Luzitu Sambu na Bantu ya Nkaka Me Kwendaka na Wapi?

**SAMBU NA NKI KUZITISA BANTU YA NKAKA KELE MFUNU?**

Kana beto ke zitisa bantu ya nkaka, yo lenda sadisa sambu diambu mosi kubasisa ve mavwanga ya ngolo.

Kingana mosi ya Biblia ke tuba nde: “Mvutu ya pima ke manisaka nganzi, kansi ngogo ya nku ke tedimisaka makasi.” (Bingana 15:1) Kutuba mpi kusala mambu ya kukonda luzitu kele bonso kuyika mafuta na tiya mpi mbala mingi, yo ke bebisaka kibeni mambu.
Yezu tubaka nde: “Munoko ke tubaka mambu yina me fuluka na ntima.” (Matayo 12:34) Kutuba mambu ya kukonda luzitu lenda monisa kibeni mutindu beto ke tadilaka bantu yina mpusu na bo ya nitu, dikanda na bo, insi na bo to luzingu na bo kele ve bonso ya beto.

Na nsosa mosi ya bo me katuka kusala ntama ve na bantu kuluta 32 000 ya bansi 28, bantu kuluta 65% na kati na bo tubaka nde bo me bikaka ntete ve kumona kukonda luzitu ya mutindu yai.

MAMBU YA NGE LENDA SALA

Yo vanda na nzo-nkanda to na kisika ya kisalu, zitisa bantu yonso ata nge ke ndima ve bangindu na bo. Sosa kuzaba mambu na bo ya nkaka yina nge mpi nge lenda ndima. Yo ta sadisa nge na kutuba ve mambu ya mbi sambu na bo to na kusambisa bo ve.

“Beno bika kusambisa sambu bo sambisa beno ve.”—Matayo 7:1.

Sadila bantu ya nkaka mambu mutindu nge ke zolaka nde bantu kusadila nge mambu. Kana nge kele ntima-mbote ti bantu ya nkaka mpi nge ke sadila bo mambu na mutindu ya mbote, ntembe kele ve nde bo mpi, bo ta sadila nge mambu na mutindu ya mbote.

“Mutindu beno ke zola nde bantu kusadila beno mambu, beno sala mutindu mosi sambu na bo.”—Luka 6:31.

Lolula na ntima ya mvimba. Vanda ti kundima nde muntu yina me pesa nge makasi salaka yo ve na luzolo, mpi lolula yandi sambu na mambu ya mbi yina yandi tubaka to yandi salaka.

“Mayele ya kubakisa mambu mbote-mbote ya muntu ke kulumusaka kibeni makasi na yandi, mpi kitoko na yandi kele kulolula mbi ya bo me sala yandi.”—Bingana 19:11.

Kati ya Nzo ya Kimfumu ya Bambangi ya Yehowa na ntwala nde lukutakanu kuyantika. Bantu ya bamvula ya kuswaswana mpi ya me katuka na bisika ya mutindu na mutindu ke pesana mbote mpi ke solula na kiese.

Kati ya Nzo mosi ya Kimfumu ya Bambangi ya Yehowa na ntwala nde lukutakanu kuyantika. Bantu ya bamvula ya kuswaswana mpi ya me katuka na bisika ya mutindu na mutindu ke pesana mbote mpi ke solula na kiese.

MAMBU YA BETO KE SALAKA

Na bisika yina Bambangi ya Yehowa ke zingaka mpi ke salaka bisalu, bo ke zitisaka bantu ya nkaka mpi bo ke sadisaka bantu na kuzitisa mpi bantu ya nkaka.

Beto ke longukaka Biblia ya ofele ti bantu yonso. Ata mpidina, beto ke pusaka bo ve na ngolo na kundima mambu ya beto ke kwikilaka to bangindu na beto. Kansi, beto ke sadilaka ndongisila ya Biblia yina ke lombaka beto na kulonga nsangu ya mbote “ti mawete mpi luzitu ya mingi.”—1 Piere 3:15; 2 Timoteo 2:24.

Beto ke buyaka kuvanda ti bangindu ya mbi sambu na bantu ya nkaka mpi na balukutakanu na beto, beto ke yambaka bantu ya mutindu na mutindu yina ke zolaka kulonguka Biblia. Beto ke kangaka ve bantu nzila ya kusala luzolo na bo mpi beto ke ‘zitisaka bantu yonso.’—1 Piere 2:17, Bible en Kituba.

Beto ke zitisaka bamfumu ya bisika yina beto ke zingaka. (Baroma 13:1) Beto ke lemfukaka na bansiku ya Leta mpi beto ke futaka mpaku. Diaka, ata beto ke kotaka ve na mambu ya politiki, beto ke zitisaka banswa yina bantu ya nkaka ke vandaka ti yo ya kubaka bo mosi balukanu na mambu ya politiki.