Babakala Beno Kumisa Banzo na Beno Kisika Mosi ya Ngemba

INKI mambu bakala fwete sala sambu nkento na yandi kuvanda na ngemba? Bantu mingi ke yindulaka nde mukumba ya ntete ya bakala ke vandaka ya kusadisa dibuta na yandi na mambu ya mbongo. Kansi, bankento ya nkaka ya kele ti bima mingi ya kinsuni ke vandaka ve na ngemba mpi ke vandaka boma-boma. Rosa, nkento mosi ya Espania ke tuba mambu yai sambu na bakala na yandi: “Yandi ke vandaka mbote ti bantu ya nkaka kansi na nzo yandi ke vandaka makambu ngolo.” Joy, nkento mosi ya Nigéria ke tuba nde: “Ntangu mono ke wakanaka ve ti bakala na mono na diambu mosi buna, yandi ke tubaka nde ‘nge fwete sala mambu yonso ya mono ke songa nge sambu mono kele bakala na nge.’”

Inki mutindu bakala lenda lungisa mukumba na yandi na zola yonso? Inki mambu bakala fwete sala sambu nzo na yandi kuvanda kisika mosi ya ngemba mpi ya kupema sambu na nkento na yandi?—Ruti 1:9.

MAMBU YINA BIBLIA KE TUBAKA SAMBU NA KIYEKA YA BAKALA

Ata bakala ti nkento ke vandaka kiteso mosi na meso ya Nzambi, Biblia ke tubaka nde konso nkwelani kele ti mukumba na dibuta. Mukanda ya Baroma 7:2 ke tuba nde nkento ya makwela kele na nsi ya “nsiku ya bakala na yandi.” Kaka mutindu bimvuka mingi ke tulaka bamfumu sambu na kutwadisa bisalu, Nzambi mpi me tulaka bakala sambu na kuvanda mfumu ya nkento na yandi. (1 Bakorinto 11:3) Babakala fwete twadisa banzo na bo.

Nki mutindu babakala fwete sadila kiyeka yina Nzambi me pesaka bo? Biblia ke tuba nde: “Beno landa na kuzola bankento na beno, kaka mutindu Kristu mpi zolaka dibundu.” (Baefezo 5:25) Ata Yezu Kristu kwelaka ve, mbandu na yandi lenda sadisa nge na kuvanda bakala ya mbote. Inki mutindu?

LUZINGU YA YEZU KELE MBANDU MOSI YA MBOTE SAMBU NA BABAKALA

Yezu vandaka kupesa bantu kikesa mpi kusadisa bo. Yezu silaka bantu yonso ya bo vandaka kuniokula mpi ya vandaka kudiyangisa sambu na mambu na bo nde: “Beno kwisa na mono, . . . ebuna mono ta pesa beno kikesa.” (Matayo 11:28, 29) Mbala mingi, yandi vandaka kulembika bampasi ya bantu mpi vandaka kusadisa bo na kukwenda pene-pene na Nzambi. Ntembe kele ve nde bantu vandaka kukwenda na Yezu ti kivuvu nde yandi ta sadisa bo!

Mutindu babakala lenda landa mbandu ya Yezu. Sosa mabaku ya kusadisa nkento na nge. Bankento ya nkaka ke kudiwaka bonso Rosa ya vandaka kubokuta nde: “Mono vandaka muntu ya kisalu ya bakala na mono.” Kansi Kweku, bakala mosi ya kele na makwela ya mbote ke tuba nde: “Mbala mingi, mono ke yulaka nkento na mono kima ya mono lenda sala sambu na kusadisa yandi. Sambu mono ke zolaka yandi, mbala mingi mono ke sadisaka yandi na bisalu ya nzo.”

Yezu vandaka kuwila bantu mawa mpi kuditula na kisika na bo. Nkento mosi niokwamaka ti maladi ya mbi bamvula 12. Ntangu nkento yango waka nde Yezu ke sala bimangu, “yandi vandaka kutuba nde: ‘Kana mono simba ata bilele na yandi ya zulu, mono ta beluka.’” Yandi vandaka ti kikuma ya kutuba mambu yai. Yandi kwendaka pene-pene na Yezu, simbaka malenda ya bilele na yandi mpi belukaka na mbala mosi. Ziku, bantu yina monaka mambu ya nkento yai salaka, tubaka nde nkento yango zitisaka ve Yezu. Kansi, Yezu bakisaka nde nkento yango vandaka na mpasi.a Yezu zabisaka yandi na mawete yonso nde: “Mwana na mono, . . . beluka na maladi na nge ya mpasi.” Yezu pesaka ve nkento yango nsoni, nganinaka yandi ve kansi yandi belulaka maladi na yandi. Yezu monisaka kimuntu na yandi disongidila muntu ya vandaka kuditula na kisika ya bantu ya nkaka.​—Marko 5:25-34.

Mutindu babakala lenda landa mbandu ya Yezu. Kana nkento na nge ke wa ve nitu mbote, tudila yandi dikebi ya ngolo mpi vanda ntima-nda. Kuditula na kisika na yandi mpi bakisa kikuma yina ke pusa yandi na kusadila nge mambu na mutindu mosi buna. Mu mbandu, Ricardo ke tuba nde: “Kana mono me bakisa nde nkento na mono me wa makasi to kele kiseku-kiseku, mono ke salaka ngolo na kutuba ve mambu yina lenda sala diaka nde yandi wa makasi mingi.”

Yezu vandaka kusolula ti balongoki na yandi. Yezu vandaka kusolula mingi ti banduku na yandi. Yandi tubaka nde: “Mambu yonso ya mono waka na Tata na mono, mono me zabisaka beno yo.” (Yoane 15:15) Yo kele kieleka nde na bantangu ya nkaka, Yezu vandaka kuzola kuvanda na kingenga sambu na kusamba. Kansi, yandi vandaka kuzabisa balongoki na yandi mbala mingi mambu yina vandaka na ntima na yandi. Na mpimpa ya nsuka na ntwala nde bo fwa yandi bonso muntu ya mbi, Yezu zabisaka balongoki na yandi na masonga yonso nde yandi vandaka “na mawa mingi.” (Matayo 26:38) Ata balongoki na yandi vandaka kusala mambu ya nkaka ya vandaka kupesa yandi mpasi, Yezu yambulaka ve kusolula ti bo.​—Matayo 26:40, 41.

Mutindu babakala lenda landa mbandu ya Yezu. Zabisa nkento na nge mambu yina kele na ntima na nge. Nkento ya nkaka lenda bokuta nde bakala na yandi ke solulaka kukonda mpasi ti bantu ya nkaka kansi yandi ke vandaka pima na nzo. Tala mutindu Ana ke kudiwaka ntangu bakala na yandi ke kangudilaka yandi ntima: “Mono ke bakisaka nde yandi ke zolaka mono mpenza mpi mono ke kudiwaka pene-pene na yandi.”

Kupesa ve nkento na nge ndola ya kukonda kutubisa yandi. Nkento mosi ke tuba nde: “Ntangu bakala na mono vandaka kuwila mono kiseku, yandi vandaka kutubisa mono diaka ve bilumbu mingi. Yandi vandaka kusala nde mono kudiwa bonso muntu me nata makambu mpi kudimona mpamba.” Edwin, bakala ya ke landaka mbandu ya Yezu ke tuba nde: “Kana mono me wa makasi, mono ke tubilaka ve diambu yango na ntangu yina. Kansi, mono ke sosaka ntangu ya mbote sambu beto solula diambu yango mpi kumanisa yo.”

Joy ya beto me tubila na luyantiku ya disolo yai me monaka nde tuka bakala na yandi me yantikaka kulonguka Biblia ti Bambangi ya Yehowa, yandi me sobaka. Joy ke tuba diaka nde: “Bakala na yandi me kumaka kulanda mbandu ya Yezu; yandi me sobaka mpi ke salaka ngolo sambu na kuvanda bakala ya zola.” Bankwelani mingi ke bakaka mambote na malongi ya Biblia. Keti nge mpi ke zola kubaka mambote ya malongi yango? Nge lenda lomba Mbangi ya Yehowa mosi na kulonguka Biblia ti nge..