Bika Nsemo na Beno Kungenga!
NSUKANSUKA ntangu kulungaka sambu mununu kumona Mesya yina silamaka! Na nzayikusu ya Nzambi Simeoni zabaka nde “[yandi] ta fwa ve tii kuna [yandi] ta mona Mesia yina ya Mfumu Nzambi me silaka.” (Luka 2:26) Kansi kyese ya inki mutindu yandi vandaka na yau ntangu Simeoni kotaka na tempelo, mpi Maria na Yozefi pesaka mwana Yezu na maboko na yandi! Yandi kembilaka Nzambi, na kutubaka nde: “Ntangu yai, Mfumu, . . . nge lenda bikisa mono muntu yina ke sadilaka nge, sambu mono kufwa na ngemba. Sambu mono ke mona na meso na mono mosi, Ngulusi. . . . Yandi kele [nsemo] yina ta songa bamimpani nzila na nge. Yandi ta pesa lukumu na bantu na nge ya Israele.”—Luka 2:27-32; fwanisa ti Yezaya 42:1-6.
Yezu, katuka na mbotika na yandi na bamvula 30 tii na lufwa na yandi, yandi kudisongaka bonso “nsemo” ya inza. Na inki mutindu? Yandi ngengisaka nsemo ya kimpeve na kusamunaka Kimfumu ya Nzambi mpi balukanu na Yandi. Yandi monisaka mpi malongi ya imbi ya mabundu ya luvunu mpi songaka pwelele bisalu ya kitombe. (Matayo 15:3-9; Galatia 5:19-21) Na yau, Yezu lendaka kutuba nde: “Mono kele [nsemo] sambu na bantu yonso.”—Yoane 8:12.
Yezu kufwaka na mvu 33 T.B. Keti nsemo kufwaka? Ata fyoti ve! Na ntangu yandi vandaka ntete na ntoto, Yezu tubilaka banlongoki na yandi nde: “[Nsemo] na beno fweti [ngenga] na meso ya bantu.” (Matayo 5:16) Na yau, na nima lufwa ya Yezu, balandi na yandi fulaka na kugengisa nsemo.
Na kulandaka mbandu ya Yezu, Bakristu bubu kengengisaka nsemo ya Yehowa na kudipesaka na kisalu ya kusamuna. Bau “ketambulaka bonso bana ya nsemo,” na kudisongaka bonso bambandu ya kengenga na luzingu ya Bukristu.—Efezo 5:8, NW.
[Lupangu ya kele na lutiti 32]
Keti Nge Tazola Mvutukilu Mosi?
Ata na kati ya inza yai ya mavwanga, nge lenda kubaka kyese na nsadisa ya nzayilu ya kyeleka ya Biblia kepesa na yina ketala Nzambi, Kimfumu na yandi mpi lukanu ya kitoko ya yandi kusalaka sambu na bantu. Kana nge tazola kuzaba mambu ya nkaka to nge tazola nde muntu mosi kwisa kulonguka ti nge Biblia ya ofele na inzo, beto kelomba nge na kusonika na Association “Les Témoins de Jéhovah,” B.P.634 Limete, Kinshasa, Zaïre, to na mosi na adresi mebonga na nge yina kele na lutiti 2.