Bambangi ya Yehowa Bo Kekwenda na Ntwala ti Lukwikilu ya Ngolo!

Rapore ya Lukutakanu ya Nsuka ya Mvula

NA BILUMBU yai ya kukonda lukwikilu mpi ya kufuluka ti badute, Bambangi ya Yehowa mezabanaka bonso Bakristu yina kele ti lukwikilu ya ngolo. Dyambu yai kumonanaka pwelele na lukutakanu ya nsuka-mvula ya Watch Tower Bible and Tract Society of Pennsylvania, yina bo salaka na Nzo ya Balukutakanu ya Bambangi ya Yehowa na Jersey City, New Jersey, na Sabala, Oktobri 7, 2000.a

Na bangogo na yandi ya luyantiku, ntwadisi ya lukutakanu, John E. Barr, yina kele mpi mambre ya Nto-Kimvuka ya Bambangi ya Yehowa, kutubaka nde: “Na kati ya bamiliare ya bantu yina kele na ntoto, beto mpamba bantu kuzaba mpi kekwikilaka nde Yehowa metulaka Mwana na yandi ya yandi kezolaka mingi, Kristu Yezu, mfumu na zulu, mpi yandi keyala na kati ya bambeni na yandi.” Kima kumonisaka nde beto kele ti lukwikilu ya ngolo ya mutindu yina kele barapore sambanu ya kitoko yina kukatukaka na ntoto ya mvimba.

Kyeleka ya Biblia kunungaka bampeve ya mbi na Haiti

Lusambu ya bampeve ya mbi mepanzanaka mingi kibeni na Haiti. Mpangi John Norman, kordinatere ya Komite ya Filiale ya Haiti, kutubaka nde: “Mbala mingi, bantu kekotaka na dibundu ya vaudou sambu na kuditanina.” Nganga-nkisi mosi kuvidisaka kivuvu ntangu dikulu na yandi mosi kuzenganaka na aksida. Yandi kudiyulaka nde: ‘Inki mutindu dyambu ya mutindu yai lenda kumina munu kana bampeve ketaninaka munu?’ Bambangi ya Yehowa kulongaka muntu yai kyeleka mutindu bo longaka bantu mingi yankaka mpi bo sadisaka yandi na kuyambula kusambila bampeve ya mbi. Kivuvu kele nde kuyela tasalama mingi na bilumbu kekwisa na Haiti, sambu na Aprili 19, 2000, bantu yina kwisaka na Lusungiminu ya lufwa ya Kristu kulutaka ntalu ya bansamuni ya Kimfumu ya insi yina mbala iya.

Kikesa na teritware ya nene ya Corée

Na Corée, Bambangi ya Yehowa 40 na kati ya nkama kesalaka kisalu ya ntangu yonso. Mpangi Milton Hamilton, kordinatere ya Komite ya Filiale, kutubaka nde: “Ti kibuka ya basoda mingi mutindu yai, beto kemanisaka konso ngonda mbala mosi teritware na beto yina kele ti bantu kuluta bamilio 47.” Kuyela yina kemonana na mabundu yina kesadilaka ndinga ya bidimbu kebenda mpenza dikebi. Na nzyunga mosi ya ndinga ya bidimbu, bo ke na kulonguka Biblia ti bantu 800. Ntalu yai kesonga nde na mwayene nsamuni mosi kelongukaka ti muntu mosi. Ata mutindu yina, tii bubu yai, bo kekangaka kaka bampangi ya babakala ya baleke sambu na bukatikati na bo. Kansi bamfumu ya baboloko kezitisaka mingi kibeni Bakristu yai ya kwikama, mpi mbala mingi, bo kepesaka bo bisalu yina kelombaka muntu yina bo lenda tudila ntima.

Kulungisa bampusa yina kuyela kebasisa na Mexique

Na Augusti 2000, bansamuni ya Kimfumu 533 665 kupesaka rapore ya kisalu ya bilanga na Mexique. Kansi ntalu ya bantu yina kuvandaka na Lusungiminu meluta ntalu ya bansamuni mbala tatu. Kordinatere ya Komite ya Filiale ya insi yina, Robert Tracy, kutubaka nde: “Lukanu na beto mvula yai kele ya kuyika Banzo ya Kimfumu 240.” Yandi yikaka nde: “Kansi, beto kele ti mfunu ya Banzo ya Kimfumu mingi dyaka.”

Na Mexique, Bambangi ya Yehowa ya baleke kepesaka mbandu ya mbote kibeni. Na yina metala leke mosi, nganga-nzambi mosi ya Katolika kutubaka nde: “Mu zolaka kuvanda na kyese mingi kana mu vandaka ata ti leke mosi bonso yandi na kati ya bantu na mono. Mono ke yangalalaka ti baleke na beno sambu bo kele ti lukwikilu ya ngolo mpi bo kesadilaka Biblia mbote. Bo menwaninaka Nzambi, nkutu tii na kutula luzingu na bo na kigonsa.”

Bo bikalaka ya kwikama na kati ya bitumba na Sierra Leone

Yantika na Aprili 1991, mvula yina bitumba kuyantikaka na Sierra Leone, bo mefwaka, mpi bo melwadisaka bantu mingi, bankaka nkutu bo mezengaka bo kitini mosi ya nitu. Kordinatere ya Komite ya Filiale, Bill Cowan, kutubaka nde: “Bitumba ti bampasi mesoba bantu ngolo kibeni. Bantu mingi yina vandaka kuzola ve nsangu na beto mekumaka kuwidikila ti dikebi. Mbala mingi, bantu kekwisaka bo mosi na Banzo ya Kimfumu na beto sambu na kulanda balukutakanu na mbala ya ntete. Mbala na mbala, bantu ketedimisaka bampangi na balabala mpi kelombaka bo na kulonguka ti bo Biblia.” Ata mavwanga kele kaka na insi, kisalu ya kusamuna Kimfumu ke na kubuta bambuma mingi na Sierra Leone.

Kisalu ya nene ya kutunga na Afrika ya Sudi

Bilumbu yai, teritware yina filiale ya Afrika ya Sudi ketalaka kele ti mfunu ya mafunda mingi ya Banzo ya Kimfumu. Bo metunga dezia bankama ya Banzo ya Kimfumu. Kansi John Kikot, mambre ya Komite ya Filiale, kutubaka nde: “Na kisika ya kuvukana na kisasa to na nsi ya nti, mutindu bo vandaka kusala yo ntete, bampangi na beto kevukana na bisika ya mbote yina kele ti bima ya kuvandila ya mbote. Ata Banzo ya Kimfumu yai kelombaka ve mbongo mingi, yo kemonanaka mbala mingi bonso banzo ya kuluta kitoko na kisika ya bo ketungaka yo. Na bisika yankaka, na nima ya kutunga Nzo ya Kimfumu mosi, bo kemonaka nde ntalu ya bantu na dibundu kekumaka kuluta mbala zole.”

Kimvuka ya mpa ya Bambangi na Ukraine

Na mvula ya kisalu 2000, insi yai kukumaka ti bansamuni 112 720. Bansamuni kuluta 50 000 na kati na bo kulongukaka kyeleka ya Biblia na bamvula tanu yina mekatuka kuluta. Kordinatere ya Komite ya Filiale ya insi yina, John Didur, kutubaka nde: “Ya kyeleka, Yehowa mebasisa kimvuka ya Bambangi ya mpa mpi ya baleke sambu na kuzabisa zina na yandi!” Yandi yikaka nde: “Na bamvula zole yina meluta, beto kabulaka baperiodike kuluta bamilio 50, ntalu yai kele kiteso mosi ti ntalu ya bantu ya insi. Konso ngonda, beto kebakaka na mwayene mikanda nkama yina bantu yina keyangalalaka ti nsangu ketindaka sambu na kusosa kuzaba mambu yankaka.”

Mambu yankaka ya kyese ya Lukutakanu

Daniel Sydlik, mambre ya Nto-Kimvuka, kusalaka diskure mosi yina kusimbaka dikebi ya bantu. Disolo yina ketuba nde “Nto-Kimvuka Meswaswana ti Kimvuka ya Mezabana na Nsiku ya Leta,” yina mebasika na periodike yai, mekatuka na bansangu ya mfunu yina yandi tubilaka na disolo na yandi.

Theodore Jaracz, yina kele mpi mambre ya Nto-Kimvuka, kusalaka diskure mosi yina kupusaka bantu na kuyindula, yo vandaka na ntu-dyambu “Mpeve Santu Kesadisaka na Kupona Bankengi ti Bansadi ya Kisalu.” Disolo mosi na kati ya masolo yina mebasika na periodike yai mekatuka na disolo yina.

Na lukutakanu ya nsuka-mvula, David Splane, mambre ya Nto-Kimvuka, kusalaka mpi diskure mosi ya kitoko yina kutubilaka kapu ya mvula sambu na mvu 2001. Yo mekatuka na bangogo ya ntumwa Polo yina ketuba nde: “Beno vanda na lukwikilu ya ngolo, beno vanda bambuta, beno kuyilama mpenza na kusala konso mambu yina ya Nzambi ke zolaka.” (Kolosai 4:12) Bambangi ya Yehowa na ntoto ya mvimba kele ti lukanu ya kusala mambu yai ntangu bo kelonga ti kwikama yonso nsangu ya mbote ya Kimfumu ya Nzambi na ntoto ya mvimba.​—Matayo 24:14.

[Noti na nsi ya lutiti]