Kieleka ya Me Tala Bilumbu Ke Kwisa

Keti nge me sosaka ntete kuzaba mambu yina ta salama na bilumbu ke kwisa? Biblia ke tubilaka mambu ya mfunu yina ta salama na bilumbu ke kwisa yina ta kumina bantu yonso.

Yezu tubilaka mutindu beto ta “zaba nde Kimfumu ya Nzambi me finama.” (Luka 21:31) Yandi tubaka nde bitumba ya nene, kunikana ya ntoto, nzala mpi maladi ya mutindu na mutindu ta vanda na kati ya mambu yina ta salama; mambu yango ke salama kibeni bubu yai.—Luka 21:10-17.

Biblia ke tuba diaka nde na kati ya mambu yina ta salama na “bilumbu ya nsuka” ya luyalu ya bantu, bantu ta kuma ti bikalulu ya mbi. Nge lenda tanga yo na 2 Timoteo 3:1-5. Ntangu nge ke mona bikalulu yai mpi mambu ya bantu ke sala bubu yai, ntembe kele ve nde nge ke ndima nde mambu yina Biblia tubaka ke lungana bubu yai.

Yo ke tendula nki? Ntama mingi ve Kimfumu ya Nzambi ta yidika mambu yina ta sala nde bantu ya ntoto ya mvimba kuzinga mbote. (Luka 21:36) Na Biblia, Nzambi ke sila mambu ya mbote sambu na ntoto mpi sambu na bantu yina ta zinga na kati na yo. Beto tadila mwa bambandu yai.

LUYALU YA MBOTE

“Ebuna bo pesaka yandi [Yezu] luyalu, lukumu, mpi kimfumu, sambu bantu, makanda mpi bandinga, bo yonso kusadila yandi. Luyalu na yandi kele luyalu ya mvula na mvula yina ta luta ve, mpi bo ta fwa ve kimfumu na yandi.”—DANIELE 7:14.

Mambu yina yo ke tendula: Nge lenda baka mambote na nsi ya luyalu yina Nzambi me tulaka Yezu Ntotila.

SANTE YA MBOTE

Leke mosi ya nkento me katuka na kiti na yandi ya bikata mpi ke tambula

“Ata muntu mosi ve ya ke zingaka na insi ta tuba nde: ‘Mono ke bela.’”—YEZAYA 33:24.

Mambu yina yo ke tendula: Nge ta belaka diaka ve, ta vanda diaka ve ti kifu na nitu mpi nge ta zinga kukonda nsuka.

NGEMBA YA KIELEKA

“Yandi ke sukisa bitumba na ntoto ya mvimba.”—NKUNGA 46:9.

Mambu yina yo ke tendula: Bitumba mpi bampasi yina yo ke nataka ta vanda diaka ve.

NTOTO TA FULUKA TI BANTU YA MBOTE

“Bantu ya mbi ta vanda diaka ve . . . Bantu ya kudikulumusa ta baka ntoto.”—NKUNGA 37:10, 11.

Mambu yina yo ke tendula: Bantu ya mbi ta vanda diaka ve kansi kaka bantu yina ke lemfukilaka Nzambi ta baka ntoto.

NTOTO YA MVIMBA TA KUMA PALADISU

“Bo ta tunga banzo mpi ta zinga muna, Bo ta kuna bilanga ya vinu mpi ta dia mbuma na yo.”—YEZAYA 65:21, 22.

Mambu yina yo ke tendula: Ntoto ya mvimba ta kuma kitoko. Nzambi ta lungisa bisambu na beto yina beto ke lombaka nde luzolo na yandi kusalama “na ntoto.”—Matayo 6:10.