Balongoki ya Galaad

Kele na Mpwisa ya Kupanza Nsangu ya Mbote

“YAI kele kima ya kuluta mfunu mpenza.” Yai kuvandaka mutindu Anders ti Amalia Groth kutubaka na yina metala ndongolo na bau ya kimisionere. Bau monisaka mawi ya balongoki 48 yonso ya kubakaka mapolomi na nzo-nkanda ya 97 ya Galaad, yina kele nzo-nkanda ya Biblia ya la Société Watchtower, na kuyikaka nde: “Malongi ya beto mebaka na Galaad mepusa beto mpi mebongisa beto, na mpila nde beto kele na mpwisa ya ngolo na kukwenda na bateritware na beto ya mpa.”

Beto lenda kukabula mpi kyese yai na kuwidikilaka bana ya nzo-nkanda kepesa bakomantere na manaka ya kupesama ya mapolomi ya kusalamaka na twala ya bantu 6420 ya kuvukanaka na Septembri 4, 1994, na dibaku yango.

David Abel ti nkento na yandi, Kelli ketuba nde: “Theodore Jaracz, membere ya Nto Kimvuka, kuvandaka muntu ya ntete na kubaka ndinga na yina metala ntu-dyambu: ‘Ya Kulongama na Yehowa,’ Beto tavila ve ata fyoti mambu ya mpangi Jaracz kutubaka nde: ‘Beto fwete kundima bufyoti na beto na kufwanisa ti Yehowa,’ mpi yandi pesaka mbandu ya dibanza yango na dilongi ya ngolo ya kele na Yobi mikapu 38 ti 39. Mpangi Jaracz kutubilaka mingi nde kana beto meyedisa nzayilu na beto ya Biblia na nsadisa ya nzo-nkanda ya Galaad, beto kele ve ti bamvutu na bangyufula yonso. Beto fwete kulanda na kulonguka Ndinga ya Nzambi.”

Christian ti Angele Coffy ketuba ntangu yai nde: “Disolo ya kupesamaka na Max Larson ya kuvandaka na ntu-dyambu ‘Mbalu ya Lufulu ya Mbote Kele Inki?’ kubendaka mpenza dikebi na beto. Beto yangalalaka na mutindu na yandi ya kufwanisa beto ti nzo ya kele na mfunu ya lufulu ya mudindu na ntoto ya ngolo sambu na kuvanda ya kukangama ngolo ata na ndikunu ya ntoto. Na kulongukaka na mudindu, beto lenda kuyedisa bagwisani ya kuluta mbote ti Yehowa mpi kutungaka lukwikilu na beto na zulu ya nzayilu ya mudindu sambu na kugendibila na bantangu ya mpasi.”

Gary ti Lynn Elfers ketuba nde: “Disolo ya kupesamaka na Milton Henschel, ntwadisi ya nzo-nkanda, yina kuvandaka na ntu-dyambu ‘Bilanga Meyela Sambu na Ngyonzoko’ tabikala bantangu mingi na bantu na beto. Mvese ya mfunu, Yoane 4:​35-38, kutubilaka mingi dibaku ya beto kele na yau ya kukota na kilanga ya mekunamaka ntete na bansadi ya nkaka. Dibanza yai tapusa beto na kusala ti kansansa ya mfunu ya kisalu na beto.” Na kundima mambu yai, Jan ti Sirpa Vaahtola kutubaka nde: “Mpangi Henschel kukangudilaka beto makwisa ya ngolo na yina metala ngyonzoko ya fwete kusalama, na kupesaka beto lapolo ya nsuka ya bansi ya Baltes. Kuyela na Estonie kuvandaka ya 51%. Na Lettonie yau kuvandaka ya 106%, mpi na Lituanie ya 51%. Yau pesaka mpenza kyese! Kuna bampangi kelomba na Longi na kutinda bansadi ya nkaka. Beto vandaka mpenza na kyese ya kuzaba yau, sambu beto metindama na Estonie.”

Kevin ti Evelyn Cortina kuyibusaka nde: “Joel Adams kupesaka disolo ya kulandaka yina kuvandaka na ntu-dyambu ‘Tula ntima na Yehowa.’ Yandi pesaka ndongisila nde beto lenda kuyindula ve ata fyoti nde ntangu ya nkaka beto tatulaka ntima na Yehowa, ntangu ya nkaka na mayele na beto mosi. Na kisalu na beto, beto takutana ti bampasi mingi​—⁠ya mavimpi, ya madya, ya ndinga, ya bansiku ya bambuta mpi buna na buna. Yonso talomba nde beto kutula ntima na Yehowa.”

Mutubi ya kulandaka kuvandaka Gerrit Lösch, membere ya Nto Kimvuka, yina kutubilaka disolo ya kuvandaka na ntu-dyambu: “Beno Fula na Kumonisa Mawa ya Yehowa.” Alen ti Ann Marie kutubaka nde: “Yandi tubilaka mingi nde mawa ya beto kemonisaka na bankundi na beto bamisionere ti na bantu ya beto ketubilaka nsangu ya mbote kele kidimbu ya kuyela na beto na kimpeve. Kutulama na kisalu na nsi ya bunzenza kele kimenga ya nene, kansi kana beto kele na mawa ve, kimenga na beto tavanda mpenza ti mbalu ya fyoti.” (Matayo 9:13) Peter ti Fleur Hupston kuyikaka nde: “Mpangi Lösch kutubaka nde beto fwete kufuluka mpi na mawa sambu na bampangi na beto ya babakala ti ya bankento, beto fwete kutalaka bau na disu ya mbote. Mpila yina, beto tamona bifu na bau mpamba na kisika ya kukumisa yau ngolo.”

Mickey ti Sherry keyibuka nde: “Jack Redford, mosi na kati ya balongi na beto na Galaad, kulandaka na disolo ya kuvandaka na ntu-dyambu ‘Keti Nge Lenda Kulunda nsembolo?’ Yandi tubilaka mingi nde lulendo kepesaka mpasi na kundima nsembolo mpi nde kana beto kewa makasi nswalu ndongisila tasadisa beto ve ata fyoti. Na nima yandi pesaka mwa bangindu ya kusadila, na kuwakana ti Mawa 3:​27-31, na mutindu ya kundima nsembolo.” Charles ti Joan Held kuyikaka nde: “Mbala mingi beto kezabaka ve bifu na beto; na yau, beto fwete kutadila nsembolo bonso mwaye ya kukangula meso na mambu yina beto vandaka kuzaba ve. Nsembolo to ndongisila ya kekatuka na Yehowa kele kidimbu ya zola na yandi sambu na beto.”

Kenneth ti Lisbeth Ardkäll kutubaka nde: “Longi ya nkaka, Ulysses Glass kusalaka disolo ya kuvandaka na ntu-dyambu ‘Beno Longuka Mayele ya Kenataka na Luzingu.’ Yandi kuyufulaka nde: ‘Inki mutindu beno tasadila mambu ya beno melonguka?’ Na nima yandi pesaka kingana ya kutungamaka na Bingana 30:​24-26 yina metala basimbidiki ti mutindu Yehowa mesadilaka yau sambu na luzingu na yau. Kiteso mosi sambu na beto mpi, beto kele ve na mayele kaka ya kubutukila, ebuna beto fwete kusala ngolo na kulonguka mayele yango. Yehowa mepesaka beto yonso ya beto kele na yau mfunu sambu na yau. Ntangu yonso ya beto tabikala penepene na yandi mpi bamosi sambu na bankaka na zola, beto tasala kisalu ya mbote.

Disolo ya Kuluta Mfunu

Jay ti Gwen Abraczinskas kutubaka nde: “Mpangi Karl F. Klein, membere ya Nto Kimvuka, kutadilaka Nkunga 19 na disolo na yandi: ‘Diyaka na kati ya mayaka.’ Yandi tubilaka mingi ntonda ya mudindu ya Davidi kuvandaka na yau sambu na Yehowa mpi dikebi ya ngolo ya yandi vandaka kutula na Ndinga ya Nzambi.” Keith ti Donna Hornback kutubaka nde: “Mpangi Klein kukabulaka nkunga yango na bitini tatu. Kitini ya 1 (bamvese 1-6) Kemonisa ntonda ya Davidi na lugangu ya Nzambi, kitini ya 2 (bamvese 7-10) kemonisa ntonda na yandi sambu na bansiku ya Nzambi, mpi kitini ya 3 (bamvese 11-14) kuyibukaka beto nde, bonso Davidi, beto fwete zola kuvanda na kuwakana ya mbote ti Yehowa.”

David ti Raylene Long kutubaka nde: “Beto yangalalaka na dyambu yina kumonisaka nde kubanga Yehowa kele mfunu kana beto kebuya mambu ya mbi. Boma yango kepusa beto na kusala yina kele ya kugedila na meso na yandi.” Frank ti Vibeke Madsen kuyikaka nde: “Komantere ya mpangi Klein na yina metala mambote ya bandongisila, bansiku ti bantuma ya Yehowa kenataka, ketubila mbote na bunkufi mambu ya beto longukaka na Galaad. Beto kele dyaka na lukanu ya kuluta ngolo ya kundima Ndinga ya Nzambi na ntangu kekwisa mpi na kutadila yau bonso sanduku ya kufuluka na mayaka ya ntalu.”

Na kulandaka disolo na yandi ya kuluta mfunu, bana ya nzo-nkanda kubakaka mapolomi na bau, mpi bau tubilaka bau bisika bau tindamaka. Na nima ya mwa mvunda, ntangu ya kupesamaka mwa madya, bantu yonso kuvutukaka sambu na kitini ya nima ya midi. Bana ya nzo-nkanda ya kubakaka mapolomi kuvutulaka bamvutu na bangyufula ya kuyufulamaka na ntangu ya kulonguka ya Nzozulu ya Nkengi.

Bob ti Shannon Lakatos keyibuka nde: “Na nima ntangu ya manaka ya bana ya nzo-nkanda yina kuvandaka na ntu-dyambu ‘Bau Melongama Sambu na Kukuma Bansamuni ya Kimfumu na Ntoto ya Mvimba,’ kulungaka. Kitini ya ntete vandaka kutubila mambu ya bana ya nzo-nkanda kukutanaka na yau na kisalu ya kusamuna na bangonda tanu yina ya ndongolo. Yau vandaka kutubila mingi mutindu ya kusadila mbote bangyufula na kati ya kisalu na beto ya kusamuna. Kitini ya kuyufula bangyufula kumonisaka mitindu ya mbote ya kununga bampasi ti bigonsa ya luzingu ya kimisionere. Bansonga tatu ya dyapozitive yina metadila Costa Rica, Inde, ti Malawi, kupesaka beto ngindu na yina metala kimvuka ya nza ya mvimba ya Yehowa.”

Jesse ti Michelle Duncan kutubaka nde: “Kifwanifwani yina kulandaka, Beto Vanda Bantu ya Teocrasi, Kansi Bantu ya Nza ve, kupesaka bambandu ya malanda ya mbi yina bampangi ya kele na kikalulu ya dipanda mpi ya kele na bankadilu ya nza mpenza.” Wenzel ti Kelly Koula kuyikaka nde: “Yau kumonisaka nde bakristu fwete kundima balutwadisu mpi bansiku ya teokrasi nde yau kele mfunu mpi yau kenataka mambote.”

Manaka yai ya kyese kumanaka na nkunga ti kisambu. Mutindu bana ya nzo-nkanda ya kubakaka mapolomi kuvandaka na mpwisa ya ngolo ya kukwenda na bateritware na bau na bansi ya bunzenza 18, mawi na bau memonisama mbote mbote na komantere yai ya Tommi ti Jael Kauko nde: “Beto kele na mpwisa ya ngolo ya kukwenda na teritware na beto mpi na kusadila mambu ya beto melonguka. Beto mezwa mambu mingi​—⁠sesepi yai kele ntangu na beto ya kupesa yau.”

[Caption on page 1]

[Picture caption]

Nzo-nkanda ya 97 ya Galaad, Nzo-nkanda ya Biblia ya Societé Watchtower

Na lisiti yai kelanda, bandonga kele ti banimero na ndambu ya nsi mpi bazina mepesama kubanda na diboko ya kinkento tii na diboko ya kibakala.

(1) J. Hong; D. Hong; A. Groth; E. Cortina; S. Lakatos; D. Hornback; L. Acevedo; A. Coffy. (2) L. Elfers; A. Gokavi; L. Ardkäll; G. Abraczinskas; K. Knott; T. Lizer; K. Abel; D. Abel. (3) M. Duncan; A. Gokavi; J. Held; F. Hupston; B. Lakatos; R. Long; S. Minsky; E. Acevedo. (4) K. Ardkäll; J. Kauko; S. Vaahtola; K. Cortina; N. Carson; M. Minsky; G. Lizer; K. Koula. (5) J. Duncan; J. Abraczinskas; J. Vaahtola; F. Madsen; V. Madsen; D. Long; C. Carson; G. Elfers. (6) T. Kauko; P. Hupston; C. Held; A. Groth; K. Hornback; W. Koula; D. Knott; C. Coffy.