Inki Kele Lukanu Ya Nzambi Sambu Na Beto?
KANA nge tanga zulunalu, nge tala televizio, to nge landa radio, nge ta mona to ta wa mambu mingi ya mubulu, bitumba mpi terorizme. Ziku nge ke kudiyangisa mingi sambu nge ke bela maladi mosi buna to sambu muntu mosi ya nge vandaka kuzola me fwa.
Kudiyula nde:
Keti yai kele mambu ya Nzambi kanaka sambu na mono mpi sambu na dibuta na mono?
Na wapi mono lenda zwa lusadisu sambu na kukanga ntima na bampasi na mono?
Keti kilumbu mosi beto ta zinga na ngemba ya kieleka?
Biblia ke pesa bamvutu ya mbote na bangiufula yai.
BIBLIA KE LONGA NDE NZAMBI TA SALA MAMBU YA KUYITUKA NA NTOTO.
Bantu ta waka diaka ve mpasi, bo ta nunaka diaka ve, mpi bo ta fwaka diaka ve.—Kusonga 21:4
“Muntu ya dikulu-kifu ta pumbuka bonso kabuluku.”—Yezaya 35:6
“Meso ya bifwa-meso ta kanguka.”—Yezaya 35:5
Bafwa ta futumuka.—Yoane 5:28, 29
Ata muntu mosi ve ta bela.—Yezaya 33:24
Bantu yonso na ntoto ta vanda ti madia mingi.—Nkunga 72:16
BAKA MAMBOTE YA MAMBU YINA BIBLIA KE LONGAKA
Mbala ya nkaka nge lenda yindula nde mambu yina nge me tanga na balutiti ya luyantiku ya mukanda yai kele ndosi. Kansi Nzambi me sila nde kubika fioti, yandi ta sala bansoba yina awa na ntoto, mpi Biblia ke monisa mutindu yandi ta sala yo.
Biblia ke tubila mambu mingi kuluta yai. Yo ke zabisa beto mambu yina beto fwete zaba sambu na kuvanda kibeni ti luzingu ya kiese banda bubu yai. Yindula fioti mambu yina ke yangisaka nge. Yo lenda vanda mpasi ya mbongo, mambu ya dibuta, mavimpi ya kele diaka ve mbote, to lufwa ya muntu yina nge vandaka kuzola. Biblia lenda sadisa nge na kukanga ntima na bampasi yai. Diaka, yo lenda pesa nge kikesa kana nge baka bamvutu ya bangiufula yai:
Sambu na nki beto ke monaka mpasi?
Inki mutindu beto lenda kanga ntima na bampasi na beto?
Keti dibuta na beto lenda vanda na kiese?
Inki ke kuminaka beto kana beto me fwa?
Keti beto ta mona diaka bantu ya beto vandaka kuzola yina me fwaka?
Sambu na nki beto ke ndima nde Nzambi ta sala mambu yonso yina yandi me silaka beto??
Mutindu nge ke tanga mukanda yai ke monisa nde nge ke zola kuzaba mambu yina Biblia ke longaka. Mukanda yai ta sadisa nge. Kele ti bangiufula sambu na konso paragrafe; yo ta sadisa nge na kubakisa Biblia mbote-mbote. Bantu mingi ke sepelaka kulonguka Biblia ti Bambangi ya Yehowa. Beto ke tula ntima nde nge mpi ta sepela. Bika Nzambi kusakumuna nge ntangu nge ke longuka mambu yina Biblia ke longa nge!