Bankuluntu Keti Beno Ta Pesa Kikesa na “Bantu Yina Me Lemba”?

Angela,a mpangi-nkento mosi ya mpumpa yina vandaka ti bamvula kuluta 30, vandaka na boma. Yandi vandaka kuvingila bankuluntu. Inki mambu bo ta zabisa yandi? Ya kieleka, yandi vandaka ve kukwenda na balukutakanu ya nkaka, sambu yandi vandaka kulemba na nima ya kulutisa kilumbu ya mvimba na kusala kisalu ya kusadisa minunu. Diaka, katula basusi na yandi ya konso kilumbu, yandi vandaka kudiyangisa sambu na mavimpi ya mama na yandi.

Kana yo lombaka nde nge kwenda kutala Angela, inki mutindu nge zolaka kupesa kikesa na ‘muntu yai ya me lemba’? (Yer. 31:25) Ntete, nki mutindu nge ta kudibongisa sambu na kusala viziti ya kingungudi?

BENO YINDULA MAMBU YINA BAMPANGI NA BENO KE KUTANA TI YO

Bantangu ya nkaka, beto yonso ke lembaka sambu na kisalu na beto ya kinsuni to mikumba ya dibundu. Mu mbandu, “ngolo manaka” profete Daniele ntangu yandi monaka mbona-meso yina yandi lendaka ve kubakisa. (Dan. 8:27) Yandi bakaka lusadisu ntangu yandi monaka wanzio Gabriele. Kinati-nsangu ya Nzambi pesaka Daniele mayele mpi ndimisaka yandi nde Yehowa waka bisambu na yandi, mpi zabisaka yandi nde Nzambi “ke zolaka nge.” (Dan. 9:21-23) Na dibaku mosi, wanzio ya nkaka ponaka bangogo ya mbote sambu na kupesa profete yina lembaka nitu kikesa.​—Dan. 10:19.

Mutindu mosi, na ntwala ya kukwenda kutala mpangi-Mukristu yina me lemba nitu, baka ntangu ya kuyindula mambu na yandi. Inki bampasi yandi ke kutana ti yo? Inki mutindu bampasi yango lenda lembisa yandi? Inki bikalulu ya mbote yandi ke monisaka? Richard yina kele nkuluntu tuka bamvula kuluta 20 ke tuba nde: “Mono ke tulaka dikebi na kupesa bampangi na mono kikesa.” Yandi ke yika nde: “Kutadila na dikebi yonso mambu yina bampangi ke kutana ti yo na ntwala ya kusala viziti, ke salaka nde yo vanda pete na kuzwa mitindu ya kupesa kikesa ya me fwana ti bampusa na bo.” Kana nkuluntu ya nkaka ta fidisa nge na viziti, sambu na nki ve kutadila kumosi mambu ya bampangi na nge?

BENO BWISA NTIMA YA BAMPANGI NA BENO

Ziku, nge ta mona nde kuzabisa bantu ya nkaka mawi na nge lenda vanda nsoni. Mu mbandu, mpangi na nge lenda mona mpasi na kusolula ti bankuluntu yina me kwisa kutala yandi. Kansi, inki mutindu nge lenda nunga diambu yina? Kusekisa yandi na masonga yonso mpi mwa bangogo ya ke ndimisa lenda vanda ti bupusi ya mbote. Micheal yina kele nkuluntu tuka bamvula kuluta 40, ke yantikaka viziti na yandi mbala mingi ti bangogo bonso yai: “Nge ke zaba, dibaku mosi ya kuluta nene ya nkuluntu kele kukwenda kutala bampangi na banzo na bo mpi kuzaba bo mbote kuluta. Yo yina, mono yindulaka na ntwala sambu na viziti na beto ya bubu.”

Nge lenda sala kisambu ya ke simba ntima na kuyantika viziti. Na bisambu na yandi, ntumwa Polo monisaka mbote lukwikilu ya bampangi na yandi, zola na bo, mpi kukanga-ntima. (1 Bate. 1:2, 3) Ntangu nge ke tuba mutindu nge ke kudiwaka sambu na bikalulu ya mbote ya bampangi na nge, nge ke yidika ntima na nge mpi ya mpangi na nge sambu na disolo yina lenda pesa kikesa. Bangogo na nge lenda lembika yandi. Ray, nkuluntu mosi ya kele ti eksperiansi ke tuba nde: “Na bantangu mosi buna, konso muntu lenda vila mambu ya mbote yina yandi ke salaka. Yo yina ntangu bo ke yibusaka beto yo, yo ke pesaka beto kikesa.”

BENO PESA DIKABU YA KIMPEVE

Bonso Polo, beno lenda pesa “dikabu ya kimpeve” ntangu beno ke tadila dibanza mosi ya Biblia ata nkutu verse mosi. (Bar. 1:11) Mu mbandu, mpangi yina me lemba nitu lenda kudiwa ya kukonda mfunu, bonso muyimbi-bakunga yina kudifwanisaka ti “dibungu ya mukanda ya mbisi yina me kauka na midinga.” (Nk. 119:83, 176) Na nima ya kupesa mwa ntendula ya bangogo yai, nge lenda monisa yandi nde nge ke tudila yandi ntima nde yandi me “vilaka ve” bansiku ya Nzambi.

Mutindu mosi, keti mbandu ya badrakime ya bibende yina vilaka ta simba ve ntima ya mpangi-nkento mosi yina me vila nzila na dibundu to me lembaka nitu? (Luka 15:8-10) Kuvidisa dimbuma mosi kaka ya mayaka ya ntalu lenda vanda mfunu na kati ya bambuma ya nkaka ya mayaka ya ntalu. Ntangu beno ke tadila mbandu yina, yandi lenda baka lusadisu na kumona nde yandi kele mfunu na dibundu. Na nima ya kutadila yo, nge lenda benda dikebi na mutindu Yehowa ke kudibanzaka sambu na yandi bonso dimeme na yandi ya fioti.

Bampangi na beto ke sepelaka mbala mingi na kumonisa mabanza na bo na kati ya Biblia. Kutuba ve kaka nge mosi! Na nima ya kutanga verse mosi yina me fwana sambu na bo, nge lenda basisa bangogo to nsa ya mfunu mpi kulomba yandi na kupesa komantere. Mu mbandu, na nima ya kutanga 2 Bakorinto 4:16, nkuluntu lenda yula nde: “Keti nge me monaka dezia mitindu Yehowa ke kumisaka nge ya mpa?” Kusala mpidina lenda nata na ‘kupesana kikesa.’​—Bar. 1:12.

Nge lenda pesa mpi mpangi Mukristu kikesa ntangu beno ta solula disolo ya muntu mosi ya Biblia yina yandi lenda tubila. Muntu mosi yina me lemba nitu lenda tubila muntu bonso Ana to Epafrodite, bayina bantangu ya nkaka lembaka nitu kansi bo vandaka mfunu na meso ya Nzambi. (1 Sam. 1:9-11, 19, 20; Bafi. 2:25-30) Sambu na nki ve kutubila mwa bambandu ya mbote ya Biblia kana mpila kele?

BENO LANDA NA KUMONISILA BO DIKEBI

Nge lenda landa kumonisila bampangi na nge ya babakala ti ya bankento dikebi na nge ya masonga na nima ya kusala viziti. (Bis. 15:36) Ntangu nge ke manisa viziti, yo lenda vanda mbote nde beno wakana sambu na kusamuna kumosi. Ntangu Bernard nkuluntu mosi yina kele ti eksperiansi ke kutanaka diaka ti mpangi mosi yina yandi me katuka kutala ntama mingi ve, yandi ke tubilaka ndongisila mosi ya yandi pesaka na kuyula na mayele yonso nde: “Zabisa mono kana mambu lutaka mbote?” Kana nge ke monisa dikebi ya mutindu yai, nge ta zaba kana lusadisu ya nkaka kele mfunu.

Kuluta yonso, bampangi na beto ya babakala ti ya bankento ke zolaka kudiwa nde bankuluntu ke kebaka bo, ke bakisaka bo mpi ke zolaka bo. (1 Bate. 5:11) Yo yina, na ntwala ya kusala viziti ya kingungudi, baka ntangu ya kuyindulula na mambu ya mpangi na nge. Sala kisambu sambu na viziti. Pona baverse ya kufwana. Ebuna, nge ta zwa bangogo ya me fwana sambu na kupesa kikesa na “bantu yina me lemba”!