Keti Nge Ta Landa Mbandu ya Kikesa ya Yehowa mpi ya Yezu na Nsungi ya Lusungiminu?
1. Na nsungi ya Lusungiminu, Bambangi ya Yehowa ke salaka kikesa sambu na kusala nki?
1 Yehowa ke lungisaka balukanu na yandi na kikesa yonso. Sambu na balusakumunu ya nkaka ya Kimfumu ya Nzambi, Yezaya 9:6 ke tuba nde: ‘Mfumu Nzambi, na luzolo [kikesa] na yandi, me zenga na kusala mambu yai yonso.’ Mutindu mosi, na nsungi ya kisalu ya Yezu awa na ntoto, Mwana ya Nzambi salaka bikesa ya nene sambu na lusambu ya kieleka. (Yoa. 2:13-17; 4:34) Konso mvula na nsungi ya Lusungiminu, bansamuni mingi na ntoto ya mvimba ke salaka mingi na kisalu ya kusamuna sambu na kulanda mbandu ya kikesa ya Yehowa mpi ya Yezu. Keti nge mpi ta sala yo?
2. Yantika Marsi 7, kikesa na beto ta pusa beto na kusala nki?
2 Kampanye Sambu na Lusungiminu: Na mvula yai, kampanye sambu na Lusungiminu ta yantika na Sabala, Marsi 7. Kudibongisa ntangu yai sambu na kusamuna ti kikesa. Mabundu ta vanda na kiese ntangu bo ta samuna ti kikesa yonso sambu na kusala teritware na bo ya mvimba. Sadila ba-emvitasio ya Lusungiminu to jw.org sambu na kubingisa balongoki ya Biblia, banduku ya kisalu, bampangi ya kinsuni, banduku ya nzo-nkanda mpi bantu ya nkaka.
3. Inki mutindu beto lenda sala mingi na kisalu ya kusamuna na ngonda ya Marsi mpi ya Aprili?
3 Kisalu ya Kimupasudi-Nzila Nsadisi: Kuvanda kikesa ta pusa beto na kusala mingi na kisalu ya kusamuna. Ntembe kele ve nde bantu mingi ta sala kisalu ya kimupasudi-nzila nsadisi na ngonda ya Marsi mpi ya Aprili sambu bo ta pona na kupesa bangunga 30 ya bo ke lombaka. Na lusambu na nge ya dibuta to na kulonguka na nge mosi, tadila na kisambu mutindu nge lenda sala kisalu yai. (Bing. 15:22) Kana nge sala kampanye yai ti kikesa, nge lenda pusa mpi bankaka na kusamuna ti kikesa. Kana nge me sala bansoba sambu na kusala mingi na kisalu ya kusamuna, nge ta landa mbandu ya kikesa ya Yezu.—Mar. 6:31-34.
4. Inki mambote beto ta baka kana beto landa mbandu ya kikesa ya Yehowa mpi ya Yezu?
4 Kana beto landa mbandu ya kikesa ya Yehowa mpi ya Yezu na nsungi ya Lusungiminu, yo ta natila beto balusakumunu mingi. Beto ta ta kimbangi na bantu mingi na teritware; beto ta baka kiese ya ke katukaka na kusadila Yehowa mpi na kupesa bantu ya nkaka. (Bis. 20:35) Diambu ya kuluta mfunu kele nde beto ta sepedisa Nzambi mpi Mwana na yandi.