Kisalu ya Kuluta Mfunu
1. Ntonda na beto ya mingi sambu na kisalu ya kusamuna kepusa beto na kusala inki bibansa?
1 Sambu na nki bo kesyamisaka beto mbala na mbala na kusadila ntangu, ngolo, mpi bima na beto ya kinsuni na kisalu ya kusamuna? Sambu kisalu yai kele mfunu mingi kuluta! Kuyindulula bupusi yina yo kele na yo na luzingu ya bantu mingi tayedisa mpusa na beto ya kusala kisalu yai ya tasalamaka dyaka ve.—Bis. 20:24.
2. Inki mutindu kisalu na beto ya kusamuna kesadisaka na kusantisa zina ya nene ya Yehowa?
2 Yo Kesantisaka Zina ya Yehowa: Kisalu ya kusamuna kemonisaka nde na nzila ya Kristu Yezu, Kimfumu ya Yehowa tayinga baguvernema yonso ya bantu mpi tamanisa makambu yonso yina keyangisaka bantu. (Mat. 6:9, 10) Yehowa kebakaka lukumu sambu yandi kele muntu mosi mpamba yina lenda gulusa beto na maladi mpi na lufwa. (Yez. 25:8; 33:24) Sambu beto kenataka zina na yandi, bantu yankaka yina kemona bikalulu na beto ya mbote mpi kikesa na beto lenda pesa yandi lukumu. (1 Pie. 2:12) Beto kele na kyese mpenza ya kuzabisa zina ya Nkwa Kimfumu Yehowa na ntoto ya mvimba!—Nk. 83:19.
3. Inki balusakumunu bantu yina kendimaka nsangu ya Kimfumu kebakaka?
3 Yo Kegulusaka Luzingu ya Bantu: Yehowa “ke zolaka ve nde ata muntu mosi kuvila; kansi yandi ke zolaka nde bantu yonso kubalula ntima.” (2 Pie. 3:9) Kansi, kana muntu kulonga bo ve, inki mutindu bantu talonguka mambu ya Yehowa ketadilaka bonso ya mbote to ya mbi? (Yon. 4:11; Roma 10:13-15) Ntangu bantu kendimaka nsangu ya mbote, luzingu na bo ketomaka sambu bo keyambulaka bikalulu ya mbi. (Mis. 4:1-4) Dyaka, bo kebakaka kivuvu ya kyese ya luzingu ya mvula na mvula. Kisalu ya kusamuna mpi ya kulonga ya beto kesalaka mbala na mbala kegulusaka beto mpi bayina kewidikilaka beto. (1 Tim. 4:16) Beto kele ti mukumba ya lukumu mpenza na kisalu yai ya kuluta mfunu!
4. Sambu na nki beto fwete sala yonso yina beto lenda sala na kisalu ya kusamuna Kimfumu mpi ya kukumisa bantu balongoki?
4 Ntama mingi ve, mpasi ya nene tasukisa na mbala mosi nsi-ntoto yai ya kukonda lunungu. Bantu yina kele na lweka ya Yehowa taguluka. Yo yina, kisalu ya kusamuna mpi ya kukumisa bantu balongoki yina kesalama bubu yai kele kisalu ya meluta mfunu, yina fwete salama nswalu-nswalu, mpi yina kenatila bantu mambote mingi. Bika nde beto tula yo na kisika ya ntete na luzingu na beto!—Mat. 6:33.