Kukwisa ya Mbote na Nzo-Nkanda ya Kisalu ya Teokrasi

NA NTOTO ya mvimba, na bansi kuluta 200, konso mposo bana ya nzo-nkanda mingi kebakaka mambote ya malongi yina bo kepesaka na Nzo-Nkanda ya Kisalu ya Teokrasi. Mingi kele bantu ya mpa. Bankaka mekotaka na nzo-nkanda yai bamvula mingi meluta. Nzo-Nkanda yai kesalamaka na bisika kuluta mafunda makumi nana na uvwa. Na konso kisika ya nge kezingaka na ntoto, nge lenda baka malongi ya mutindu mosi. Bantu ya bamvula yonso, ya bandinga yonso, ya melongukaka mingi to ve kebakaka malongi yai ya Nzambi kepesaka, ya ofele.

Ntangu bo kangulaka nzo-nkanda yai mbala ya ntete na mabundu ya Bambangi ya Yehowa na mvu 1943, bo tendulaka lukanu na yo na bangogo yai: “Sambu na kubongisa ‘babakala yonso ya kwikama,’ bayina mewaka Ndinga ya Nzambi mpi mekwikilaka na yo, sambu bo ‘kuka na kulonga bankaka.’ . . . sambu na kukumisa konso muntu . . . ti mayele ya kuzabisa bantu yonso kivuvu yina yandi kele na yo na ntima.” (Cours pour le ministère théocratique, lut. 4) Lukanu ya nzo-nkanda yai kele kaka mutindu mosi bubu yai.

Inki kima kibeni ya meluta mbote yina konso muntu na kati na beto lenda sala ti dikabu ya kutuba yina Nzambi mepesaka beto? Biblia kepesa mvutu nde: “Yonso yina ke na moyo kupesa lukumu na Mfumu Nzambi!” (Nk. 150:6) Kana beto sala yo, beto kesepidisa ntima ya Tata na beto yina kele na zulu. Beto kesonga yandi nde beto kepesa mersi sambu na ntima ya mbote mpi zola na yandi. Yo yina, mpila ya kuyituka kele ve kana Biblia kesyamisaka ntangu yonso Bakristu nde bo “pesa lukumu na Nzambi; lukumu yina kele bonso makabu ya beto ke pesa Nzambi na zina ya Yesu. Disongidila nde beto fweti lemba ve na kukumisa zina ya Nzambi na munoko na beto”! (Baeb. 13:15) Beto kele na lukanu ya kusadisa nge na kutomisa mayele na nge ya kusadila makabu yina Nzambi mepesaka nge sambu na kukumisa Yehowa. Yo yina, beto kezodila nge kukwisa ya mbote bonso longoki na Nzo-Nkanda ya Kisalu ya Teokrasi.

Ata nzo-nkanda ketulaka dikebi mingi na kutanga na ntwala ya bantu mpi na mayele ya kutuba mpi ya kulonga mbote, mambote ya Nzo-Nkanda ya Kisalu ya Teokrasi kepesaka kesukaka ve kaka na mambu yai. Kana nge mekota na nzo-nkanda yango, yo tasadisa nge na kuyedisa bikalulu yai ya mfunu bonso kutanga ya muntu yandi mosi, kuwidikila mpi kuyibuka, kulonguka, kuzaba kusosa-sosa, kutadila mbote-mbote mpi kuyidika, kusolula, kupesa bamvutu na bangyufula, mpi kusonika bangindu na nge na papie. Nge tasadilaka Biblia yo mosi ti mikanda yina ketendulaka Biblia sambu na kulonguka, kupesa bakomantere, mpi kusala bansonga yina bo kepesaka na nzo-nkanda yai. Kana nge fulusa mabanza na nge ti bakyeleka ya mfunu yina kele na Ndinga ya Nzambi, nge talonguka na kuyindula bangindu ya Nzambi. Yo tasadisa nge mingi na luzingu na nge ya mvimba! Sambu na yina metala valere ya Ndinga ya Nzambi, William Lyon Phelps, longi mosi ya iniversite ya mvu-nkama ya 20, kusonikaka nde: “Konso muntu yina mezaba mbote Biblia bo lenda tuba nde yandi melongukaka. . . . Mono keyindula nde kuzaba Biblia kukonda kulonguka na nzo-nkanda mosi ya nene kele mfunu mingi kuluta kulonguka na nzo-nkanda mosi ya nene kukonda kuzaba Biblia.”

Mutindu ya Kubaka Mambote Mingi

Yo kele pwelele nde, sambu na kubaka mambote mingi ya malongi yina bo kepesa na Nzo-Nkanda ya Kisalu ya Teokrasi, nge mosi, mwana nzo-nkanda, fwete sala kikesa mingi. Ntumwa Polo kulongisilaka Timoteo, nduku na yandi Mukristu, nde: “Nge sala bisalu yina mbote-mbote, nge kudipesa mvimba na yo, ebuna bantu yonso ta mona nde bisalu na nge ke kwenda na ntwala.” (1 Tim. 4:15) Inki mutindu nge lenda kudipesa na yo?

Kana mpila kele, kwendaka na Nzo-Nkanda ya Kisalu ya Teokrasi konso mposo. Sadilaka mbote mukanda Baka Mambote na Malongi ya Nzo-Nkanda ya Kisalu ya Teokrasi. Sonikisa zina na nge na kisika ya bo mebikisilaka yo na lutiti yina kele na ntu-dyambu. Nataka mukanda yai konso ntangu ya nge mekwenda na nzo-nkanda. Mukanda yai kele mpi ti bisika ya nge lenda sonika banoti na nge mosi. Kana nge metanga bangindu ya mfunu ya nge kemona nde yo tasadisa nge, tenda bikokila na nsi na yo. Sadila bisika yina kele ve na bisono yina kele na lweka sambu na kusonika mambu ya mfunu yina nge melonguka na masolo yina mesalama na nzo-nkanda.

Bo ketindaka na kingenga kopi mosi ya manaka yina Nzo-Nkanda ya Kisalu ya Teokrasi tasadila. Manaka yango tatubila mpi mutindu nzo-nkanda tasalamaka. Yo tavanda mbote nde nge bumba manaka na nge na kati ya mukanda yai, kisika nge lenda zwa yo kukonda mpasi.

Na ntangu nge kebongisa masolo ya nzo-nkanda ya konso mposo, kuvila ve nde Biblia kele mukanda ya ntete ya kusadila. Tanga ntetentete kitini ya Biblia yina bo pesaka sambu na mposo yina. Kana nge takuka mpi kutanga na ntwala malongi ya masolo yankaka yina kele na manaka, yo tavanda mbote.

Na ntangu nzo-nkanda kesalama, ntangu yankaka bo lenda lomba bawi na kupesa bamvutu. Sadila mbote baokazio yai. Kupesa bamvutu na masolo ya mutindu yai kesadisaka mingi na kuyibuka mambu yina nge kewa mpi na kusadila yo na luzingu na nge.

Ya kyeleka, bana ya nzo-nkanda yonso tavanda na baokazio ya kusala badevware to bansonga na ntwala ya dibundu. Sadila mbote baokazio yai yonso. Kudipesa mpenza na kutomisa konso kikalulu ya mutubi yina bo melomba nge na kusala. Bo tapesa nge bandongisila ti dibanza ya kusadisa nge sambu nge landa na kuyela. Ndima lusadisu yina bo kepesa nge. Na mukanda na nge, sonika bangindu yina kemonisa mambu yina nge fwete sala sambu na kutomisa. Sambu yo kele mpasi nde muntu yandi mosi kudimona mutindu bantu yankaka kemona yandi, bangindu mpi bandongisila ya zola yina mekatuka na Biblia lenda sadisa nge mpenza na kuyela. Yo kele kyeleka ata nge mesonikisaka na nzo-nkanda bamvula mingi meluta.​—Bing. 1:5.

Keti nge kezola kuyela nswalu? Kana nge mosi kumonisa mpusa yango, yo lenda salama. Longukaka na ntwala malongi yina bo ketubila na devware ya konso mwana ya nzo-nkanda. Kana bo kele na mfunu ya mutubi yina lenda yinga muntu yina mekwisa ve, nge takuka kusala bonso volontere, ebuna yo tasadisa nge na kuyikana na kusala badevware. Ntangu bankaka kesala badevware, widikilaka mbote nki mutindu bo kesala yo. Beto kelongukaka mambu mingi na bantu yankaka, ye bo mpi kelongukaka na beto.

Dyaka, kana mpila kele, nge lenda yela nswalu kana nge kelonguka mukanda yai na ntwala nge mosi. Na nima ya kulonguka mbote mambu yina kele na malongi 15 yina melanda, landa kuyela na nge na nsadisa ya “Manaka Sambu na Kuyedisa Mayele na Nge Bonso Mutubi mpi Longi” yina keyantika na lutiti 78. Ntetentete, longuka konso dilongi, mpi sala badevware yina kewakana ti dilongi yango. Sadila mambu ya nge melonguka na kisalu na nge ya kusamuna. Kana nge kesala mpidina, yo lenda sadisa nge na kuyela mbote bonso mutubi mpi longi ya Ndinga ya Nzambi.

Malongi ya nge kebaka na Nzo-Nkanda ya Kisalu ya Teokrasi tasadisa nge na kuzaba nki mambu kele mfunu mingi na luzingu. Mutindu beto kezingaka sambu na luzolo ya Nzambi, kupesa yandi lukumu kele kubakisa sambu na nki yandi salaka beto. Yehowa mefwana na kubaka lukumu ya kuluta mbote. (Kus. 4:11) Malongi yina beto kebaka na nzo-nkanda lenda sadisa beto na kulungisa lukanu yai na mpila nde beto lenda yantika kuyindula mbote, kusala mambu na mayele, mpi kuzabisa bantu yankaka bakyeleka ya kitoko yina kele na Ndinga ya kupemama ya Nzambi.