Beto Fwete Landa na Kuvanda ti Kikesa na Kisalu ya Kusamuna
1 Kubanda na mvu 1992, Bambangi ya Yehowa kelutisaka konso mvula ti kikesa yonso bangunga kuluta miliare mosi na kisalu ya kusamuna Kimfumu mpi ya kukumisa bantu balongoki na ntoto ya mvimba. Beto kele na kyese kibeni na mutindu beto mepesaka mpi maboko sambu na kulungisa kisalu yai!—Mat. 28:19, 20.
2 Ya kyeleka, nkembo mpi lukumu yonso kele na Yehowa yina kesadisaka beto na kusala kisalu ya kusamuna na ‘bilumbu yai ya mpasi mingi.’ (2 Tim. 3:1) Inki beto fwete sala kana beto kezola kulanda na kusala kisalu yai ya mfunu ti kikesa yonso?
3 Kikuma ya Kuvanda ti Kikesa: Zola ya ngolo yina beto kevandaka na yo sambu na Nzambi mpi nkweno, mpi mpusa ya ngolo ya kuzinga na kuwakana ti kudipesa na beto na Nzambi, kepesaka beto kikesa na kisalu na beto ya Kimfumu. (Mat. 22:37-39; 1 Yoa. 5:3) Zola kepusaka beto na kusala bibansa sambu na kusala mingi na kisalu ya kusamuna.—Luka 9:23.
4 Sala Yonso Sambu na Kulanda na Kuvanda ti Kikesa: Mbeni na beto Satana kesala yonso mpenza sambu na kulembisa kikesa na beto na kisalu ya kusamuna. Na kati ya mwa mambu yina yandi kesadilaka sambu na kusosa kulembisa beto, beto ketanga mambu ya nsi-ntoto yai ya kekatulaka dikebi na mambu ya kuluta mfunu, bantu ya teritware na beto ya ketulaka ve dikebi na nsangu ya Kimfumu, bampasi ya beto kekutanaka ti yo konso kilumbu, mpi basusi sambu na mavimpi na beto ya kebeba.
5 Yo yina, beto fwete sala yonso kibeni sambu na kulanda na kuvanda kaka ti kikesa. Yo kele mfunu nde beto yedisa zola yina beto vandaka na yo ntete. Sambu na kusala mpidina, yo kelombaka kutanga mpi kuyindulula mbala na mbala Ndinga ya Nzambi, Biblia, mpi kusadila bangidika yonso ya kimpeve yina Yehowa kebakaka na nzila ya “mpika ya kwikama mpi ya mayele.”—Kus. 2:4; Mat. 24:45, NW; Nk. 119:97.
6 Mutindu bambikudulu ya Biblia kemonisa yo pwelele, kilumbu yina Yehowa tafwa bantu yonso ya mbi mefinama mpenza. (2 Pie. 2:3; 3:10) Ti mambu yai na mabanza, bika beto sala ngolo mpenza sambu na kulanda na kuvanda ti kikesa na kisalu ya kusamuna, mpi kusala mingi kisalu yina ke na kusalama ntangu yai ya kusamuna Kimfumu mpi kukumisa bantu balongoki.