NIMERO YA KULONGUKA

MASOLO YA KULONGUKA

▪ Lungisa Mukumba na Nge Bonso Nsamuni

Kuvanda nsamuni ke tendula nki? Disolo yai ke pesa mvutu na ngiufula yina mpi ke monisa kikuma yina bantu kele na mfunu ya kuwa nsangu ya mbote. Yo ke tendula mpi mutindu beto lenda lungisa mbote-mbote mukumba na beto bonso bansamuni.

▪ Keti Nge Kele “Kikesa Sambu na Bisalu ya Mbote”?

Disolo yai ke tubila mitindu zole yina ‘kikesa na beto sambu na bisalu ya mbote’ ke pusaka bantu na kukwisa na Nzambi. (Tito 2:14) Mutindu mosi kele na nzila ya kisalu na beto ya kusamuna. Mutindu ya nkaka kele na nzila ya bikalulu na beto ya mbote.

▪ Beno Kumisa Makwela na Beno Ngolo na Kusolulaka Mbote

▪ Bibuti mpi Bana—Beno Solula na Zola Yonso

Kusolula mbote kele mfunu sambu nde bankwelani kuvanda ti makwela ya kiese mpi luzingu ya mbote ya dibuta. Disolo ya ntete ke tubila bikalulu yina lenda sadisa beto na kusolula mbote. Disolo ya zole ke monisa mambu yina beto lenda sala sambu na kununga mambu yina ke kangaka bibuti mpi bana nzila na kusolula mbote.

▪ Sala Bansola ya Mayele Sambu na Kutanina Difwa na Nge

Inki difwa ya kimpeve ke vingila Bakristu? Inki dilongi beto lenda baka na yina me tala difwa na beto na mbandu ya lukebisu ya Ezau? Inki bitambi beto fwete sala yina ta sadisa beto na kusala bansola ya mayele sambu na difwa na beto? Disolo yai ke pesa bamvutu na bangiufula yina.