DISOLO YINA KELE NA LUTITI YA ZULU: MAMBU YINA BETO KE LONGUKA NA MOIZE
Moize Vandaka Nani?
Inki ke kwisilaka nge na mabanza ntangu nge ke waka zina Moize? Keti nge ke yindulaka . . .
bebe yina mama na yandi bumbaka yandi na kati ya kitunga mosi na Nzadi Nile?
mwana-bakala yina yelaka na kimvwama ya Ezipte na maboko ya mwana ya Farao ya nkento—kansi vilaka ve nde yandi vandaka muntu ya Izraele?
muntu yina salaka kisalu ya kingungudi na Madiani na nsungi ya bamvula 40?
muntu yina solulaka ti Yehowaa na ntwala ya mwa-nti yina vandaka kupela tiya?
muntu yina telamaka na ntwala ya ntotila ya Ezipte mpi na kikesa yonso lombaka yandi na kubasisa bantu ya Izraele na kimpika?
muntu yina, na lusadisu ya Nzambi, zabisaka Bandola Kumi na Ezipte ntangu ntotila yina vwenzaka Nzambi ya kieleka?
muntu yina twadisaka bantu ya Izraele ntangu bo basikaka na Ezipte?
muntu yina Nzambi sadilaka sambu na kukabula Nzadi-Mungwa ya Mbwaki?
muntu yina pesaka bantu ya Izraele Bansiku Kumi yina katukaka na Nzambi?
MOIZE kutanaka ti mambu yina yonso mpi mingi ya nkaka. Yo yina, Bakristu, Bamizuluma, mpi Bayuda ke zitisaka nsadi yai ya kwikama!
Yo ke pwelele nde, Moize vandaka profete yina salaka “mambu ya nene ti ya boma.” (Kulonga 34:10-12) Yandi bikaka nde Nzambi kusadila yandi na mutindu ya kuyituka. Ata mpidina, Moize vandaka bonso bantu yonso. Kaka bonso profete Elia, yina monanaka na lueka na yandi na mbona meso mosi na nsungi ya kisalu ya Yezu na ntoto, Moize vandaka “ti mawi bonso ya beto.” (Yakobo 5:17; Matayo 17:1-9) Moize kutanaka ti bampasi yina beto ke kutanaka ti yo bubu yai, kansi yandi nungaka yo.
Keti nge ta zola kuzaba mutindu yandi salaka yo? Beto ta tadila bikalulu tatu ya mfunu yina Moize monisaka mpi mambu yina beto lenda longuka na mbandu na yandi.
a Yehowa kele zina ya Nzambi mutindu Biblia ke monisa yo.