Kusonga ya Yoane
20 Ebuna mono monaka wanzio ke katuka na zulu mpi ke kwisa kukulumuka, yandi vandaka ti nsapi ya dibulu ya nda+ mpi muniololo mosi ya nene na diboko na yandi. 2 Yandi simbaka dragoni,+ nioka ya ntama,+ yina kele Diabulu+ mpi Satana,+ mpi yandi kangaka yandi bamvula 1 000. 3 Ebuna yandi losaka yandi na dibulu ya nda,+ kangaka yo, mpi tulaka kidimbu na zulu na yo, sambu yandi kusa diaka ve makanda tii kuna bamvula 1 000 ta suka. Na nima, bo fwete basisa yandi sambu na ntangu fioti.+
4 Mono monaka bakiti ya kimfumu, mpi bo pesaka kiyeka ya kusambisa na bantu yina vandaka na zulu na yo. Ee, mono monaka mioyo* ya bantu yina bo fwaka* sambu bo taka kimbangi sambu na Yezu mpi sambu bo tubaka mambu ya Nzambi, mpi bantu yina sambilaka ve mbisi ya mfinda to kifwani na yo, mpi bo bakaka ve kidimbu na mbunzu na bo mpi na diboko na bo.+ Bo vutukaka na luzingu mpi bo yalaka bonso bantotila ti Kristu+ bamvula 1 000. 5 (Bafwa+ yina bikalaka vutukaka ve na luzingu tii kuna bamvula 1 000 sukaka.) Yai lufutumuku ya ntete.+ 6 Bantu yonso yina ke baka lufutumuku ya ntete kele na kiese mpi kele santu;+ lufwa ya zole+ kele ve ti kiyeka+ na zulu na bo, kansi bo ta vanda banganga-nzambi+ ya Nzambi mpi ya Kristu, mpi bo ta yala bonso bantotila ti yandi bamvula 1 000.+
7 Ntangu bamvula 1 000 ta suka, bo ta basisa Satana na boloko na yandi, 8 mpi yandi ta basika sambu na kukusa makanda yina kele na bandambu iya ya ntoto, Gogi ti Magogi, sambu na kuvukisa bo sambu na bitumba. Ntalu na bo kele bonso zelo ya nzadi-mungwa. 9 Bo kwendaka na ntoto ya mvimba mpi bo ziungaka camp ya basantu mpi mbanza yina Nzambi ke zolaka mingi. Kansi, tiya katukaka na zulu mpi yo yokaka bo.+ 10 Mpi Diabulu yina vandaka kukusa bo, bo losaka yandi na dizanga ya tiya mpi ya sufre, kisika mbisi ya mfinda+ mpi mbikudi ya luvunu vandaka;+ bo ta monisaka bo mpasi* mpimpa ti mwini, mvula na mvula.
11 Mpi mono monaka kiti ya nene ya kimfumu ya mpembe mpi Muntu yina me vanda na zulu na yo.+ Ntoto ti zulu tinaka na ntwala na yandi,+ mpi kisika vandaka diaka ve sambu na yo. 12 Na nima, mono monaka bafwa, bantu ya mfunu mpi bantu ya kukonda mfunu, bo me telama na ntwala ya kiti ya kimfumu, mpi bo kangulaka barulo. Kansi bo kangulaka rulo ya nkaka; yo kele rulo ya luzingu.+ Bo sambisaka bafwa na kulanda mambu yina vandaka ya kusonika na barulo, na kutadila bisalu na bo.+ 13 Nzadi-mungwa vutulaka bafwa yina vandaka na kati na yo, mpi lufwa ti Maziamu* vutulaka bafwa yina vandaka na kati na yo, ebuna bo sambisaka bo, konso muntu na kutadila bisalu na yandi.+ 14 Mpi bo losaka lufwa ti Maziamu* na dizanga ya tiya.+ Dizanga yai ya tiya+ ke monisa lufwa ya zole.+ 15 Diaka, konso muntu yina bo sonikaka ve zina na yandi na mukanda ya luzingu,+ bo losaka yandi na dizanga ya tiya.+