“Beno Vanda ya Kupela na Mpeve”

1. Inki kikalulu fwete monana na kisalu na beto ya kusamuna?

¹ Ata kitini mosi ve ya kisalu na beto ya Bukristu fwete vanda kaka kiteso mosi. Kansi, Biblia kesyamisa beto nde: “beno vanda ya kupela na mpeve” mpi “beno sala bonso bampika sambu na Yehowa.” (Roma 12:​11, NW) Kele ti mambu mingi yina lenda fyotuna kikesa na beto na kisalu ya kusamuna. Inki mutindu beto lenda “pedisa bonso tiya” (NW) kikesa mpi kyese na beto sambu na kisalu ya Kimfumu?​—⁠2 Tim. 1:​6, 7.

2. Inki kuwakana kele na kati ya kulonguka na beto mosi ya Biblia mpi kusamuna ti kikesa?

² Kulonguka Biblia Beto Mosi: Nsamuni ya mbote ya Kimfumu kele muntu yina kezolaka bansiku ya Nzambi mpi yina bakyeleka yina kele na kati mesimbaka mpenza ntima na yandi. (Nk. 119:97) Ntangu beto kemonaka bakyeleka ya Biblia na kulonguka na beto mosi, yo kepesaka beto kyese mpi kekumisaka kikesa na beto mingi. Zola sambu na Mupesi ya bakyeleka ya mutindu yai mpi mpusa na beto ya kuzabisa bantu yankaka nsangu ya mbote kepusaka beto na kupesa Nzambi lukumu mpi na kuzabisa zina na yandi na bantu yonso. (Baeb. 13:15) Ya kyeleka, kulonga nsangu ya mbote na masonga yonso kemonisaka nde beto kebakaka nsangu yango na valere.

3. Inki mutindu mpeve ya Nzambi lenda vanda na bupusi na kisalu na beto ya kusamuna?

³ Samba Sambu na Kulomba Mpeve ya Nzambi: Sambu kisalu ya kusamuna kubuta mbuma, beto lenda sala yo ve na ngolo na beto mosi. Beto kevandaka ti kikesa ya kyeleka kana mpeve ya Nzambi kesala kukonda mpasi. (1 Pie. 4:11) Kukwenda penepene na Nto ya ‘ngolo ya nene mpenza’ tapesa beto ngolo ya kimpeve ya kuta kimbangi na kikesa yonso. (Yez. 40:​26, 29-31) Ntangu ntumwa Polo kukutanaka ti bampasi na kisalu na yandi ya kusamuna, yandi bakaka lusadisu yina katukaka na ‘Nzambi.’ (Bis. 26:​21, 22) Ngolo yina mpeve santu ya Yehowa kepesaka lenda sadisa beto na kuvanda ya kupela na kisalu na beto, yo yina beto fwete samba sambu na kulomba yo.​—⁠Luka 11:​9-13.

4. Inki mbuma ya mbote kikesa lenda basisa, kansi sambu na nki beto fwete keba?

⁴ Mbala mingi, kikesa ya ngolo sambu na kusamuna Kimfumu kepesaka bampangi-Bakristu yankaka kikesa ya mingi. (2 Kor. 9:⁠2) Na teritware, mbala mingi bantu kendimaka nsangu yina bo ketuba na kikesa mpi ti kundimisa. Kansi, kikesa na beto fwete kwendaka kumosi ti mayele mpi mawete. (Tito 3:⁠2) Ntangu yonso, beto kesosaka kupesa muwi lukumu mpi kuzitisa kimpwanza na yandi ya kupona.

5. Inki ndongisila ya kupemama beto fwete sala ngolo na kusadila?

⁵ Sambu beto kele bansamuni ya Kimfumu, bika nde ntangu yonso beto “vanda ya kupela na mpeve.” Bika beto yedisa kikesa na nsadisa ya kulonguka na beto mosi ya Biblia mpi ya bisambu ya masonga na Yehowa, muntu yina lenda pesa beto ngolo ya mpeve santu na yandi. Mpidina, beto lenda lungisa na kikesa yonso kisalu na beto “na ngolo ya mpeve ya Nzambi” mpi ti lukwikilu ya ngolo.​—⁠1 Tes. 1:⁠5.