Zina ya Nzambi Kele Nani?

Kana nge ke zola kuzaba muntu mosi buna, ziku nge ta yula yandi ntete nde, “Zina na nge nani?” Kana nge yula Nzambi ngiufula yai, nki yandi ta tuba?

“Mono kele Yehowa. Yo yina zina na mono.”​—Yezaya 42:8.

Keti yo kele mbala na nge ya ntete ya kuwa zina yai? Ziku yo lenda vanda mutindu yina, sambu bambaludi mingi ya Biblia ke sadilaka ve mingi zina ya Nzambi, bankaka nkutu ke sadilaka yo ve ata fioti. Mbala mingi bo ke yingisaka yo na titre “MFUMU.” Kansi, zina ya Nzambi kele mbala kiteso ya 7 000 na ndinga ya kisina ya Biblia. Zina yango kele ti bisono yai iya ya Kiebreo: YHWH to JHVH, mpi mbala mingi bo ke balulaka yo na Kikongo nde “Yehowa.”

Zina ya Nzambi kele na masonuku ya Kiebreo mpi na bambalula mingi

SAMBU NA NKI ZINA YA NZAMBI KELE MFUNU

Zina yai kele mfunu sambu na Nzambi yandi mosi. Ata muntu mosi ve pesaka Nzambi zina na yandi; yandi mosi muntu ponaka yo. Yehowa tubaka nde: “Yai kele zina na mono kimakulu, mpi bandonga ya bantu yonso yina ta kwisa ta yibukaka mono mutindu yina.” (Kubasika 3:15) Na Biblia, zina ya Nzambi kele mingi kuluta batitre na yandi bonso Nkwa-Ngolo Yonso, Tata, Mfumu, to Nzambi, mpi yo kele mingi kuluta bazina ya bantu ya nkaka mu mbandu Abrahami, Moize, Davidi, mpi Yezu. Diaka, Yehowa ke zolaka nde bantu kuzaba zina na yandi. Biblia ke tuba nde: “Bika bantu kuzaba nde nge, yina zina na nge kele Yehowa, nge mpamba kele Muntu ya Kuluta Zulu na ntoto ya mvimba.”​—Nkunga 83:18.

Zina yai kele mfunu sambu na Yezu. Na kisambu yina bo ke bingaka nde Tata na Beto to Kisambu ya Mfumu, Yezu longaka balongoki na yandi na kusamba Nzambi nde: “Zina na nge kuvanda ya santu.” (Matayo 6:9) Yezu yandi mosi sambaka Nzambi nde: “Tata, pesa zina na nge nkembo.” (Yoane 12:28) Sambu na Yezu, kupesa zina ya Nzambi nkembo vandaka mfunu mingi, yo yina yandi sambaka nde: “Mono me zabisaka bo zina na nge mpi mono ta zabisa yo.”​—Yoane 17:26.

Zina yai kele mfunu sambu na bantu yina me zaba Nzambi. Bansadi ya Nzambi na ntangu ya ntama zabaka nde lutaninu mpi luguluku na bo vandaka ti kuwakana ti zina ya Nzambi. Biblia ke tuba nde: “Zina ya Yehowa kele nzo-zulu ya ngolo. Muntu ya lunungu ke tinaka kuna mpi yandi ke bakaka lutaninu.” (Bingana 18:10) Yo ke yika nde: “Konso muntu yina ke binga zina ya Yehowa ta guluka.” (Yoele 2:32) Biblia ke monisa nde zina ya Nzambi ta sadisa bantu na kuzaba bansadi na yandi. Yo ke tuba nde: “Sambu bantu yonso ta tambula, konso muntu na zina ya nzambi na yandi, kansi beto, beto ta tambula na zina ya Yehowa Nzambi na beto mvula na mvula.”​—Mika 4:5; Bisalu 15:14.

ZINA YANGO KE MONISA INKI

Zina yai mpamba ke sadisaka bantu na kuzaba Nzambi. Bantu mingi ya mayele ke tubaka nde zina Yehowa ke tendula “Yandi Ke Kumaka.” Yehowa Nzambi pesaka ntendula ya zina na yandi ntangu yandi songaka Moize nde: “Mono Ta Kuma Yina Mono Ke Sola Kukuma.” (Kubasika 3:14) Zina ya Nzambi ke longa beto kaka ve nde Nzambi muntu salaka bima yonso. Zina na yandi ke monisa mpi makuki yina yandi kele ti yo ya kukuma mpi ya kukumisa bigangwa na yandi konso kima yina sambu na kulungisa lukanu na yandi. Batitre lenda monisa kiyeka ya Nzambi, to ngolo na yandi, kansi zina na yandi Yehowa mpamba ke monisaka kimuntu na yandi yonso mpi konso kima yina yandi lenda kuma.

Zina yai ke monisa nde Nzambi ke tudilaka beto dikebi. Ntendula ya zina ya Nzambi ke tadila zola na yandi ya mingi sambu na bigangwa na yandi, ti beto mpi. Diaka, mutindu Nzambi me salaka nde beto zaba zina na yandi, ke monisa nde yandi ke zolaka nde beto zaba yandi. Yo yina, yandi bakaka lukanu ya kusonga beto zina na yandi na ntwala nkutu nde beto yula yandi yo. Ya kieleka, Nzambi ke zolaka ve nde beto tadila yandi bonso nzambi yina beto lenda zaba ve mpi yina kele ntama ti beto, kansi yandi ke zolaka nde beto tadila yandi bonso muntu ya kieleka yina beto lenda pusana pene-pene ti yandi.​—Nkunga 73:28.

Kusadila zina ya Nzambi ke monisa nde beto ke tudilaka yandi dikebi. Mu mbandu, nge lenda lomba muntu yina nge ke zola kuta kinduku ti yandi na kubinga nge na zina na nge. Inki mutindu nge ta kudiwa kana yandi ke buya kaka na kusadila zina na nge? Ziku nge ta kudiyula kana yandi ke zola mpenza kukuma nduku na nge. Yo kele mutindu mosi ti Nzambi. Yehowa me songaka bantu zina na yandi, mpi yandi ke siamisaka beto na kusadila yo. Kana beto ke sadila yo, beto ta monisa Yehowa nde beto ke zola kukuma banduku na yandi. Nkutu yandi ke zabaka bantu yina “ke yindululaka [to, “ke bakaka na mbalu,” noti na nsi ya lutiti] zina na yandi”!​—Malaki 3:16.

Kuzaba zina ya Nzambi kele diambu ya ntete ya mfunu yina ke sadisaka beto na kuzaba yandi. Kansi beto fwete suka kaka ve na kuzaba zina na yandi. Beto fwete zaba kimuntu na yandi mpi kulonguka bikalulu na yandi.