Yehowa Kewaka Kudila na Beto

“Mfumu Nzambi ke talaka mbote bantu ya mbote, makutu na yandi ke waka kudila na bo.”​—NK. 34:16.

1, 2. (a) Inki mutindu bantu mingi kekudiwa bubu yai? (b) Sambu na nki dyambu yai keyitukisa beto ve?

KETI nge kekutana ti bampasi? Kana mpidina, nge kele nge mosi ve. Bantu mingi ke na kunwana konso kilumbu ti bampasi ya luzingu ya ngidika yai ya bima ya mbi. Sambu na bantu yankaka, yo kemonana bonso nde bo lenda kuka ve kukanga ntima. Bo kekudiwaka kibeni bonso muyimbi-bankunga Davidi yina kusonikaka nde: “Mono ke na ngolo diaka ve, mono me lemba; ntima na mono ke na mpasi, mono ke dila ngolo. Ntima na mono ke bula, ngolo na mono mpi me mana; meso na mono me kuma mpimpa.”​—Nk. 38:9, 11.

² Beto Bakristu keyitukaka ve na kumona bampasi ya luzingu. Beto kebakisaka nde mpasi “yina kele bonso luyantiku ya misongo ke simba nkento na ntangu ya kubuta mwana” kele na kati ya kidimbu yina Biblia kutubaka nde yo tamonisa kuvanda ya Yezu. (Mar. 13:8; Mat. 24:3) Ngogo ya Kigreki ya bo balulaka nde “misongo” ketendula bampasi yina bantu yonso kemonaka. Yo kemonisa mpenza na sikisiki kiteso ya bampasi yina bantu kemona na bilumbu yai ya “mpasi mingi,” to ya nku!​—2 Tim. 3:1.

Yehowa Kebakisaka Bampasi na Beto

3. Inki dyambu bansadi ya Nzambi kezaba mbote?

³ Bansadi ya Yehowa kezaba mbote nde bo mpi takutanaka ti bampasi, mpi nde mbala yankaka mambu yina ya mpasi takuma dyaka mingi kuluta. Dyaka, katula bampasi yina bantu yonso kemona, beto bansadi ya Nzambi kenwana ti ‘mbeni na beto Satana,’ yina kele ti lukanu ya kufwa lukwikilu na beto. (1 Pie. 5:8) Yo kele mpasi ve na kudiwa bonso Davidi yina kutubaka nde: “Mafingu me pasula ntima na mono, muntu ya kusadisa mono kele ve. Mono vandaka kutula ntima nde bantu ta mona mono mawa ti kusadisa mono, kansi mono monaka ata muntu mosi ve”!​—Nk. 69:21.

4. Inki kepesaka beto kikesa na ntangu beto kekutanaka ti bampasi?

⁴ Keti yo ketendula nde Davidi kukondaka mpenza kivuvu? Ve. Tala mambu yankaka ya yandi yikaka na nkunga yina: “Mfumu Nzambi ke wilaka bantu ya mawa, yandi lenda vila mpi ve bantu na yandi kele na boloko.” (Nk. 69:34) Na kimvuka, beto lenda kudiwa bantangu yankaka bonso nde bampasi mekanga beto na boloko. Yo lenda monana nde bantu yankaka kebakisa mpenza ve bampasi na beto, mpi yo lenda vanda mpidina. Kansi, bonso Davidi, beto lenda baka kikesa na kuzaba nde Yehowa kebakisaka mbote mpenza mpasi na beto.​—Nk. 34:16.

5. Ntotila Salomo kutulaka ntima na nki?

⁵ Salomo, mwana ya Davidi, kutubilaka dyambu yai na kilumbu bo kangulaka tempelo na mbala ya ntete na Yeruzalemi. (Tanga 2 Bansangu 6:29-31.) Yandi bondilaka Yehowa na kuwa kisambu ya konso muntu ya ntima ya masonga yina tasamba Yandi sambu na bampasi na yandi. Nzambi zolaka kusala nki sambu na bisambu ya bantu yai ya kemona mpasi? Salomo kutulaka ntima nde Nzambi zolaka kuwa kaka ve bisambu na bo, kansi mpi yandi zolaka kusadisa bo. Sambu na inki? Sambu Nzambi kezabaka mpenza mambu ya kevandaka na “ntima ya bantu yonso.”

6. Inki mutindu beto lenda nwana ti bampasi, mpi sambu na inki?

⁶ Beto mpi lenda samba Yehowa sambu na ‘mawa ya ke na ntima na beto,’ disongidila bampasi na beto. Beto fwete baka kikesa na kuzaba nde yandi kebakisaka bampasi na beto mpi kekudibanzaka sambu na beto. Ntumwa Piere kundimisaka dyambu yai ntangu yandi tubaka nde: “Beno katula mabanza na beno yina yonso ke yangisaka beno, ebuna beno pesa yo na Nzambi, sambu yandi muntu ke talaka mambu na beno.” (1 Pie. 5:7) Yehowa kekudibanzaka mpenza sambu na mambu yina kekuminaka beto. Yezu kubendaka dikebi na mutindu Yehowa kekudibanzaka na zola yonso sambu na beto, yandi tubaka nde: “Keti bo ke tekaka bandeke zole ya fioti ve na kibende mosi ya fioti-fioti? Kansi ata ndeke mosi lenda bwa ve na ntoto kana Tata na beno me ndima ntete ve. Ata nsuki na beno ya ntu, Nzambi me tangaka yo yonso. Yo yina, beno kuwa boma ve; ata bandeke kele mingi, kansi beno me luta bo na mfunu!”​—Mat. 10:29-31.

Tula Ntima na Lusadisu ya Yehowa

7. Na nki lusadisu beto fwete tula ntima?

⁷ Beto lenda tula ntima mpenza nde Yehowa kele ti luzolo mpi ngolo ya kusadisa beto na ntangu beto mekutana ti bampasi. “Nzambi kele kisika ya beto ke tininaka, yandi muntu ke pesaka beto ngolo; konso ntangu kana mpasi kele yandi ke sadisaka beto.” (Nk. 34:16-19; 46:2) Inki mutindu Nzambi kesadisaka beto? Beto tadila mambu yina 1 Korinto 10:13 ketuba: “Nzambi ke salaka kaka mambu yina ya yandi me tubaka, sambu yandi ta bika beno ve nde Satana kumeka beno na kumeka yina me luta ngolo na beno. Kansi, kana mpukumunu me kwisila beno, kaka na ntangu yo yina Nzambi ta pesa beno ngolo; mpidina mpukumunu lenda bwisa beno ve.” Yehowa lenda twadisa mambu sambu na kukatula mpasi na beto, to yandi lenda pesa beto ngolo ya beto kele na yo mfunu sambu na kukanga ntima. Ata konso mutindu yina, Yehowa tasadisa beto.

8. Inki mutindu beto lenda baka mambote ya lusadisu ya Nzambi?

⁸ Inki mutindu beto lenda baka mambote ya lusadisu yina? Simba mambu yina Biblia kelongisila beto na kusala: “Beno katula mabanza na beno yina yonso ke yangisaka beno, ebuna beno pesa yo na Nzambi.” Yo ketendula nde beto kepesaka Yehowa mukumba ya mambu yonso yina keyangisa beto. Beto kesalaka yonso sambu na kubika kudiyangisa, kevingilaka, mpi ketulaka ntima nde yandi talungisa bampusa na beto. (Mat. 6:25-32) Kutula ntima ya mutindu yai kelombaka kuvanda na kudikulumusa mpi kutula ve ntima na ngolo to na mayele na beto mosi. Kana beto kekudikulumusa “na nsi ya diboko ya ngolo ya Nzambi,” yo tamonisa nde beto kendima pozisio na beto ya nsi. (Tanga 1 Piere 5:6.) Ebuna, nkadilu yai kesadisaka beto na kunwana ti konso mambu yina Nzambi lenda pesa nzila. Beto lenda vanda na mpusa ya ngolo nde yandi sadisa beto kaka na ntangu yo yina, kansi beto ketulaka ntima nde Yehowa kezabaka na sikisiki yonso ntangu mpi mutindu ya kusadisa beto.​—Nk. 54:9; Yez. 41:10.

9. Kilo ya nki mutindu yo lombaka nde Davidi kubikila Yehowa?

⁹ Yibuka bangogo ya Davidi yina kele na Nkunga 55:23: “Bikila Mfumu Nzambi kilo na nge, yandi ta sadisa nge; yandi ta bika ve muntu ya mbote bo bwisa yandi.” Ntangu Davidi kusonikaka bangogo yai, yandi vandaka na mpasi ya ngolo. (Nk. 55:5) Bantu ketubaka nde Davidi kusonikaka nkunga yai ntangu mwana na yandi Absalomi kusalaka pula ya kubotula yandi kimfumu. Ahitofele, konseye ya Davidi yina yandi vandaka kutudila ntima mingi kuluta, kuvukanaka mpi na pula yina. Yo lombaka nde Davidi kutina na Yeruzalemi sambu bo fwa yandi ve. (2 Sam. 15:12-14) Ata na bantangu yina ya mpasi, Davidi fulaka na kutula ntima na Nzambi, mpi Nzambi kubikaka yandi ve.

10. Inki beto fwete sala kana beto mekutana ti bampasi?

¹⁰ Bonso Davidi, yo kele mfunu nde beto samba Yehowa sambu na konso mpasi yina beto lenda kutana na yo. Bika beto tadila mambu yina ntumwa Polo kulongisilaka beto na kusala na dyambu yai. (Tanga Filipi 4:6, 7.) Inki tasalama kana beto samba na masonga yonso? “Ngemba ya Nzambi, ngemba yina me luta mambu yonso ya bantu ke yindulaka, yo ta keba ntima na [beto] ti mabanza na [beto] sambu na kimvuka yina ya [beto] kele ti Yesu Kristo.”

11. Inki mutindu “ngemba ya Nzambi” ketaninaka ntima ti mabanza na beto?

¹¹ Keti kisambu tasoba bampasi na nge? Ee, yo lenda soba yo. Kansi, beto fwete zaba nde Yehowa kepesaka ve ntangu yonso mvutu na bisambu na beto na mutindu yina beto lenda zodila. Ata mpidina, kisambu kesadisaka beto na kutanina mabanza na beto na mpila nde beto vidisa ve bukatikati na beto na ntangu ya mpasi. “Ngemba ya Nzambi” lenda lembika ntima na beto na ntangu bampasi kenyokula beto. Bonso kimvuka mosi ya basoda ya bo mepesa mukumba ya kutanina mbanza sambu nde bambeni kukota ve, “ngemba ya Nzambi” tatanina ntima ti mabanza na beto. Yo tasadisa beto mpi na kukatula badute, boma, ti bangindu ya mbi, mpi yo takanga beto nzila na kusala mambu nswalu mpi na mutindu ya kukonda mayele.​—Nk. 145:18.

12. Pesa mbandu ya kemonisa mutindu muntu lenda vanda ti ngemba ya mabanza.

¹² Inki mutindu beto lenda vanda ti ngemba ya mabanza na ntangu beto mekutana ti bampasi? Beto baka mbandu yina kemonisa na mutindu mosi buna luzingu na beto. Muntu mosi ya kisalu lenda sala na nsi ya kiyeka ya mfumu mosi ya nku. Kansi, yandi kele ti dibaku ya kumonisa mawi na yandi na munkwa kompani, yina kele muntu mosi ya mbote mpi ya bukatikati. Munkwa kompani kendimisa muntu yina ya kisalu nde yandi kebakisa mpasi na yandi mpi mezabisa yandi nde ntama mingi ve yandi takatula mfumu yina ya kisalu. Inki mutindu muntu yina ya kisalu takudiwa? Kukwikila dyambu yina mpi kuzaba mambu yina tasalama takumisa ngolo lukanu na yandi ya kulanda na kusala, ata nkutu yandi fwete kutana ti bampasi yankaka na ntangu yandi kevingila. Mutindu mosi, beto kezaba nde Yehowa kebakisa bampasi na beto, mpi kendimisa beto nde ntama mingi ve yandi ‘takula mfumu ya nsi-ntoto yai.’ (Yoa. 12:31) Nsangu yai kepesa kikesa mpenza!

13. Katula kusamba, inki yankaka beto fwete sala?

¹³ Keti beto fwete suka kaka na kuzabisa Yehowa makambu na beto na kisambu? Ve. Yo kelomba kusala mambu mingi. Beto fwete sala mambu na kuwakana ti bisambu na beto. Ntangu Ntotila Saule kutindaka bantu na nzo ya Davidi sambu na kufwa yandi, Davidi kusambaka nde: “Nzambi na mono, gulusa mono na bambeni na mono, tanina mono na bantu yina ke nwanisa mono. Katula mono na maboko ya bantu yina ya mbi, gulusa mono na bantu yina ke fwaka bantu.” (Nk. 59:2, 3) Katula kusamba, Davidi kuwilaka nkento na yandi mpi kusalaka mambu yina kuvandaka mfunu sambu na kuguluka. (1 Sam. 19:11, 12) Mutindu mosi, beto lenda samba sambu na kulomba mayele yina tasadisa beto na kunwana ti mpasi na beto mpi ziku kutomisa luzingu na beto.​—Yak. 1:5.

Mutindu Beto Lenda Vanda ti Kikesa ya Kukanga Ntima

14. Inki lenda sadisa beto na ntangu beto mekutana ti bampasi?

¹⁴ Mbala yankaka bampasi na beto tamana ve na mbala mosi. Yo lenda nkutu kulanda na kuyangisa beto tii na ntangu mosi buna. Kana yo kele mpidina, inki tasadisa beto na kukanga ntima? Ntete, beto fwete zaba nde ntangu beto kelanda na kusadila Yehowa na kwikama yonso ata bampasi kele, beto kemonisaka zola na beto sambu na yandi. (Bis. 14:22) Kuvila ve mambu yina Satana kukusilaka Yobi: “Keti Yobi lenda lemfukila nge na mpamba, kukonda kima? Si nge ke kebaka yandi ti fami na yandi ti bima yonso ya yandi ke na yo. Nge ke salaka yandi mbote na mambu yonso ya yandi ke salaka; nge me pesaka yandi mpi bambisi mingi, yo me fuluka na ntoto ya mvimba. Kansi ntangu yai, meka fioti na kubotula bima yonso ya yandi ke na yo, nge ta mona nde yandi ta finga nge na meso ya bantu yonso!” (Yobi 1:9-11) Na nsadisa ya kwikama na yandi, Yobi kumonisaka nde mambu yina kuvandaka luvunu mpenza. Kana beto kekanga ntima na bampasi, beto mpi ke na dibaku ya kumonisa nde Satana kele muntu ya luvunu. Ebuna, kukanga ntima na beto kekumisaka ngolo kivuvu na beto mpi ntima yina beto ketulaka na Nzambi.​—Yak. 1:4.

15. Inki bambandu lenda pesa beto kikesa?

¹⁵ Ya zole, beto fwete vila ve nde “bampangi na [beto] yina me mwanganaka na bansi yonso bo ke monaka mpasi mpi ya kiteso mosi.” (1 Pie. 5:9) Ee, “konso mpukumunu yina me kwisila [beto], yo kele kaka bonso bampukumunu yina ke kwisilaka bantu yonso.” (1 Kor. 10:13) Yo yina, nge lenda baka ngolo ti kikesa kana nge keyindulula bambandu ya bantu yankaka, na kisika ya kutula dikebi kaka na bampasi na nge. (1 Tes. 1:5-7; Baeb. 12:1) Baka ntangu ya kuyindulula bambandu ya bantu yina nge zaba, yina mekangaka ntima na kwikama yonso ata bo kutanaka ti bampasi ya ngolo. Keti nge mesosaka dezia masolo yina ketubilaka luzingu ya bantu yina kevandaka na mikanda na beto sambu na kuzaba mambu ya mpasi yina bo kutanaka na yo, mpi ya kele kiteso mosi ti ya nge? Yo lenda pesa nge kikesa mingi.

16. Inki mutindu Nzambi kepesaka beto kikesa ntangu beto mekutana ti bampasi ya mutindu na mutindu?

¹⁶ Ya tatu, kuvila ve nde Yehowa kele “Tata yina ke wilaka beto mawa. Lusadisu na beto yonso ke katukaka na yandi. Yandi muntu ke sadisaka beto na bampasi na beto ya mutindu na mutindu na mpila nde beto mpi lenda sadisa bantu ya nkaka na bampasi na bo ya mutindu na mutindu. Beto ke sadisaka bo na lusadisu yina ya Nzambi pesaka beto.” (2 Kor. 1:3, 4) Yo kele bonso nde Nzambi metelama penepene na beto sambu na kupesa beto ngolo ti kikesa, kaka ve na ntangu beto mekutana ti mpasi mosi buna, kansi “na bampasi na beto ya mutindu na mutindu.” Ebuna, dyambu yai kesadisaka beto na kupesa bankaka kikesa “na bampasi na bo ya mutindu na mutindu.” Polo kubakisaka mpenza bukyeleka ya bangogo yai.​—2 Kor. 4:8, 9; 11:23-27.

17. Inki mutindu Biblia lenda sadisa beto na kumanisa bampasi yina kekuminaka beto na luzingu?

¹⁷ Ya iya, beto kele ti Biblia, Ndinga ya Nzambi, yina kele “mfunu sambu na kulonga, sambu na kunganina, sambu na kuvutula mambu na ndonga, sambu na kupesa disipline na lunungu, na mpila nde muntu ya Nzambi lenda vanda ya kukuka mpenza, mpi ti mambu yonso sambu na konso kisalu ya mbote.” (2 Tim. 3:16, 17, NW) Ndinga ya Nzambi kekumisaka beto kaka ve “ya kukuka” mpi “ti mambu yonso sambu na konso kisalu ya mbote.” Yo kesadisaka beto mpi na kunwana ti bampasi ya luzingu. Yo kekumisaka beto “ya kukuka mpenza, mpi ti mambu yonso.” Ngogo ya kisina ya bo balulaka nde ‘vanda ti mambu yonso’ ketendula “kuvanda na bima yonso yina kele mfunu.” Na ntangu ya ntama, bo vandaka kusadila ngogo yai sambu na kutubila maswa yina kele na bima yonso ya kele mfunu sambu na kusala nzyetelo to sambu na kutubila mashini yina lendaka kusala konso kima yina bo kezola nde yo sala. Mutindu mosi, na nzila ya Ndinga na yandi, Yehowa kepesaka beto mambu yina beto kevandaka na yo mfunu sambu na kumanisa konso dyambu yina mekumina beto. Yo yina, beto lenda tuba nde “Kana Nzambi mepesa nzila nde mpasi mosi kukumina munu, mu lenda kanga ntima na lusadisu na yandi.”

Luguluku na Bampasi na Beto Yonso

18. Kuyindula na nki tasadisa beto dyaka na kukanga ntima na kwikama yonso?

¹⁸ Ya tanu: Yindulaka ntangu yonso dyambu yai ya kitoko nde ntama mingi ve Yehowa tagulusa bantu na bampasi yonso. (Nk. 34:20; 37:9-11; 2 Pie. 2:9) Nsukansuka, luguluku yina Nzambi tanatila beto tavanda kaka ve sambu na bampasi ya beto kemona ntangu yai, kansi beto mpi kele ti dibaku ya kuzinga mvula na mvula, yo vanda na zulu ti Yezu to na paladisu ya ntoto.

19. Inki lenda sadisa beto na kukanga ntima?

¹⁹ Kansi, na ntangu beto kevingila mambu yina, beto kelanda na kunwana ti bampasi ya ngidika yai ya mbi. Beto kevingila na kyese yonso ntangu bampasi yina yonso tavanda dyaka ve! (Nk. 55:7-9) Beto vila ve nde kana beto kekanga ntima na kwikama yonso, beto kemonisa nde Dyabulu kele muntu ya luvunu. Bika beto baka kikesa na nsadisa ya bisambu ti ya bampangi na beto Bakristu, mpi kuzaba ntangu yonso nde bampangi na beto kekutana mpi ti bampasi ya mutindu mosi. Beto landa na kuvanda ya kukuka mpenza, mpi ti mambu yonso sambu na konso kisalu ya mbote na kusadilaka mbote Ndinga ya Nzambi. Kubika ve ata fyoti nde ntima ya beno ketulaka na ‘lusadisu yonso’ yina Nzambi kepesaka kulemba. Kuvila ve nde Yehowa “ke talaka mbote bantu ya mbote, makutu na yandi ke waka kudila na bo.”​—Nk. 34:16.

Keti Nge Lenda Pesa Mvutu?

• Inki mutindu Davidi kudiwaka sambu na bampasi yina yandi kutanaka na yo?

• Ntotila Salomo kutulaka ntima na inki?

• Inki lenda sadisa beto na kunwana ti bampasi yina Yehowa kepesa nzila?

[Kifwanisu ya kele na lutiti 19]

Salomo kutulaka ntima nde Yehowa tasadisa bantu na yandi yina kemona mpasi