Watchtower MIKANDA YA KE NA INTERNET
Watchtower
MIKANDA YA KE NA INTERNET
Kikongo (Rép. dém. du congo)
  • BIBLIA
  • MIKANDA
  • BALUKUTAKANU
  • wp16 mai lut. 4
  • Keti Kudila Kele Mbi?

Kele ve ti video sambu na mambu ya nge ke sosa.

Kifu me salama na ntangu ya kubaka video.

  • Keti Kudila Kele Mbi?
  • Nzozulu ya Nkengi Kesamunaka Kimfumu ya Yehowa (Nimero ya Bantu Yonso)—2016
  • Mambu ya Mutindu Mosi
  • Keti Yau Kele Mbi na Kudiwa Mutindu Yai?
    Ntangu Muntu ya Nge Kezolaka Mefwa
  • Masolo ya Ke na Kati: Lusadisu Sambu na Bantu Yina Me Bwila Mpasi ya Lufwa
    Telama!—2018
  • Inki Mutindu Mono Lenda Kuzinga Ti Mawa na Mono?
    Ntangu Muntu ya Nge Kezolaka Mefwa
  • Kukanga Ntima na Mpasi
    Nzozulu ya Nkengi Kesamunaka Kimfumu ya Yehowa—2008
Tala Mambu Mingi
Nzozulu ya Nkengi Kesamunaka Kimfumu ya Yehowa (Nimero ya Bantu Yonso)—2016
wp16 mai lut. 4

DISOLO YINA KELE NA LUTITI YA ZULU | NTANGU MUNTU YA BETO KE ZOLAKA ME FWA

Keti Kudila Kele Mbi?

Keti nge me belaka dezia maladi mosi yina salaka ntangu fioti? Ziku nge belukaka nswalu, mpi nge ke yibuka yo nkutu ve. Kansi, yo kele ve kiteso mosi ti mpasi yina beto ke waka kana muntu me fwa. Munganga mosi na zina ya Alan Wolfelt sonikaka na mukanda na yandi (Healing a Spouse’s Grieving Heart) nde: “Yo kele pete ve sambu mpasi yina lufwa ke nataka ‘kumana.’” Kansi yandi tubaka diaka nde: “Mpasi yango ta lembama na nima ya ntangu mingi mpi ti lusadisu ya bantu ya nkaka.”

Mu mbandu, beto tadila mambu yina Abrahami salaka ntangu nkento na yandi fwaka. Biblia ke tuba nde: “Abrahami yantikaka kuwa mawa sambu na Sara mpi kudila yandi.” Ngogo “yantikaka” ke monisa nde bilumbu mwa mingi lutaka sambu Abrahami kukanga ntima na mpasi yina lufwa ya nkento na yandi nataka.a Beto tadila mpi mbandu ya Yakobi. Bo kusaka yandi nde mbisi mosi ya mfinda fwaka mwana na yandi Yozefi. Yandi dilaka “bilumbu mingi,” mpi bantu ya dibuta na yandi kukaka ve kulembika yandi. Bamvula mingi na nima, yandi vandaka kaka kuyindula lufwa ya Yozefi.—Kuyantika 23:2; 37:34, 35; 42:36; 45:28.

Abrahami ke dila na lweka ya mvumbi ya Sara

Abrahami dilaka mingi ntangu nkento na yandi Sara fwaka

Bubu yai, yo kele mpi kiteso mosi sambu na bantu mingi yina me fwilaka bantu ya bo vandaka kuzola mingi. Beto tadila bambandu yai zole.

  • “Bakala na mono Robert fwaka na aksida na Yuli 9, 2008. Kilumbu yina yandi fwaka vandaka bonso bilumbu ya nkaka. Beto diaka na suka, mutindu vandaka kikalulu na beto na ntwala nde Robert kukwenda na kisalu. Na nima, beto pesanaka beze, beto yambanaka, mpi mono songaka yandi nde: ‘Mono ke zolaka nge.’ Yandi mpi tubaka kiteso mosi. Bamvula sambanu me luta, kansi mono ke waka kaka mpasi na ntima. Mono me zaba ve kana mono ta kuka kukanga ntima na mpasi yina lufwa ya Rob me nataka.”—Gail, ya kele ti bamvula 60.

  • “Ata yo me sala bamvula kuluta 18 banda nkento na mono me fwaka, mono ke waka kaka nzala na yandi mpi lufwa na yandi ke salaka mono kaka mpasi. Konso ntangu ya mono ke monaka kima mosi ya kitoko, mono ke yindulaka yandi mpi ke kuditubilaka nde yandi zolaka kusepela ti kima yina kana yandi vandaka na luzingu.”—Etienne, ya kele ti bamvula 84.

Yo kele pwelele nde kuwa mpasi ya mutindu yai bilumbu mingi kele mbi ve. Konso muntu ke waka mawa na mutindu na yandi, yo yina yo ta vanda mbote ve na kubakila muntu ngindu ya mbi sambu na mutindu na yandi ya kumonisa mawa. Kansi, beto fwete mona mbi ve kana beto ke mona bonso nde mutindu na beto ya kumonisa mawa kele ya kuluta ndilu. Inki mutindu beto lenda nunga mpasi yina lufwa ke nataka?

a Mpasi yina Izaki mwana ya Abrahami waka ntangu mama na yandi fwaka salaka mpi bilumbu mingi. Disolo “Landa Mbandu ya Lukwikilu na Bo” ya kele na Nzozulu ya Nkengi yai ke monisa nde bamvula tatu na nima ya lufwa ya mama na yandi Sara, Izaki vandaka kaka na mawa.—Kuyantika 24:67.

    Mikanda ya Kikongo (1982-2025)
    Basika
    Kota
    • Kikongo (Rép. dém. du congo)
    • Kabula
    • Mambu ya Nge Me Zola
    • Copyright © 2025 Watch Tower Bible and Tract Society of Pennsylvania
    • Bantuma ya Kulanda na Ntwala ya Kusadila
    • Bansiku ya Ke Tadila Kinsweki
    • Paramètres de confidentialité
    • JW.ORG
    • Kota
    Kabula