʼajki ebʼ li kristiʼaan li wankebʼ chi najt chiru li pleetik. Usta kiraqeʼk li pleetik, li rahilal li naxkʼam chaq naru naq twanq chiru naabʼal chihabʼ. Qilaq wiibʼ oxibʼ li eetalil:
Yook chi osoʼk li tzekemq. Li molam li naxtzʼil rix li tzekemq naxye naq li pleetik «naxkʼam chaq li weʼej ut li xkʼihalil ebʼ li kristiʼaan li maakʼaʼebʼ xtzekemq wankebʼ saʼ li naʼajej bʼarwiʼ yook li pleetik».
Ebʼ li yajel. Naq naqabʼi resil li pleetik naʼok qakʼaʼuxl. Ebʼ li kristiʼaan li wankebʼ saʼ li naʼajej bʼarwiʼ yook li pleetik nekeʼrahobʼtesiik ut naʼok xyajel li xkʼaʼuxebʼ. Ut wank sut ebʼ li bʼanlebʼaal maakʼaʼ chik naru nekeʼxbʼaanu.
Li xeʼelelik. Li molam li naxtenqʼahebʼ li xeʼelelik chaq saʼ li xtenamit naxye naq chalen septiembre 2023, numenaq 114 miyon li kristiʼaan xeʼelk chaq saʼ li xtenamit xbʼaan li pleetik.
Namaakʼaʼoʼk li tumin. Li pleetik naxkʼam chaq li chʼaʼajkilal chirix li tumin. Jun eetalil, ebʼ li kʼaʼaq re ru li kubʼenaq chaq xtzʼaq junxil anaqwan xterqʼuuk xtzʼaq. Naq ebʼ li awabʼej nekeʼroksi li tumin choʼq re li pleetik, namaakʼaʼoʼk li tumin choʼq re li bʼanlebʼaal ut choʼq re li tzolebʼaal, aʼin naxkʼe saʼ chʼaʼajkilal ebʼ li kristiʼaan. Ut naq ak kiraqeʼk li pleetik naʼoksimank naabʼal li tumin re xyiibʼankil li kijukʼeʼk.
Naxchʼaʼajki li qasutam. Ebʼ li kristiʼaan naru nekeʼxkʼul li rahilal naq najukʼeʼk li naʼaj bʼarwiʼ wankebʼ xbʼaan naq natzʼajnoʼk ru li haʼ, li iqʼ ut li naʼajej ut aʼin naxkʼam chaq naabʼal li yajel. Ut naq ak kiraqeʼk li pleetik naru ajwiʼ nekeʼkamk li kristiʼaan xbʼaan li bomba li muqbʼil saʼ chʼochʼ.
Chʼolchʼo naq li pleetik naxkʼam chaq naabʼal li chʼaʼajkilal.