Kupesa Maboko na Kisalu ya Kimfumu na Dibundu mpi na Ntoto ya Mvimba

SAMBU na kulungisa mambu yina Yezu tubaka sambu na bilumbu ya nsuka, Bambangi ya Yehowa ke longaka nsangu ya mbote “tii na kisika ya kuluta ntama ya ntoto.” (Bis. 1:8; Mat. 24:14) Sambu na kusala yo, beto ke pesaka na luzolo yonso ntangu mpi ngolo na beto sambu na kulonga bantu mambu ya Nzambi. Beto ke tulaka ntima nde Yehowa ke sadisaka banduku na yandi ya kisalu, yo yina beto ke landaka kutula Kimfumu ya Nzambi na kisika ya ntete na luzingu na beto. (Mat. 6:25-34; 1 Bak. 3:5-9) Mambote ya beto me bakaka ke monisa pwelele nde Yehowa ke ndimaka mpi ke sakumunaka beto.

MAKABU SAMBU NA MAMBOTE YA KIMFUMU NA NTOTO YA MVIMBA

² Ntangu bantu ya nkaka ke monaka mutindu beto ke samunaka mpi ke kabulaka Babiblia ti mikanda yina ke tendulaka Biblia ya ofele, bo ke yulaka nde: “Na wapi beno ke bakaka mbongo ya kusala bisalu yai yonso?” Ya kieleka, kuniema mpi kubasisa Babiblia mpi mikanda yina ke tendulaka Biblia ke lombaka mbongo. Kutunga mpi kuyidika Babetele, bisika bampangi ke salaka na bamasini ya kuniema mikanda, bisika bo ke twadisaka kisalu ya kusamuna mpi ke salaka mambu ya nkaka sambu nsangu ya mbote kukwenda na ntwala, ke lombaka mpi mbongo mingi. Diaka, bo ke pesaka bankengi ya nziunga, bamisionere yina ke salaka na teritware, bapasudi-nzila ya nene mpi bampangi ya nkaka yina ke salaka kisalu ya sipesiali ya ntangu yonso mwa lusadisu ya kinsuni sambu na kusadisa bo na kulanda kusala kisalu na bo. Yo kele pwelele nde kisalu ya kulonga nsangu ya mbote na bilumbu na beto ke lombaka mbongo mingi, yo vanda na dibundu na beto to na ntoto ya mvimba. Mbongo yina yonso ke katukaka na wapi?

³ Bantu mingi yina ke sepelaka ti kisalu ya kulonga bantu Biblia yina Bambangi ya Yehowa ke salaka, ke sepelaka kupesa makabu sambu na kisalu yina ke salama na ntoto ya mvimba. Kansi, mbongo ya beto ke sadilaka sambu na kisalu na beto, ke katukaka ntete-ntete na beto mosi Bambangi ya Yehowa; bankaka ke tindaka makabu ya luzolo ya mbote na Babetele ya Bambangi ya Yehowa ya insi na bo. Bo ke monisaka luzolo ya mbote bonso bansadi ya Nzambi ya ntangu ya ntama yina pesaka makabu na luzolo yonso sambu na kutunga kisika ya kusambila Yehowa. (Kub. 35:20-29; 1 Bans. 29:9) Bantu ya nkaka ke salaka testama sambu na kubikila organizasio ya Yehowa bima na bo ya valere to mbongo na bo. Kansi makabu ya nkaka ke katukaka na bantu, na mabundu mpi na banziunga mpi mbala mingi mbongo yina bo ke pesaka ke vandaka ve mingi. Kana bo vukisa makabu yina, yo ke basisaka mbongo yina me fwana sambu kisalu ya kusamuna kulanda kukwenda na ntwala.

⁴ Bambangi ya Yehowa ke monaka nde kupesa mbongo mpi bima na bo ya nkaka sambu kisalu ya kusamuna kukwenda na ntwala kele dibaku ya nene. Yezu ti balongoki na yandi vandaka ti kesi ya mbongo kisika bo vandaka kubaka mbongo sambu na kusala badepanse. (Yoa. 13:29) Biblia ke tela beto masolo ya bankento yina vandaka kusadila Yezu mpi balongoki na yandi. (Mar. 15:40, 41; Luka 8:3) Ntumwa Polo ndimaka na ntonda yonso makabu ya zola ya bantu yina vandaka kusepela nde nsangu ya mbote kukwenda ntwala mpi ya bayina vandaka kuzola kupesa maboko na kisalu na yandi. (Bafil. 4:14-16; 1 Bate. 2:9) Bambangi ya Yehowa, ke landaka mpi mbandu ya bantu yai ya ntangu ya ntama yina vandaka kikesa na kisalu mpi yina vandaka kupesa makabu na luzolo yonso. Mpidina, bantu ya ntima ya masonga ya bisika yonso ke bakaka “masa ya luzingu ya ofele.”—Kus. 22:17.

KULUNGISA BAMPUSA YA DIBUNDU

⁵ Mbongo ya bo ke sadilaka badepanse ya dibundu ke katukaka mpi na makabu ya luzolo ya mbote. Beto ke kongulaka ve mbongo; beto ke zengaka mpi ve ntalu ya mbongo yina konso muntu fwete pesa mpi beto ke lombaka ve bantu mbongo. Beto ke tulaka bakesi ya makabu na bisika yina beto ke salaka balukutakanu sambu konso muntu kupesa “mutindu yandi me kana na ntima na yandi.”—2 Bak. 9:7.

⁶ Beto ke sadilaka mbongo ya makabu ntete-ntete sambu na bisalu ya Nzo ya Kimfumu mpi sambu na kuyidika yo. Kimvuka ya bankuluntu lenda baka lukanu ya kutinda mbongo ya nkaka na Betele ya Bambangi ya Yehowa sambu kisalu yina ke salamaka na ntoto ya mvimba kukwenda na ntwala. Sambu na kusala mpidina, dibundu ya mvimba fwete ndima lukanu yina. Na mutindu yina, mabundu mingi ke tindaka makabu mbala na mbala sambu na kisalu yina ke salamaka na ntoto ya mvimba. Kana bampangi yonso ke zaba bampusa ya dibundu yina ke basikaka mbala na mbala, yo ta vanda ve mfunu na kupesa baluzayisu mingi ya ke tadila makabu.

MUTINDU YA KUBUMBA MAKABU

⁷ Na nsuka ya konso lukutakanu, bampangi zole ke bakaka mbongo yonso yina bantu ke tulaka na bakesi ya makabu mpi bo ke sonikaka yo. (2 Bant. 12:9, 10; 2 Bak. 8:20) Kimvuka ya bankuluntu ta sala yonso sambu na kubumba mbongo yina tii kuna bo ta tinda yo na Betele to bo ta sadila yo sambu na bampusa ya dibundu. Mpangi yina ke talaka mambu ya konti ya dibundu ke yidikaka rapore ya konti konso ngonda sambu na kuzabisa dibundu mpi na nima ya bangonda tatu mutambusi ya kimvuka ya bankuluntu ke yidikaka mambu sambu nkuluntu mosi kutadila konti ya dibundu.

BADEPANSE YA NZIUNGA

⁸ Mbongo sambu na badepanse ya balukutakanu ya nziunga mpi mbongo ya bo ke sadilaka badepanse ya nziunga ke katukaka na makabu ya Bambangi ya Yehowa ya nziunga yina. Bo ke tulaka bakesi ya makabu na bisika ya balukutakanu ya nene sambu bantu kutula makabu ya luzolo ya mbote sambu na nziunga yina. Katula yo, mabundu lenda pesa makabu na bantangu ya nkaka sambu na badepanse yina nziunga ke salaka mbala na mbala.

⁹ Mbala mingi, makabu yina bo me baka na konso lukutakanu fwete fwana sambu na kufuta badepanse yonso yina bo salaka; mbongo yina ke bikalaka, bo ke tindaka yo sambu na kisalu yina ke salama na ntoto ya mvimba. Kana mbongo yina kele na konti ya nziunga me lunga ve sambu na kufika badepanse yina bo salaka sambu na lukutakanu ya nziunga to sambu na kufika badepanse ya luyantiku ya lukutakanu ya nziunga yina ta landa, mu mbandu mbongo ya bo fwete futa sambu na kisika yina lukutakanu ta salama, nkengi ya nziunga lenda sonikila mabundu sambu na kuyibusa bo dibaku yina ya mbote ya kupesa makabu. Konso kimvuka ya bankuluntu ta tadila diambu yina mpi ta zenga ntalu ya mbongo yina dibundu na bo ta pesa na konti ya nziunga. Na nima bo ta zabisa dibundu ntalu ya mbongo yina bo me zenga sambu bampangi kundima yo.

¹⁰ Kana mambu ya mbongo me basika mpi yo ke lomba nde bankuluntu ya nziunga kuzaba yo, bo ta sala lukutakanu kilumbu yina bo ta sala lukutakanu ya nziunga. Sambu na mambu yonso ya mbongo yina me tala badepanse ya nziunga, bankuluntu fwete zenga ntalu ya mbongo ya kupesa. Beno fwete sonika bantalu ya mbongo yina mpi kutangila yo bampangi sambu bo ndima yo konso ntangu ya beno ke sadila mbongo ya nziunga.

¹¹ Bo ke yidikaka mambu sambu bampangi kuzikisaka mbala na mbala mbongo ya nziunga.

KUSADISA BANSUKAMI

¹² Kusadisa bansukami vandaka na kati ya bikuma yina vandaka kusala nde Yezu ti balongoki na yandi kubumba mbongo na kesi. (Mar. 14:3-5; Yoa. 13:29) Bakristu kele ti mukumba yina tii bubu, sambu Yezu tubaka nde: “Beno ta vandaka ntangu yonso ti bansukami.” (Mar. 14:7) Inki mutindu Bambangi ya Yehowa ke lungisaka mukumba yina bubu yai?

¹³ Bantangu ya nkaka, bampangi ya kwikama yina kele na dibundu lenda vanda ti mfunu ya lusadisu ya kinsuni sambu bo me kuma minunu, bo kele ti bifu na nitu to sambu mambu ya mpasi me bwila bo kukonda kukana. Bantu ya dibuta, bampangi mpi bantu ya nkaka yina me zaba diambu yina lenda sadisa bo. Yo ke wakana ti mambu yai ya ntumwa Yoane tubaka: “Kana muntu kele ti bima ya kinsuni ya nsi-ntoto yai, ebuna yandi me mona mpangi na yandi me konda bima kansi yandi ke buya kuwila yandi mawa, nki mutindu zola ya Nzambi kele na muntu yina? Bana ya fioti, beto fwete zola kaka ve na bangogo mpi ti ludimi, kansi na bisalu mpi na kieleka.” (1 Yoa. 3:17, 18; 2 Bate. 3:6-12) Lusambu ya kieleka ke lombaka mpi nde beto sadisa bampangi ya kwikama yina lenda vanda ti mfunu ya lusadisu ya kinsuni.—Yak. 1:27; 2:14-17.

¹⁴ Na mukanda ya ntete yina ntumwa Polo sonikilaka Timoteo, yandi tendulaka mutindu beto lenda sadisa na kinsuni bampangi yina me fwana nde beto sadisa bo. Nge lenda tanga bandongisila na yandi na 1 Timoteo 5:3-21. Konso Mukristu kele ti mukumba ya kulungisa bampusa ya bantu ya nzo na yandi. Minunu to bampangi ya kele ti bifu na nitu fwete baka lusadisu na bana na bo, na bantekolo na bo to na bampangi na bo ya nkaka ya dibuta. Bantangu ya nkaka, leta to bimvuka yina ke talaka mambu ya luzingu ya bantu ke pesaka lusadisu ya kinsuni, ebuna yo lenda lomba nde bampangi to bantu ya nkaka kusadisa muntu yina kele na mfunu ya lusadisu na kulomba nde bo sadisa yandi. Diambu mosi ya mpasi lenda basika mpi yo lenda lomba nde dibundu ya mvimba kusadisa bampangi ya nkaka ya babakala mpi ya bankento yina ke sadilaka Yehowa na kwikama yonso bamvula mingi mpi ya kele ti mfunu ya lusadisu. Kana bampangi yango kele ve ata ti muntu mosi ya dibuta to bampangi ya nkaka yina lenda sadisa bo mpi kana leta lenda sadisa bo ve, kimvuka ya bankuluntu lenda lomba nde bo sadisa bo. Bakristu ke monaka nde kupesa bima na bo ya kinsuni na bantu yina kele ti mfunu na yo kele dibaku ya nene.

¹⁵ Bampangi mingi lenda kuma ti mfunu ya lusadisu sambu na mbangika, bitumba, kunikana ya ntoto, masa yina ke fulukaka mpi ke dindisaka banzo, nzala, to mambu ya nkaka ya mpasi yina ke salama na bantangu yai ya mpasi. (Mat. 24:7-9) Bampangi ya mabundu ya bisika yina mambu yai me salama lenda vanda ve ti bima ya kupesa bampangi ya nkaka, yo yina Nto-Kimvuka ke vukisaka makabu yina bampangi ya bisika ya nkaka ke tindaka sambu na kupesa bampangi bima yina bo kele na yo mfunu. Bakristu ya Asie Mineure salaka mpi mutindu yina. Bo pesaka bampangi ya Yudea madia na nsungi ya nzala. (1 Bak. 16:1-4; 2 Bak. 9:1-5) Kana beto ke landa mbandu na bo, beto ta monisa nde beto ke zolaka bampangi na beto mpi nde beto kele balongoki ya kieleka ya Yezu Kristu.—Yoa. 13:35.

KUKABULA MIKANDA

¹⁶ Biblia mpi mikanda yina ke tendulaka yo ke salaka nde nsangu ya Kimfumu kumwangana kibeni. Mbala mingi, kimvuka ya bankuluntu ke ponaka nsadi ya kisalu mosi sambu na kutala mambu ya mikanda ya dibundu. Bampangi yina bo ke ponaka sambu na kutala mambu ya mikanda, ke bakaka ve kisalu na bo na nsaka. Bo ke sonikaka mbala na mbala mikanda yina dibundu kele ti yo mfunu sambu mikanda kuvanda mingi sambu na kulungisa bampusa ya dibundu.

¹⁷ Beto Bakristu ya me kudipesaka na Nzambi, beto me zaba nde ntangu, ngolo, mayele mpi bima na beto ya kinsuni, ata nkutu luzingu na beto, kele makabu yina Nzambi me pesaka beto mpi beto fwete sadila yo na kisalu na yandi. (Luka 17:10; 1 Bak. 4:7) Kana beto ke sadila bima na beto yonso mbote, beto ta monisa nde beto ke zolaka kibeni Yehowa. Mpusa na beto kele ya kusadila bima na beto ya valere sambu na kupesa Yehowa lukumu, sambu beto ke zaba nde yandi ke sepelaka ti konso dikabu yina beto ke pesaka sambu na kumonisa nde beto me kudipesaka ya mvimba na yandi. (Bing. 3:9; Mar. 14:3-9; Luka 21:1-4; Bakol. 3:23, 24) Yezu tubaka nde: “Beno me baka ya ofele, beno pesa mpi ya ofele.” (Mat. 10:8) Kana beto ke kudipesa mpi ke pesa bima na beto na kisalu ya Yehowa, beto ta kuma ti kiese mingi kibeni.—Bis. 20:35.