Bana-Babakala Iya Yina Lemfukilaka Yehowa

Ntangu Nebukadenezare nataka bamfumu ya Yuda na Babilone, yandi songaka basoda na kusosa baleke ya mayele mpi ya kele ti mavimpi ya mbote na kati na bo. Yo lombaka nde bo pesa baleke yango formasio bamvula tatu. Formasio yina zolaka kusadisa bo na kukuma bamfumu ya nene na Babilone. Nebukadenezare pesaka Ashpenazi, mfumu ya nzo na yandi, mukumba ya kupesa bo formasio. Yo lombaka nde baleke yina kulonguka kutanga, kusonika, mpi kutuba Akkadien, ndinga ya bantu ya Babilone. Yo lombaka mpi nde bo dia madia yina ntotila mpi bantu ya nzo na yandi vandaka kudia. Bana-babakala iya na kati ya bana yango bo yai: Daniele, Hanania, Mishaele mpi Azaria. Ashpenazi pesaka bo bazina ya bantu ya Babilone: Belteshasare, Shadraki, Meshaki, mpi Abedi-Nego. Keti malongi yina pusaka bo na kuyambula kusadila Yehowa?

Bana-babakala yai iya vandaka ti lukanu ya kulemfukila Yehowa. Bo zabaka nde bo fwete dia ve madia ya ntotila sambu madia ya nkaka vandaka mvindu na kutadila nsiku ya Yehowa. Yo yina bo songaka Ashpenazi nde: ‘Pardo kupesa beto ve madia ya ntotila.’ Ashpenazi songaka bo nde: ‘Kana beno dia yo ve mpi kana ntotila kumona nde beno ke bela, yandi ta fwa mono!’

Ngindu mosi kwisilaka Daniele. Yandi songaka muntu yina vandaka kukengila bo nde: ‘Pardo pesa beto kaka ndunda mpi masa bilumbu kumi. Na nima, fwanisa beto ti bana-babakala yina ke dia madia ya ntotila.’ Muntu yina ndimaka.

Na nima ya bilumbu kumi, Daniele ti banduku na yandi tatu vandaka ti mavimpi ya mbote kuluta bana-babakala yina ya nkaka. Yehowa waka kiese sambu bo lemfukilaka yandi. Yandi pesaka Daniele nkutu mayele ya kubakisa bambona-meso mpi bandosi.

Ntangu formasio manaka, Ashpenazi nataka bana yina na Nebukadenezare. Ntotila solulaka ti bo mpi yandi monaka nde Daniele, Hanania, Mishaele mpi Azaria vandaka mayele mingi kuluta bana-babakala yonso ya nkaka. Yandi ponaka bo iya sambu na kusala na nzo na yandi. Mbala mingi ntotila vandaka kulomba bo bandongisila na mambu ya mfunu. Yehowa kumisaka bo mayele kuluta bantu yonso ya mayele mpi banganga-nkisi ya ntotila.

Ata bo vandaka na insi ya nzenza, Daniele, Hanania, Mishaele, mpi Azaria vilaka ve nde bo vandaka bansadi ya Yehowa. Keti nge mpi ke yibukaka Yehowa ntangu yonso, ata ntangu nge kele ve kisika mosi ti bibuti na nge?