Ntangu Kisumbula Me Salama

Andrew, na Sierra Leone, ke tuba nde: “Ntete beto waka mpasi mingi kibeni. Poto-poto mpi masa ya mvula bebisaka bima na beto yonso.”

David, na îles Vierges, ke tuba nde: “Ntangu mupepe ya ngolo bulaka, na nima beto vutukaka na nzo. Beto kutaka ve ata kima. Beto waka mpasi mingi. Mwana na mu ya nkento fukamaka mpi dilaka.”

KANA nge me kutanaka dezia ti kisumbula, ziku nge lenda bakisa mutindu bantu ya nkaka yina me kutanaka mpi ti yo ke kudiwaka: mpasi, kundima ve mambu yina me salama, kukuma kisaka-saka, susi, mpi bandosi ya ke pesa boma. Bantu mingi yina me kutanaka ti bisumbula ke vandaka kibeni ve ti kikesa, yo yina bo ke vandaka diaka ve na mfunu ya luzingu.

Kana nge me kutanaka ti mpasi yina kisumbula me natilaka nge, ziku nge lenda yindula nde nge me kuma na nsuka. Nge lenda kuma nkutu kuyindula nde luzingu na nge kele diaka ve na mfunu. Kansi, Biblia ke tuba nde luzingu na nge kele na mfunu mpi nde nge kele ti bikuma ya mbote ya kutula ntima nde nge ta vanda ti luzingu ya mbote na bilumbu ke kwisa.

KIELEKA YA BIBLIA KE PESAKA BETO KIVUVU

Longi 7:8 ke tuba nde: “Nsuka ya diambu ke vandaka mbote kuluta luyantiku na yo.” Nge lenda mona nde nge kele ve ti kivuvu ntangu nge me kutana ti mpasi ya kisumbula. Kansi, nge fwete sala kikesa sambu luzingu na nge kukuma diaka mbote.

Biblia ke tubila ntangu yina “milolo ya kudila to milolo ya mpasi ta wakana diaka ve.” (Yezaya 65:19) Mambu yai ta lungana ntangu ntoto ta kuma paladisu na nsi ya luyalu ya Kimfumu ya Nzambi. (Nkunga 37:11, 29) Bisumbula ta salama diaka ve. Basusi mpi bampasi yina bisumbula ke nataka ta katuka kimakulu, sambu Nzambi Nkwa-Ngolo Yonso ke sila nde: “Mambu ya ntama ta kwisa ve na mabanza, yo ta kwisa mpi ve na ntima.”—Yezaya 65:17.

Yindula fioti: Ngangi ke kana “kupesa [nge] makwisa mpi kivuvu,” disongidila luzingu ya ngemba na nsi ya luyalu ya Kimfumu ya Nzambi. (Yeremia 29:11) Keti kuzaba kieleka yai lenda sala nde luzingu kukuma kibeni na mfunu? Sally, yina beto tubilaka na disolo ya ntete, ke tuba nde: “Kuyibuka mambu yonso ya kitoko yina Kimfumu ya Nzambi ta sala sambu na beto na bilumbu ke kwisa, lenda sadisa nge na kuvila mambu ya ntama mpi na kukanga ntima na bampasi yina nge ke kutana ti yo bubu yai.”

Nge lenda longuka mambu mingi yina Kimfumu ya Nzambi ta sala ntama mingi ve sambu na bantu. Kana nge sala mutindu yai, nge ta ndima nde ata nge me kutana ti mpasi ya kisumbula, luzingu na nge kele na mfunu bubu yai ya nge ke vingila na kiese yonso ntangu yina bisumbula ta salamaka diaka ve. Kansi bubu yai, Biblia ke pesaka bandongisila ya mbote yina lenda sadisa nge na kukanga ntima na bampasi ya kisumbula. Beto tadila mwa bambandu.

Baverse ya Biblia Yina Lenda Sadisa Nge

Lala mingi.

“Kupema mwa fioti kele mbote kuluta kisalu ya ngolo mpi kulanda mupepe.”—Longi 4:6.

Bantu yina ke salaka bansosa ke tubaka nde kana muntu me kutana ti mpasi, “kukonda kulala mbote . . . ke salaka nde basusi kukuma diaka mingi.” Yo yina, yo kele mbote na kupema mingi.

Songa bantu ya nkaka mambu na nge.

“Basusi na ntima ya muntu ke lembisaka ntima [to “ke pesaka yandi mawa,” noti na nsi ya lutiti], kansi ndinga ya mbote ke pesaka yo kikesa.”—Bingana 12:25.

Solula ti muntu mosi ya dibuta na beno to nduku mosi ya nge ke tudilaka ntima. Bantu ya dibuta to banduku ya ngolo ta widikila nge ntangu nge ke songa bo mambu na nge, mpi bo lenda pesa nge kikesa mpi lusadisu yina nge kele na yo mfunu.a

Yindula ntangu yina mambu yonso ta kuma mbote.

“Na kutadila lusilu [ya Nzambi], beto ke vingila zulu ya mpa mpi ntoto ya mpa, mpi na kati na yo lunungu ta vanda.”—2 Piere 3:13.

a Muntu yina ke landa kuvanda ti basusi to ke kudiyangisa mingi kibeni, lenda vanda na mfunu ya munganga.