Ezekiele

17 Ndinga ya Yehowa kwisilaka mono diaka nde: 2 “Mwana ya muntu, yula ngiufula mosi ya mpasi mpi ta kingana ya me tala nzo ya Izraele.+ 3 Nge fwete tuba nde, ‘Yehowa Mfumu ya Kuluta Nene me tuba nde: “Ngo-zulu ya nene,+ yina kele ti mapapu ya nene mpi ya nda, mansala mingi mpi ya mikubu mingi, kwisaka na Libani+ mpi bakaka nsongi ya nti ya sedre.+ 4 Yandi bukaka ka-lutangu na yo ya zulu ebuna yandi nataka yo na insi ya bantu ya mumbongo* mpi tululaka yo na mbanza ya bantu ya mumbongo.+ 5 Ebuna yandi bakaka ndambu ya nkeni ya insi yina+ mpi tulaka yo na kilanga yina ke butaka mingi. Yandi kunaka yo bonso nti ya wilo pene-pene ya bamasa mingi. 6 Yo menaka mpi kumaka nti ya vinu ya nkufi+ mpi yina ke yalumuka, ti matiti na yo ya ke tala na kati mpi misisa na yo ya ke yela na nsi na yo. Ebuna yo kumaka nti ya vinu, yo butaka matiti, mpi yo basisaka balutangu.+

7 “‘“Na nima, ngo-zulu ya nkaka ya nene+ kwisaka, yo vandaka ti mapapu ya nene mpi ya nda.+ Ebuna nti yina ya vinu tandulaka misisa na yo na lukasi yonso na ndambu na yandi, ntama ti masamba yina bo kunaka yo, mpi yo tindaka matiti na yo na ndambu na yandi na mpila nde yandi losila yo masa.+ 8 Bo kunaka yo dezia na kilanga mosi ya mbote pene-pene ya bamasa mingi, sambu yo basisa balutangu, yo buta bambuma, mpi yo kuma nti ya vinu ya nene.”’+

9 “Tuba nde, ‘Yehowa Mfumu ya Kuluta Nene me tuba nde: “Keti yo ta yela? Keti muntu ta tumuna ve misisa na yo+ mpi kusala nde bambuma na yo kupola mpi balutangu na yo kuyuma?+ Yo ta yuma kibeni na mpila nde yo ta vanda ve mfunu na kusadila diboko mosi ya ngolo to bantu mingi sambu na kutumuna yo na misisa. 10 Ata bo katula yo kisika mosi mpi bo kuna yo kisika ya nkaka, keti yo ta yela? Keti yo ta yuma ve kibeni ntangu mupepe ya esti ta bula yo? Yo ta yuma na masamba kisika yo menaka.”’”

11 Ndinga ya Yehowa kwisilaka mono diaka nde: 12 “Pardo, songa nzo ya me kolamaka nde, ‘Keti beno ke bakisa ve nki mambu yai ke tendula?’ Tuba nde, ‘Tala! Ntotila ya Babilone kwisaka na Yeruzalemi ebuna yandi bakaka ntotila na yo ti bamfumu na yo, mpi vutukaka ti bo na Babilone.+ 13 Diaka, yandi bakaka mosi na kati ya bana*+ ya kimfumu, salaka kuwakana ti yandi mpi lombaka yandi na kudia ndefi.+ Ebuna yandi nataka babakala ya lukumu ya insi yina,+ 14 sambu kimfumu kukuma na nsi, yo kuka ve kutelama, mpidina yo landa kuzinga kaka kana bo zitisa kuwakana na yandi.+ 15 Kansi nsuka-nsuka ntotila kolamaka na ntwala na yandi+ na mutindu yandi tindaka binati-nsangu na yandi na Ezipte sambu na kubaka bampunda+ mpi basoda mingi na maboko na bo.+ Keti yandi ta nunga? Keti muntu yina ke sala mambu yai ta tina ndola? Keti yandi lenda fwa kuwakana mpi ata mpidina kuguluka?’+

16 “‘“Ya kieleka mutindu mono kele na luzingu,” Yehowa Mfumu ya Kuluta Nene muntu me tuba, “yandi ta fwa na Babilone, na kisika yina ke zingaka ntotila* yina tulaka yandi* ntotila, muntu yina yandi vwezaka ndefi na yandi mpi yina yandi fwaka kuwakana na yandi.+ 17 Basoda mingi mpi bimvuka mingi ya basoda ya Farao ta sadisa yandi ve na bitumba,+ ntangu bo ta tedimisa mwa bangumba ya ntoto mpi ta tunga bibaka sambu na kufwa bantu* mingi. 18 Yandi vwezaka ndefi mpi fwaka kuwakana. Ata yandi pesaka lusilu* na yandi, yandi salaka mambu yai yonso, mpi yandi ta guluka ve.”’

19 “‘Yo yina, Yehowa Mfumu ya Kuluta Nene me tuba nde: “Ya kieleka mutindu mono kele na luzingu, mono ta pesa yandi ndola sambu yandi vwezaka ndefi na mono+ mpi fwaka kuwakana na mono. 20 Mono ta losa bukondi na mono na zulu na yandi, mpi yandi ta kangama na bukondi na mono ya kuzomba.+ Mono ta nata yandi na Babilone mpi ta samba ti yandi kuna sambu yandi kondaka kwikama na meso na mono.+ 21 Basoda yonso ya bimvuka na yandi yina ta tina ta fwa na mbele ya bitumba, mpi bayina yonso ta bikala ta panzana na bandambu yonso.*+ Ebuna beno ta zaba nde mono, Yehowa, muntu me tuba.”’+

22 “‘Yehowa Mfumu ya Kuluta Nene me tuba nde: “Mono ta baka ka-lutangu mosi na nsongi ya nti ya sedre+ ya nda mpi ta kuna yo, mono ta buka ka-lutangu mosi ya pete-pete na nsongi ya balutangu na yo ya ndendi,+ mpi mono mosi ta kuna yo na zulu ya ngumba mosi ya nda.+ 23 Mono ta kuna yo na zulu ya ngumba mosi ya nda ya Izraele; mpi balutangu na yo ta yela, yo ta buta bambuma ebuna yo ta kuma nti mosi ya nene ya sedre. Bandeke ya mutindu na mutindu ta zinga na nsi na yo mpi ta vanda na madidi ya matiti na yo. 24 Ebuna banti yonso ya mfinda ta zaba nde mono mosi, Yehowa, muntu me bwisa nti yina ya nda mpi me nangula nti yina ya nkufi;+ mono me yumisa nti ya mubisu mpi me sala nde nti ya kuyuma kubasisa bintuntu.+ Mono mosi, Yehowa, muntu me tuba mpi me sala yo.”’”