Manaka ya Lukutakanu ya Kisalu

Mposo ya Kebanda na Septembri 10

Nkunga 225

Min. 10: Baluzayisu ya dibundu. Beno sadila mabanza yina kele na lutiti ya 4 to mabanza yankaka yina mefwana na teritware na beno sambu na kumonisa mutindu ya kupesa Nzozulu ya Nkengi ya Septembri 15 mpi Réveillez-vous ! ya Septembri. Na konso nsonga, beno tapesa baperiodike yonso zole ata beno metubila kaka periodike mosi.

Min. 15: Bamvutu na Bangyufula na Beno. Disolo ti bawi yina nkuluntu mosi tasala. Kana ntangu kele, tanga mpi tendula baverse yina bo mepesa.

Min. 20: “Landa Mbandu Yina Yezu Kubikaka.”a Lomba na bawi na kutuba nki mutindu bo mebakaka mambote na mbandu ya mbote ya bantu yankaka.

Nkunga 130 mpi kisambu ya nsuka.

Mposo ya Kebanda na Septembri 17

Nkunga 60

Min. 10: Baluzayisu ya dibundu.

Min. 15: Inki Beto Salaka na Mvula Yina Meluta? Nkengi ya kisalu ketubila kisalu ya mvula meluta, mpi yandi ketula dikebi mingi na mambu ya mbote ya bampangi kusalaka na kisalu ya kusamuna. Sikisa bampangi mpi tubila dyambu mosi to mambu zole yina beno fwete tudila dikebi na mvu ya kisalu yina kekwisa. Tubila kisalu ya bapasudi-nzila, mpi sikisa bo sambu na kisalu na bo ya mbote. Tubila bambuma ya mbote ya beno bakaka sambu beno sadisaka bampangi yina meyambulaka kusamuna.

Min. 20: Kimvuka ya Bampangi ya Kele na Bumosi. Diskure mpi disolo ti bawi ya mekatuka na mukanda Beto Mevukana Sambu na Kusala Luzolo ya Yehowa, kapu 16.

Nkunga 74 mpi kisambu ya nsuka.

Mposo ya Kebanda na Septembri 24

Nkunga 162

Min. 10: Baluzayisu ya dibundu. Tanga rapore ya konti mpi mukanda ya la Société metinda sambu na kupesa mersi na dibundu.

Min. 15: Bampusa ya dibundu.

Min. 20: Sadila trakiti Aimeriez-vous en savoir plus sur la Bible ? sambu na kuyantika kulonguka Biblia ti bantu na Oktobri. Na ngonda ya Oktobri, beto takabula Nzozulu ya Nkengi mpi Réveillez-vous ! Kana muntu kumonisa mpusa, beto lenda sadila trakiti Aimeriez-vous en savoir plus sur la Bible ? sambu na kuyantika kulonguka Biblia ti yandi. Kana trakiti yango kele, beno pesa yo na konso muntu yina kele na lukutakanu, mpi na nima beno sala disolo na bunkufi na trakiti yango. Tendula nde beto lenda tadila mwa bitini ya trakiti yango to kutadila yo na mvimba ti muwi, na mbala ya ntete ya beto mekutana ti yandi to na ntangu beto mevutukila yandi. Sadila mabanza yina kele na lutiti ya 4 to mabanza yankaka yina mefwana na teritware na beno sambu na kumonisa mutindu ya kupesa Nzozulu ya Nkengi ya Oktobri 1 mpi Réveillez-vous ! ya Oktobri. Na nsonga mosi, muwi tabuya baperiodike, ebuna nsamuni tapesa yandi trakiti. Na nsonga yankaka, muwi tandima baperiodike, ebuna nsamuni tapesa yandi mpi trakiti, ebuna bo tatadila lutiti 5 ya trakiti yina ti yandi. Na nima, nsamuni tatubila kitini ya lutiti 6 kisika bo metubila mukanda Biblia Kelongaka, mpi tasonga muwi nde yandi tavutukila yandi ti mukanda yango.

Nkunga 222 mpi kisambu ya nsuka.

Mposo ya Kebanda na Oktobri 1

Nkunga 88

Min. 10: Baluzayisu ya dibundu. Pona Baluzayisu na Kisalu na Beto ya Kimfumu. Yibusa bansamuni na kupesa rapore na bo ya kisalu ya bilanga ya Septembri.

Min. 15: Mukanda ya Filiale. Diskure ti disolo ti bawi ya mekatuka na mukanda yina kele na lutiti ya ntete ya Kisalu na Beto ya Kimfumu. Lomba bawi na kutubila baeksperiansi ya bo kutanaka na yo na nima ya kusala kampanye sambu na kubinga bantu na kukwenda na Lukutakanu ya Distrike “Landa Kristu!”

Min. 20: “Sala Kikesa Sambu na Kusala Mingi na Kisalu na Beto ya Kusamuna.”b Tubila bambandu ya bampangi yina kesala kikesa sambu na kusala mingi, mpi lomba bo na kutendula nki mutindu bo kelanda na kusosa mitindu ya kusala mingi na kisalu na bo ya kusamuna. Beno lenda yidika komantere mosi to bakomantere zole na ntwala.

Nkunga 102 mpi kisambu ya nsuka.

[Banoti na nsi ya lutiti]