Yeremia
31 “Na ntangu yina,” Yehowa muntu me tuba, “mono ta kuma Nzambi sambu na mabuta yonso ya Izraele, mpi bo ta kuma bantu na mono.”+
2 Yehowa ke tuba nde:
“Bantu yina gulukaka na mbele ya bitumba, Nzambi monisilaka bo ntima ya mbote na ntoto-makanga
Ntangu Izraele vandaka kukwenda na kisika na yandi ya kupema.”
3 Yehowa kwisaka kumonika na mono katuka na kisika ya ntama mpi yandi tubaka nde:
“Mono zolaka nge ti zola ya mvula na mvula.
Yo yina mono bendaka nge na mono na zola ya kwikama.*+
4 Kansi, mono ta tunga nge diaka mpi bo ta tunga nge diaka.+
O mwense ya Izraele, nge ta baka diaka bangoma na nge ya fioti
5 Nge ta kuna diaka bilanga ya vinu na bangumba ya Samaria;+
Bantu ya ke kunaka ta kuna mpi bo ta dia mbuma na yo.+
6 Sambu kilumbu ke kwisa ntangu bankengidi yina kele na bangumba ya Efra- yimi ta tuba na ndinga ya ngolo nde:
‘Beno telama, beto kwenda na Sioni, na Yehowa Nzambi na beto.’”+
7 Sambu Yehowa ke tuba nde:
“Beno boka na kiese na Yakobi.
Beno tula milolo ya kiese sambu beno me luta makanda.+
Beno zabisa yo; beno kumisa yandi mpi beno tuba nde,
‘O Yehowa, gulusa bantu na nge, bantu ya Izraele yina me bikala.’+
8 Mono ke katula bo na insi ya nordi mpi ke vutula bo.+
Mono ta katula bo na bisika ya kuluta ntama ya ntoto mpi ta vukisa bo.+
Bantu yai ta vanda na kati na bo, bifwa-meso ti bantu ya makulu-kifu,+
Nkento yina kele ti divumu mpi nkento yina ke buta, bo yonso na kimvuka.
Bo ta kwisa kuvutuka awa+ bonso dibundu ya nene.
9 Bo ta kwisa ti kudila.+
Mono ta twadisa bo ntangu bo ke bondila mono sambu mono wila bo mawa.
Sambu mono kele Tata ya Izraele, mpi Efrayimi kele mwana na mono ya ntete.”+
10 Beno wa ndinga ya Yehowa, beno makanda,
Mpi beno zabisa yo na kati ya bisanga yina kele ntama:+
“Muntu yina panzaka Izraele ta vukisa yandi.
Yandi ta keba yandi mutindu ngungudi ke kebaka bitwisi na yandi.+
11 Sambu Yehowa ta sumba diaka Yakobi+
Mpi ta katula* yandi na maboko ya muntu yina me luta yandi na ngolo.+
12 Bo ta kwisa mpi ta tula milolo ya kiese na ngumba ya Sioni+
Mpi bo ta yangalala sambu na bumbote ya* Yehowa,
Sambu na nkeni, vinu ya mpa,+ mpi mafuta,
Mpi sambu na bana ya mameme ti ya bangombe.+
13 “Na ntangu yina mwense ta kina na kiese,
Baleke ya babakala ti minunu, bo yonso na kimvuka,+ ta kina mpi na kiese.
Mono ta kumisa kudila na bo kiese.+
Mono ta lembika bo mpi mono ta pesa bo kiese na kisika ya mawa na bo.+
14 Mono ta pesa banganga-nzambi* bima mingi,*
Mpi bantu na mono ta fuluka na bumbote na mono,”+ Yehowa muntu me tuba.
15 “Yehowa ke tuba nde:
‘Ndinga ke wakana na Rama,+ bidilu mpi kudila ya ngolo:
Rashele ke dila bana na yandi.*+
Yandi me buya nde bo katula yandi mawa sambu na bana na yandi,
Sambu bo kele diaka ve.’”+
16 Yehowa ke tuba nde:
“‘Buyisa mungungu na nge sambu yo dila ve mpi meso na nge sambu yo basisa ve mansanga,
Sambu matabisi kele sambu na kisalu na nge,’ Yehowa muntu me tuba.
‘Bo ta katuka na insi ya mbeni+ mpi bo ta kwisa kuvutuka.’
17 ‘Mpi kivuvu kele sambu na makwisa na nge,’+ Yehowa muntu me tuba.
‘Bana na nge ta vutuka na teritware na bo.’”+
18 “Mono me wa kibeni kudila ya Efrayimi,
‘Nge me sungika mono, mpi mono me sungama,
Bonso mwana-ngombe yina bo me longaka ve.
Vutula mono, ebuna mono ta vutuka na luzolo yonso,
Sambu nge kele Yehowa Nzambi na mono.
19 Sambu ntangu mono vutukaka, mono waka mawa;+
Ntangu bo sadisaka mono na kubakisa, mono kudibulaka mbendi na mawa.
Mono waka nsoni mpi bo kulumusaka mono,+
Sambu mono nataka nsoni ya kileke na mono.’”
20 “Keti Efrayimi kele ve mwana ya mfunu sambu na mono, mwana ya mono ke zolaka mingi?+
Sambu konso ntangu ya mono ke tubaka mambu ya mbi sambu na yandi, mono ke landaka kuyibuka yandi.
Yo yina mawi* na mono me telama sambu na yandi.+
Mpi mono ta wila yandi kibeni mawa,” Yehowa muntu me tuba.+
21 “Kuditudila bidimbu ya nzila,
Mpi tula makunzi ya matadi.+
Tula dikebi na nzila ya nene, nzila yina nge fwete kwenda.+
Vutuka, O mwense ya Izraele, vutuka na bambanza na nge yai.
22 Tii nki ntangu nge ta vanda na keti-keti, O mwana-nkento ya kukonda kwikama?
Sambu Yehowa me ganga kima ya mpa na ntoto:
Nkento ta landa bakala ti nzala ya ngolo.”
23 Yehowa ya makesa, Nzambi ya Izraele ke tuba nde: “Bo ta tuba diaka mambu yai na insi ya Yuda mpi na bambanza na yo ntangu mono ta vutula bantu na bo yina vandaka na kimpika: ‘Bika Yehowa kusakumuna nge, O kisika ya kuzinga ya lunungu,+ O ngumba ya santu.’+ 24 Na kati na yo, Yuda ti bambanza na yo yonso ta zinga kumosi, bantu ya ke salaka bilanga mpi bantu yina ke kebaka bitwisi.+ 25 Sambu mono ta pesa kikesa na muntu* yina me lemba mpi na konso muntu* yina me konda ngolo.”+
26 Ebuna mono telamaka na mpongi, mono kangulaka meso, mpi mpongi na mono vandaka kitoko sambu na mono.
27 “Tala! Bilumbu ke kwisa,” Yehowa muntu me tuba, “ntangu mono ta kumisa mingi bantu ya nzo ya Izraele mpi bantu ya nzo ya Yuda. Mono ta kumisa mpi bitwisi na bo mingi.”+
28 “Mpi kaka mutindu mono kebaka bo sambu na kutumuna, kubwisa, kubebisa, kufwa, mpi kusala mbi,+ mutindu mosi mono ta keba bo sambu na kutunga mpi kukuna,”+ Yehowa muntu me tuba. 29 “Na bilumbu yina bo ta tuba diaka ve nde, ‘Batata diaka bambuma ya vinu ya ngani, kansi meno ya bana kumaka ngani.’*+ 30 Kansi konso muntu ta fwa sambu na kifu na yandi mosi. Konso muntu yina ke dia bambuma ya vinu ya ngani, meno na yandi mosi ta kuma ngani.”
31 “Tala! Bilumbu ke kwisa,” Yehowa muntu me tuba, “ntangu mono ta sala kuwakana ya mpa+ ti nzo ya Izraele mpi ti nzo ya Yuda. 32 Yo ta vanda ve bonso kuwakana yina mono salaka ti ba-nkaka na bo na kilumbu yina mono simbaka bo na diboko sambu na kubasisa bo na insi ya Ezipte,+ ‘kuwakana na mono yina bo fwaka,+ ata mono vandaka mfumu na bo ya kieleka,’* Yehowa muntu me tuba.”
33 “Sambu yai kuwakana yina mono ta sala ti nzo ya Izraele na nima ya bilumbu yina,” Yehowa muntu me tuba. “Mono ta tula nsiku na mono na kati na bo,+ mpi mono ta sonika yo na ntima na bo.+ Mono ta kuma Nzambi na bo, ebuna bo ta kuma bantu na mono.”+
34 “Mpi muntu mosi ve ta longa diaka nkweno na yandi mpi mpangi na yandi nde, ‘Zaba Yehowa!’+ sambu bo yonso ta zaba mono, yantika na muntu ya kukonda mfunu tii na muntu ya mfunu mingi na kati na bo,”+ Yehowa muntu me tuba. “Sambu mono ta lolula kifu na bo, mpi mono ta yibuka diaka ve masumu na bo.”+
35 Yai mambu yina Yehowa ke tuba,
Yandi muntu yina ke pesaka ntangu sambu yo pesa nsemo na mwini,
Bansiku ya ngonda mpi ya bambwetete sambu yo pesa nsemo na mpimpa,
Muntu yina ke nikisaka nzadi-mungwa mpi ke salaka nde bitembo na yo kutula makelele,
Yina zina na yandi kele Yehowa ya makesa:+
36 “‘Kana bansiku yai fwete mana ngala,’ Yehowa muntu me tuba,
‘Na ntangu yo yina bana ya Izraele zolaka kuvanda diaka ve bonso dikanda na ntwala na mono ntangu yonso.’”+
37 Yehowa ke tuba nde: “‘Kana bo lenda tesa zulu mpi kana bo lenda tala bafondasio ya ntoto na nsi, na ntangu yo yina mono zolaka kubuya bana yonso ya Izraele sambu na mambu yonso ya bo me sala,’ Yehowa muntu me tuba.”+
38 “Tala! Bilumbu ke kwisa,” Yehowa muntu me tuba, “ntangu bo ta tungila+ Yehowa mbanza katuka na Nzo-Zulu ya Ananele+ tii na Kielo ya Kinkonko.+ 39 Mpi nsinga ya kutesila+ ta kwenda mbala mosi tii na ngumba ya fioti ya Garebi, mpi yo ta baluka na ndambu ya Goa. 40 Ebuna muwanda* ya mvimba ya bamvumbi ti ya putulu ya tiya* mpi bilanga yonso tii na Muwanda ya Kidroni,+ tii na kinkonko ya Kielo ya Bampunda+ na ndambu ya esti, ta vanda kima ya santu sambu na Yehowa.+ bo ta tumuna yo diaka ve mpi bo ta bwisa yo diaka ve.”