INKI BETO LENDA SALA KANA NTALU YA BIMA KE MATA?

Kabaka

Kana nge ke mona mpasi sambu ntalu ya bima ke mata, nge lenda yindula nde yo ta vandila nge mpasi na kukabila bantu ya nkaka. Kansi na kutuba masonga kukaba lenda sadisa nge mingi. Nge lenda bumba mbongo ata nge ke kabila bantu ya nkaka.

SAMBU NA NKI YO KELE MFUNU?

Kukabila bantu ya nkaka ata bima ya fioti, ke pesaka beto kiese. Minganga mingi me monisaka nde kukabila bantu ya nkaka ke sadisaka beto na kuvanda ti sante ya mbote. Mu mbandu yo lenda sala nde beto kudiyangisa ve mingi, beto vanda ve ti basusi mingi mpi beto bela ve bamaladi ya nkaka mu mbandu tension. Yo lenda sala mpi nde beto kuma kulala mbote.

“Kiese ke vandaka mingi na kupesa, kansi na kubaka kiese ke vandaka fioti.”—Bisalu 20:35.

Kana beto ke kabila bantu ya nkaka, yo vanda mbongo to bima ya nkaka yo ta vandila beto ve mpasi na kundima lusadisu na bo. Howard yina ke zingaka na Angleterre ke tuba nde: “Mono ti nkento na mono ke sosaka mitindu ya kukabila bantu ya nkaka mpi ya kusadisa bo. Yo ke salaka nde beto ndima kukonda mpasi lusadisu ya bantu ya nkaka.” Ya kieleka, bantu ya ke kabaka na ntima ya mvimba ke salaka yo ve ti ngindu nde bantu kuvutudila bo. Kansi bo lenda zwa banduku ya mbote yina ta sadisa bo na luzolo yonso na ntangu ya mpasi.

“Beno vanda ti kikalulu ya kupesa, mpi bantu ta pesa beno.”—Luka 6:38.

INKI NGE LENDA SALA?

Kabilaka bantu ya nkaka. Ata nge kele ti bima fioti, nge lenda vanda kaka ti kima ya kukaba. Yo lenda vanda ata mwa madia. Duncan mpi dibuta na yandi ke zingaka na Ouganda. Bo kele bansukami kansi bo ke zolaka kukabila bantu ya nkaka. Duncan ke tuba nde: “Na balumingu, beto ke bingisaka muntu na kudia ti beto mwa madia. Beto ke sepelaka kulutisa ntangu ti bantu ya nkaka.”

Ntangu nge ke kabila bantu ya nkaka, nge fwete tadila mambu mbote. Nge fwete kaba ve mingi na mpila nde dibuta na nge kukonda bima ya bo kele ti yo mfunu.—Yobi 17:5.

Meka kusala diambu yai: Pesa muntu mosi mwa kima ya kudia to ya kunwa. Kana nge kele ti bima yina nge ke sadilaka diaka ve, nge lenda pesa yo na banduku to bantu ya ke zingaka pene-pene ti nge, bayina ta vanda ti mfunu na yo.

Kaba na mitindu ya nkaka. Bakado ya nkaka ya kuluta mbote ke lombaka kaka ve mbongo. Mu mbandu, beto lenda sadila ntangu na beto sambu na kutudila bantu ya nkaka dikebi mpi kusadisa bo. Nkutu bangogo ya mbote lenda vanda mpi dikabu. Yo yina, songa bantu ya nkaka nde nge ke sepelaka ti bo mpi ke zolaka bo.

Meka kusala diambu yai: Sadisa bantu ya nkaka na bisalu ya nzo, kuyidika bima ya me beba na nzo to bisalu ya nkaka. Sonikila nduku na nge mukanda to message ata sambu na kusonga yandi kaka nde nge ke yibuka yandi.

Kana nge ke ti kikalulu ya kukaba, nge ta baka mambote mingi.

“Beno vila ve na kusala mambu ya mbote mpi na kukabula ti bankaka bima yina beno kele na yo.”—Baebreo 13:16.

Bakala mosi ti nkento na yandi ke sadisa mama mosi ya mununu na kukombila yandi lupangu. Yandi ke pesa bo kima ya kunwa ntangu bo ke komba mpi ke vukisa matiti.