Beno Sala nde Nsungi Yai ya Lusungiminu Kuvanda ya Kiese!
1. Inki kele mutindu mosi ya kukumisa kiese na nge mingi na nsungi ya Lusungiminu?
1 Keti nge ta zola nde kiese na nge kukuma mingi na ngonda ya Marsi, ya Aprili mpi ya Mayi? Mutindu mosi ya kuvanda na kiese kele kusala mingi na kisalu ya kusamuna mpi kana mpila kele, kusala kisalu ya kimupasudi-nzila nsadisi. Inki mutindu kisalu yango ta kumisa kiese na nge mingi?
2. Inki mutindu kusamuna mingi ke natilaka beto kiese ya mingi?
2 Beno Kumisa Kiese na Beno Mingi: Yehowa gangaka beto ti makuki ya kumona kiese ntangu beto ke sambila yandi mpi ke lungisa banzala na beto ya kimpeve ya beto ke butukaka ti yo. (Mat. 5:3) Yandi gangaka beto mpi sambu na kuzwa kiese yina ke katukaka na kupesa bantu ya nkaka. (Bis. 20:35) Kisalu ya kusamuna ke sadisaka beto na kusambila Yehowa mpi kusadisa bantu. Yo kele kieleka nde kusamuna mingi ke nataka mpi kiese ya mingi. Diaka, kana beto ke samuna mingi, beto lenda kuma mayele mingi. Sambu beto ke kuma mayele, beto ta kuditudila ntima mpi yo ta katula beto boma. Beto ta vanda ti mabaku mingi ya kuta kimbangi mpi ya kuyantika kulonguka Biblia ti bantu. Mambu yai yonso ke salaka nde kisalu ya kusamuna kupesa beto kiese.
3. Sambu na nki Marsi ti Aprili ta vanda bangonda ya mbote mpenza ya kusala kisalu ya kimupasudi-nzila nsadisi?
3 Marsi ti Aprili ta vanda bangonda ya mbote mpenza ya kusala kisalu ya kimupasudi-nzila nsadisi sambu beto ta pona na kusala bangunga 30 to 50 yina bo ke lombaka. Diaka, banda na Sabala, Marsi 22 tii na Kintete Aprili 14 kilumbu ya Lusungiminu, beto ta sala kampanye mosi ya mbote sambu na kubinga bantu ya nkaka na Lusungiminu. Mabundu ta vanda na kiese ya mingi sambu bantu mingi ta sala “dipeka na dipeka” sambu na kusala teritware ya mvimba na nsungi ya kampanye.—Sof. 3:9, NW.
4. Inki beto fwete sala kana beto ke zola kusala kisalu ya mupasudi-nzila nsadisi?
4 Beno Kudibongisa Ntangu Yai: Kana nge me salaka yo ntete ve, baka ntangu ya kutadila manaka na nge mpi bansoba yina nge lenda sala sambu na kusamuna mingi ngonda mosi to bangonda mingi. Samba sambu na yo. (Yak. 1:5) Beno solula yo na dibuta mpi na bampangi ya nkaka na dibundu. (Bing. 15:22) Nge lenda mona nde ata mavimpi ke yangisa nge to nge kele na mambu mingi ya kusala, nge mpi lenda baka kiese yina kisalu ya kimupasudi-nzila ke nataka.
5. Inki mambote beto ta baka kana beto ke samuna mingi na nsungi yai ya Lusungiminu?
5 Yehowa ke zolaka nde bansadi na yandi kuvanda na kiese. (Nk. 32:11) Kana beto ke sala kikesa sambu na kusamuna mingi na nsungi yai ya Lusungiminu, kiese na beto ta kuma mingi mpi yo ta sepedisa Tata na beto ya zulu.—Bing. 23:24; 27:11.