Bo Me Kotaka Boloko Sambu na Lukwikilu na Bo—Crimée

Bamfumu ya luyalu ya Russie ke telemina Bambangi ya Yehowa mpi bo ke sadila bo mambu na nku. Mambu yai me kuma mpi kusalama na Crimée. Na insi Russie, luyalu me buya bimvuka yina ke monisaka (entités juridiques) Bambangi ya Yehowa mpi me monisa na pwelele yonso nde bo ke zola nde Bambangi ya Yehowa kusala diaka ve mambu ya lusambu ya bo ke salaka kukonda kutula mavwanga na insi yai. Banda luyalu ya insi yai me buyisaka mambu ya lusambu ya Bambangi ya Yehowa na 2017, bapolisi ya luyalu me kotaka na kingolo-ngolo na bisika yonso yina Bambangi ya Yehowa vandaka kusala mambu ya lusambu na insi Russie. Bo kangaka Bambangi ya Yehowa mingi kibeni mpi bo tulaka bo na boloko. Bo me kuma mpi kusala Bambangi ya Yehowa yina ke zingaka na Crimée mambu ya mutindu yai.

Bapolisi Me Kita na Mbanza Djankoï na Novembri 2018

Na Crimée, mbala ya ntete ya bapolisi mpi basoda kotaka na ngolo na banzo ya Bambangi ya Yehowa vandaka na Kiya 15 novembre 2018 na Djankoï. Bapolisi mpi basoda yango vandaka kiteso ya 200 mpi bo kotaka na ngolo na mabuta ya Bambangi ya Yehowa, bisika yina bimvuka ya fioti-fioti yina Bambangi ya Yehowa vandaka me vukana sambu na kutanga Biblia mpi kutubila mambu ya bo me tanga. Bapolisi kiteso ya 35 ya vandaka ti luse ya kufika bilele ti minduki na maboko kotaka na ngolo na nzo ya mpangi Sergueï Filatov. Kuna Bambangi ya Yehowa sambanu vandaka me vukana. Bambangi ya Yehowa waka boma ya ngolo mutindu bo kotilaka bo. Bapolisi kangimisaka bakala mosi ya bamvula 78 na kibaka, bo losaka yandi na ntoto mpi bo tulaka yandi bakraka. Na nima bo bulaka yandi ngolo. Mutindu bo bulaka yandi ngolo salaka nde bo nata yandi ntinu-ntinu na lupitalu. Babakala ya nkaka zole waka mpi boma ya ngolo. Boma yina salaka nde tension na bo kumata ngolo mpi bo nataka bo ntinu-ntinu na lupitalu. Bapolisi kotaka mpi na nzo ya toko mosi ya nkento. Yandi vandaka ti divumu. Yo pesaka beto mpasi na kuzaba nde toko yango butaka mwana ya kufwa sambu bapolisi kotaka na nzo na yandi.

Bapolisi kotaka mpi na nzo ya M. Filatov. Bo fundaka yandi na kutadila artikle 282.2(1) ya Nsiku ya insi Russie na Yina Me Tala Mambu ya Kusambisa (Code pénal russe). Bo fundaka yandi nde yandi yidikaka mambu sambu “kimvuka ya bantu ngolo” kusala bisalu na bo. Na Kiya 5 mars 2020, tribinale ya distrike ya Crimée zengilaka yandi boloko ya bamvula sambanu. Na nima ya lukanu yina, bo nataka yandi mbala mosi na boloko. Na Kitanu 20 novembre 2020, baavoka ya Filatov sonikilaka Tribinale ya Eropa Yina Ke Tadilaka Banswa ya Bantu (Cour européenne des droits de l’homme). Filatov me kwelaka mpi yandi kele ti bana iya. Bana na yandi zole kele ntete bana ya fioti na kutadila nsiku ya leta.

Bapolisi Me Kota mpi na Ngolo na Banzo ya Nkaka ya Bambangi ya Yehowa

Na Kitatu 20 mars 2019, bapolisi kotaka na banzo nana ya Bambangi ya Yehowa na Aloupka mpi na Ialta. Bambanza yai zole kele na Crimée. Ntangu bo vandaka kusala baanketi na banzo yina, bo botulaka Babiblia, baordinatere mpi baapareyi ya nkaka. Bo fundaka Artem Guerasimov nde yandi ke yidikaka mambu sambu kimvuka mosi ya bantu ya ntu-ngolo kusala bisalu na bo, kisi ve yandi vukanaka ti bantu ya nkaka sambu bo tubila mambu ya kele na Biblia. Bo zengilaka yandi boloko ya bamvula sambanu. Bo ta basisa yandi na boloko na juin 2026.

Na Kizole 4 juin 2019 na nkokila, bapolisi kotaka na banzo kumi ya Bambangi ya Yehowa na Sébastopol. Bo kangaka Viktor Stachevski. Na nima, bo yambulaka yandi kansi bo songaka yandi nde yandi fwete katuka ve mbanza yina. Na nima bo fundaka yandi nde yandi ke yidikaka mambu sambu kimvuka mosi ya bantu ya ntu-ngolo kusala bisalu na bo. Bo zengilaka yandi boloko ya bamvula sambanu ti ndambu. Bo ta basisa yandi na juillet 2027.

Na Kiya 1^er octobre 2020, bapolisi kotaka na ngolo na banzo uvwa ya Bambangi ya Yehowa na mbanza Sébastopol na Crimée. Bo kumaka kulandila Igor Shmidt. Na Kitanu 22 octobre 2021, tribinale ya distrike ya Gagarine na Sébastopol zengaka nde Shmidt fwaka nsiku ya leta. Yo yina tribinale zengilaka yandi boloko ya bamvula sambanu.

Mutindu Mambu Salamaka

1. 22 octobre 2021

   Bo zengilaka Shmidt boloko ya bamvula sambanu.

   1^er octobre 2020

2. Bapolisi kotaka na banzo uvwa ya Bambangi ya Yehowa na Sébastopol. Bo kangaka Igor Shmidt mpi bo tulaka yandi na boloko sambu na mwa ntangu.

3. 4 juin 2020

   Tribinale ya Nene ya République de Crimée zengilaka Guerasimov boloko ya bamvula sambanu.

4. 5 mars 2020

   Bo zengilaka Filatov boloko ya bamvula sambanu. Bo tulaka yandi na boloko (établissement pénitentiaire à régime ordinaire).

5. 4 juin 2019

   Bapolisi kotaka na ngolo na banzo kumi ya Bambangi ya Yehowa na Sébastopol. Bo fundaka Stachevski nde yandi ke yidikaka mambu sambu kimvuka mosi ya bantu ya ntu-ngolo kusala bisalu na bo.

6. 20 mars 2019

   Bapolisi kotaka na ngolo na banzo nana ya Bambangi ya Yehowa na Aloupka mpi na Ialta. Bo yulaka Guerasimov bangiufula. Na nima bo fundaka yandi nde yandi ke yidikaka mambu sambu kimvuka mosi ya bantu ya ntu-ngolo kusala bisalu na bo.

7. 15 novembre 2018

   Bapolisi mpi basoda kuluta 200 kotaka na ngolo na banzo nana ya Bambangi ya Yehowa, mu mbandu na nzo ya Filatov.