INKI MAMBU BIBLIA KE TUBAKA?

Inki ke kuminaka beto kana beto me fwa?

BANTU YA NKAKA KE KWIKILAKA nde beto ke landaka kuzinga na mutindu ya nkaka, mpi bankaka ke monaka nde lufwa kele nsuka ya mambu yonso. Inki kele dibanza na nge?

MAMBU YINA BIBLIA KE TUBAKA

“Bafwa ke zabaka kima ve.” (Longi 9:5) Ntangu beto ke fwaka, beto ke zingaka diaka ve.

MAMBU YA NKAKA YA BETO KE LONGUKA NA BIBLIA

• Ntangu Adami muntu ya ntete fwaka, yandi vutukaka na mfututu. (Kuyantika 2:7; 3:19) Kiteso mosi mpi, bantu yonso yina ke fwaka ke vutukaka na mfututu.​—Longi 3:19, 20.

• Bantu yina ke fwaka ke futaka mfuka ya masumu na bo, disongidila bo ke katukaka na kimpika ya masumu na bo. (Baroma 6:7) Kana muntu me fwa, ndola ya nkaka kele ve sambu na masumu.

Keti bafwa lenda zinga diaka?

INKI MVUTU NGE TA PESA?

• Ee

• Ve

• Mbala ya Nkaka

MAMBU YINA BIBLIA KE TUBAKA

‘Bantu ta futumuka.’​—Bisalu 24:15.

INKI MAMBU YA NKAKA BETO LENDA LONGUKA NA BIBLIA?

• Mbala mingi Biblia ke fwanisaka lufwa ti mpongi. (Yoane 11:11-14) Nzambi lenda tedimisa bafwa, kaka mutindu beto lenda tedimisa muntu yina kele na mpongi.​—Yobi 14:13-15.

• Biblia ke tubilaka bantu mingi yina futumukaka, mpi yo ke pesa beto kikuma ya ngolo ya kukwikila nde bafwa ta telama.​—1 Bantotila 17:17-24; Luka 7:11-17; Yoane 11:39-44.