Kapu 104

Ndinga ya Nzambi Mewakana Mbala ya Tatu

NTANGU yandi kele na tempelo, Yezu mekatuka kumonisa mawa sambu na lufwa yina mebika fyoti nde yandi kukutana na yau. Yandi kekudibanza mingi sambu na lukumu ya Tata na yandi, yau yina yandi kesamba nde: “Tata, kumisa zina na nge!”

Na ntangu yandi metuba mpila yina, ndinga ya ngolo mekatuka na zulu, na kutubaka nde: “Mono me kumisa yo, ebuna mono ta kumisa yo diaka.”

Bibuka yina kele ya kutelama na nzyunga keyituka. Bamosi meyantika na kutuba nde: “Wanzio me kwisa kutubila yandi mambu.” Bankaka ketuba nde yina kele nzasi. Kansi ya kyeleka, kele Yehowa Nzambi muntu kutubaka! Kansi, yai kele ve mbala ya ntete ndinga ya Nzambi mewakana sambu na yina metala Yezu.

Na mbotika ya Yezu, bamvula tatu ti ndambu na ntwala, Yoane Mbotiki kuwaka Nzambi ketuba sambu na Yezu nde: “Yai kele Mwana na mono ya mono kezolaka mingi. Mono kele na kiese mingi sambu na yandi.” Na nima, mwa ntangu fyoti na nima ya Paki yina kulutaka, ntangu Yezu kukitukaka na ntwala na bau, Yakobo, Yoane, ti Piere kuwaka ndinga ketuba nde: “Yai kele Mwana na mono ya mono ke zolaka mingi; mono ke na kiese mingi sambu na yandi. Beno wila yandi.” Mpi ntangu yai, na mbala ya tatu, na Nisani 10, bilumbu iya na ntwala ya lufwa ya Yezu, bantu mewa dyaka ndinga ya Nzambi. Kansi ntangu yai, Yehowa ketuba na mpila nde mbidi ya bantu lenda kuwa!

Yezu ketendula nde: “Ndinga yina me tuba sambu na mono ve, kansi sambu na beno.” Yau kepesa nzikisa nde Yezu kele kibeni Mwana ya Nzambi, Mesia ya kusilamaka. Yezu kelanda nde: “Ntangu me lunga sesepi yai, Nzambi ke zengila bantu ya nsi-ntoto [nkanu, NW]; ntangu yai mpi, Nzambi ke kula mfumu ya nsi-ntoto yai.” Ya kyeleka, nkadilu ya Yezu ya kwikama kendimisa nde Satana Dyabulu, mfumu ya inza, fwete “kukulama,” kugondama.

Na kutubilaka malanda ya lufwa na yandi yina mefinama, Yezu ketuba nde: “Ebuna mono, ntangu Nzambi ta tombula mono na zulu, mono ta benda bantu yonso na kwisa na mono.” Lufwa na yandi kele kubela ve ata fyoti, sambu na nsadisa na yau, yandi tabenda bantu ya nkaka na kwisa na yandi mosi na mpila nde bau lenda kuzwa luzingu ya mvula na mvula.

Kansi bantu mebuya nde: “Na mikanda na beto ya Bansiku, beto me longukaka nde Mesia ta zingaka mvula na mvula. Ebuna nki mutindu nge ke tuba nde Nzambi ta tombula Mwana-muntu na zulu? Mwana-muntu yina nani?”

Ata nkutu banzikisa yonso kele, ti yina ya ndinga ya yandi mosi Nzambi, bamingi kekwikila ve nde Yezu kele Mwana-muntu ya kyeleka, Mesia ya kusilamaka. Kansi, mpila yandi kusalaka bangonda sambanu na ntwala na Nkinsi ya Bisasa, Yezu mekudimonisa dyaka bonso “mwini” mpi yandi mesyamisa bawi na yandi nde: “Beno ndima mwini ntangu beno ke na yo, sambu beno kituka [bana, NW] ya mwini.” Na nima ya kutuba mambu yai, Yezu mekwenda mpi mebumbana, na ntembe ve sambu luzingu na yandi kele na kigonsa.

Kukonda ya lukwikilu ya Bayuda na Yezu kelungisa bangogo ya Yezaya yina metala ‘bantu yina meso mefwaka mpi bantima na bau mekumaka ngolo na mpila nde bau kubalula ve ntima sambu na kubeluka.’ Yezaya kumonaka bibansala ya zulu ya Yehowa na mbona-meso, ti Yezu na lweka ya Yehowa, na kati ya nkembo ya yandi kuvandaka na yau na ntwala ya kukuma muntu. Kansi, Bayuda, na ndungisa ya mambu yina Yezaya kusonikaka, mebuya na ntu-ngolo yonso nzikisa ya kemonisa nde Muntu yai kele Ngulusi na bau ya kusilamaka.

Na ndambu ya nkaka, bantu mingi, ata nkutu bamfumu (na ntembe ve bamambere ya kinzonzi ya nene ya Bayuda to Sanedreni) kekwikila na Yezu. Nikodemo ti Arimatea kele na kati ya bamfumu yango. Kansi, ntangu yai, bamfumu yango metuba ve lukwikilu na bau, sambu na boma nde bau takatulama na bisika na bau na sinagoga. Bau mekudikandikila kibeni bima mingi!

Yezu melanda na kutuba nde: “Muntu yina ke ndimaka mono, yandi ke ndimaka kaka mono ve, kansi yandi ke ndimaka mpi muntu yina tindaka mono. . . . Kana muntu ke waka malongi na mono kansi yandi ke landaka yo ve, mono ve muntu ta vanda zuzi na yandi, sambu mono kwisaka ve na kuzengila bantu ndola, kansi sambu na kugulusa bo. . . . Malongi ya mono ke pesaka ta vanda bonso zuzi na yandi na kilumbu ya nsuka.”

Zola ya Yehowa sambu na inza ya bantu kupusaka yandi na kutinda Yezu na mpila nde bayina kekwikila na yandi lenda kuguluka. Bantu taguluka to ve kana bau kelemfuka to ve na mambu ya Nzambi kutumaka Yezu na kutuba. Mfundusu tasalama na “kilumbu ya nsuka,” na Luyalu ya Kristu ya Bamvula Funda.

Yezu kesukisa na kutubaka nde: “Mono ke tubaka ve na kiyeka na mono mosi, kansi Tata yina tindaka mono, yandi songaka mono mambu yina ya mono fweti tuba ti mambu ya mono fweti longa. Mono zaba nde mambu yina ya Tata ke songaka, yo ke pesaka moyo ya mvula na mvula. Yo yina, mambu yai ya mono ke tubaka, mono ke tubaka yo mutindu yandi songaka mono.” Yoane 12:​28-50; 19:​38, 39; Matayo 3:17; 17:5; Yezaya 6:​1, 8-10.

▪ Tanga baokazyo tatu yina ndinga ya Nzambi kuwakanaka sambu na yina metala Yezu?

▪ Inki mutindu mbikudi Yezaya kumonaka nkembo ya Yezu?

▪ Inki bamfumu kekwikilaka na Yezu, kansi sambu na inki bau metuba yau ve pwelele?

▪ “Kilumbu ya nsuka” kele inki, mpi bantu tasambisama na inki lufulu?