Zabisa Bantu Nsangu ya Mambu ya Nene ya Yehowa
1. Inki kepusaka beto na kuzabisa bantu nsangu ya mambu ya nene ya Yehowa?
1 “Nge kele nene ti ngolo; lukumu ti kimfumu kele ya nge. Bima yonso na zulu ti awa na ntoto kele na maboko na nge.” (1 Bans. 29:11) Zola mpi ntonda na beto sambu na Yehowa kepusaka beto na kusala inki? Yo kepusaka beto na ‘kuzabisa bantu nsangu ya mambu ya nene ya muntu yina solaka beto sambu beto katuka na mpimpa, beto temuka na mwini na yandi ya kuyituka.’ (1 Pie. 2:9) Beto lenda yambula ve kuzabisa bankaka mambu ya metala Nzambi na beto ya nene! Beto tavanda ti mabaku ya mbote ya kuzabisa bantu nsangu ya mambu ya nene ya Yehowa na Marsi, Aprili, ti Mayi.
2. Inki kampanye ya sipesiali beto tasala sambu na kubinga bantu na Lusungiminu, mpi nani lenda sala yo?
2 Kampanye ya Sipesiali Sambu na Kubinga Bantu na Lusungiminu: Na Kintete, Aprili 2, beto tazabisa mambu ya nene ya Yehowa na ntangu beto tasungimina Madya ya Nkokila ya Mfumu. Beto takabula emvitasio ya sipesiali ya dyambu yai ya mfunu mingi na inza ya mvimba banda na Marsi 17 tii na Aprili 2. Beto kesyamisa bansamuni yonso na kusala kampanye yango na ntima mosi. Yo tavanda dibaku ya mbote kibeni sambu bantu ya mpa kuyantika kusamuna nsangu ya mbote kana bo melungisa mambu ya bo kelombaka. Kana nge kele ti balongoki ya Biblia to bana yina lenda lungisa mambu yango, solula ti bankuluntu.
3. Inki beto lenda tuba sambu na kubinga bantu na Lusungiminu?
3 Kampanye yai tasalama mutindu beto salaka kampanye ya Balukutakanu ya Distrike “Luguluku Mefinama!” Beto tatindila mabundu baemvitasio ya kufwana na mpila nde konso nsamuni kubaka baemvitasio 50 mpi konso mupasudi-nzila 150. Disolo na nge fwete vanda nkufi, ziku nge lenda tuba nde: “Yai kele emvitasio na nge na dyambu mosi ya mfunu ya kesalamaka konso mvula. Beto tayamba nge na kyese yonso. Bo ketendula mambu yankaka na emvitasio yai.” Ya kyeleka, kana muwi kuyula bangyufula, baka ntangu ya kupesa bamvutu. Disolo ya appendice ya ketubila Madya ya Nkokila ya Mfumu na mukanda Biblia Kelongaka, banda na lutiti 206, lenda sadisa nge na kupesa bamvutu. Na bawikendi, beto tapesaka emvitasio yina kumosi ti baperiodike. Sonika bazina ya bantu yonso yina kemonisa mpusa, mpi kudibongisa sambu na kuvutukila bo.
4. Inki mutindu beto takabula baemvitasio ya sipesiali ya Lusungiminu?
4 Kana mpila kele, beno fwete pesa konso muntu emvitasio yai ya sipesiali na maboko. Yo yina, sonika adresi ya bantu yina kele ve na banzo mpi kudibongisa sambu na kuvutukila bo na nima. Na mabundi yina ba emvitasio mingi tabikala, bo lenda bika yo na banzo yina bo takuta ve bantu na mposo ya nsuka na ntwala ya Lusungiminu, kansi bo fwete sala yo ve na ntwala ya mposo yina. Beno fwete sala yonso sambu na kupesa baemvitasio na bantu ya beno kevutukilaka, na balongoki ya Biblia, bantu ya dibuta, banduku ya kisalu, bamfinangani, mpi bantu yankaka ya beno mezaba.
5. Sambu na nki beto fwete yantika kusala bapula ntangu yai sambu na kisalu ya kimupasudi-nzila nsadisi?
5 Kisalu ya Kimupasudi-Nzila Nsadisi: Keti nge lenda sala kisalu ya kimupasudi-nzila nsadisi na Marsi, Aprili, mpi Mayi sambu na kuzabisa mpenza bantu nsangu ya mambu ya nene ya Yehowa? Sambu na kusala yo, ntembe kele ve nde yo talomba nde nge sala mwa bansoba na programe na nge ya konso kilumbu. (Ef. 5:15-17) Nge lenda tula mpenza ntima nde kusala kikesa sambu na kusala mingi na kisalu ya Yehowa tanatila nge kyese mpi balusakumunu ya Yehowa. (Bing. 10:22) Sambu nsungi ya Lusungiminu ke na kufinama, yai kele ntangu ya kuyantika kuyindula mambu ya nge fwete sala.—Bing. 21:5.
6. Inki dilongi beto lenda baka na eksperiansi ya mpangi-nkento ya bamvula 90 yina kusalaka kisalu ya kimupasudi-nzila nsadisi na mvula meluta?
6 Mvula meluta, mpangi-nkento mosi ya bamvula 90 kusalaka kisalu ya kimupasudi-nzila nsadisi. Yandi tubaka nde: “Ata mu kezolaka mpenza kukuna bintuntu mpi mu vandaka ti mpusa ya kuyantika kukuna, mu bakisaka nde mu vandaka na mfunu ya kutula mambu ya mfunu na kisika ya ntete. Mu bakaka lukanu ya kusala kisalu ya kimupasudi-nzila nsadisi na Marsi sambu mu vandaka na mpusa ya kutula mambote ya Kimfumu na kisika ya ntete.” Keti yandi bakaka mambote sambu na bikesa ya yandi salaka? Yandi ketuba nde: “Mu kekudiwa penepene mpenza ya dibundu mpi ya Yehowa.” Keti beto lenda tadila mambu ya beto ketulaka na kisika ya ntete mpi kusala bansoba yina kele mfunu?
7. Keti yo kele mpasi na kusala kisalu ya kimupasudi-nzila nsadisi?
7 Kulungisa bangunga 50 ya bo kelombaka na bapasudi-nzila nsadisi lenda vanda ve mpasi mutindu nge keyindula. Tadila bisalu na nge ya konso kilumbu na kisambu, sala manaka, mpi na nima sonika yo na kalandrie na nge ya mambu ya kimpeve. Nge mosi muntu mezaba luzingu na nge mbote. Kana mavimpi na nge kele mbote ve mpi nge kele mpenza na ngolo ve, ziku nge lenda samuna bangunga zole konso kilumbu. Kana nge kesalaka kilumbu ya mvimba to nge kekwendaka na nzo-nkanda, nge lenda kuka kusala kisalu ya kimupasudi-nzila nsadisi na kusamunaka na nkokila to na bawikendi.
8. Inki kusadisaka bakala mosi ti nkento na yandi na kusala kisalu ya kimupasudi-nzila nsadisi?
8 Mabuta mingi menungaka na kusala kisalu ya kimupasudi-nzila nsadisi. Bamvula meluta, mpangi-bakala mosi ti nkento na yandi kubuyaka ntete na kusala kisalu ya kimupasudi-nzila nsadisi sambu bo vandaka kuyindula nde manaka na bo tapesa bo ve nzila ya kusala yo. Inki bo salaka? “Beto sambaka Yehowa sambu yandi sadisa beto na kusala mambu yina beto vandaka kuzola kusala kumosi banda ntama.” Bo salaka manaka ya mbote, yo yina bo nungaka na kulungisa lukanu na bo. Bo yikaka nde: “Yo vandaka kitoko kibeni. Beto bakaka balusakumunu mingi. Ndongisila na beto yo yai: beno meka. Kana beto kukaka kusala yo, beno mpi lenda kuka na kusala yo.”
9. Inki beno lenda sala na kulonguka na beno ya dibuta yina kelanda sambu na kudibongisa na bangonda yina kekwisa ya beto tasala kisalu ya sipesiali?
9 Beno lenda baka mwa ntangu na kulonguka na beno ya dibuta yina kelanda sambu na kutadila mutindu beno yonso lenda sala mingi na kisalu ya kusamuna na bangonda yina kekwisa. Ata kana dibuta na beno ya mvimba lenda sala ve kisalu ya kimupasudi-nzila nsadisi, ziku muntu mosi ya dibuta na beno lenda sala yo, mpi bantu yankaka ya dibuta lenda sadisa yandi. Kana mpila kele ve, mbala yankaka dibuta na beno lenda lutisa ntangu mingi na kisalu ya kusamuna na bangonda yai ya beto tasala kisalu ya sipesiali.
10. Sambu na nki beto fwete tubila bankaka mpusa na beto ya kusala kisalu ya kimupasudi-nzila nsadisi na nsungi yai ya Lusungiminu?
10 Beto Sadisana: Kyese kesambukilaka. Tubila mpusa na nge ya kusala kisalu ya kimupasudi-nzila nsadisi. Yo lenda syamisa mpi bankaka na kulomba kisalu yango. Dyaka, bampangi yina mesalaka kisalu ya kimupasudi-nzila na bamvula to bangonda meluta lenda pesa nge bangindu yina tasadisa nge na kuyidika makambu na nge mpi kusala manaka yina tasadisa nge na kulungisa lukanu na nge. (Bing. 15:22) Kana nge takuka kusala yo, sambu na nki ve kubinga nsamuni yankaka, ziku mpangi yankaka yina beno kele ti yandi manaka mosi, sambu beno sala kisalu yai ya kitoko?
11. Inki mutindu bankuluntu lenda pesa bankaka kyese ya kusala kisalu ya kimupasudi-nzila nsadisi na bangonda kekwisa?
11 Bankuluntu mingi mebakaka bangidika yina kele mfunu sambu na kusala kisalu yai ya sipesiali. (Baeb. 13:7) Yo kepesaka dibundu kikesa kibeni. Na masolo na bo ti bankaka, bankuluntu kepesaka mpi bankaka kyese. Mwa bangogo ya mbote ya kepesa kikesa to mwa bangindu ya mfunu lenda fwana sambu na kupusa bankaka na kusala kisalu ya kimupasudi-nzila nsadisi. Ntembe kele ve nde nkengi na kisalu tabongisa balukutakanu yankaka sambu na kisalu ya bilanga na mpila nde bantu yonso kuta kimbangi na kimvuka, ata na nima ya kisalu to ya nzo-nkanda. Beno fwete yibusaka manaka yango mbala na mbala. Yandi tazikisa mpi nde bampangi yonso kele ti teritware mpi mikanda ya kufwana.
12. Inki nge lenda sala kana nge lenda sala ve kisalu ya kimupasudi-nzila nsadisi?
12 Ata luzingu na nge kepesa nge ve nzila ya kusala kisalu ya kimupasudi-nzila nsadisi, nge lenda syamisa bampangi yina kelomba yo, mpi nge lenda samba sambu na bo. (Bing. 25:11; Kol. 4:12) Mbala yankaka beto lenda kuka kusala bangidika sambu na kusamuna ti bo kilumbu mosi na mposo to na kusala bangunga mingi kuluta yina nge kesalaka ntete.
13. Inki lukanu bo metula sambu na ba Congo yonso zole, mpi nki mutindu dibundu na beno lenda sadisa na kulungisa lukanu yango?
13 Lukanu ya Bapasudi-Nzila Nsadisi 22750 na Aprili: Ntalu ya kuluta nene ya bapasudi-nzila nsadisi ya beto mezwaka na Congo-Brazzaville kuvandaka 556 na mvu 2000 mpi na Congo-Kinshasa yo vandaka 8260 na mvu 1997. Yo yina, lukanu ya mbote sambu na Aprili ya mvula yai kele ya kuzwa bapasudi-nzila nsadisi 750 na Congo-Brazzaville mpi 22000 na Congo-Kinshasa. Beto lenda lungisa lukanu yango kana nsamuni 1 na kati ya bansamuni 6 ya konso dibundu kusala kisalu yango. Ya kyeleka, mabundu yankaka tavanda ti ntalu ya bansamuni mingi yina luzingu na bo tapesa bo nzila ya kusala kisalu ya kimupasudi-nzila nsadisi. Mabundu mingi takuka kulungisa lukanu yina kukonda mpasi. Yindula kyese yina yo tanatila dibundu mpi bupusi ya mbote yina yo tavanda ti yo na kisalu ya kusamuna na teritware na beno!
14. Sambu na nki Aprili kele ngonda ya mbote sambu na kusala kisalu ya kimupasudi-nzila nsadisi?
14 Sambu na nki Aprili kele ngonda ya mbote sambu na kusala kisalu ya kimupasudi-nzila nsadisi? Sambu Lusungiminu tavanda na luyantiku ya ngonda, yo tapesa beto mabaku mingi ya kuvutukila bantu yina takwisa na Lusungiminu. Beto tapesa baperiodike, ti lukanu ya kupesa mukanda Biblia Kelongaka na ntangu beto tavutukila bantu mpi kuyantika kulonguka Biblia ti bo. Yo yina, kusala kisalu ya kimupasudi-nzila nsadisi na Aprili tapesa beto mabaku mingi ya kuyantika kulonguka Biblia ti bantu. Dyaka, Aprili kele ti ba Lumingu tanu, mpi kevandaka ti nsungi mosi ya konzie. Yo tasadisa bampangi yina kesalaka mpi bayina kekwenda na nzo-nkanda na kulomba kisalu ya kimupasudi-nzila nsadisi kukonda mpasi.
15. Sambu na nki beto fwete sala mambu kukonda kusukinina mutindu nsungi ya Lusungiminu kefinama?
15 Konso nsungi ya Lusungiminu yina kelutaka kenataka beto na mvula mosi penepene ya nsuka ya ngidika yai ya bima. Ntangu yina beto kele na yo sambu na kuzabisa bankaka mambu ya metala Nzambi na beto ya nene mebikala dyaka mingi ve. (1 Kor. 7:29) Kana nsungi yai ya Lusungiminu meluta, mabaku ya kitoko yina yo pesaka beto sambu na kukumisa Tata na beto ya zulu taluta mpi kimakulu. Bika nde beto kudibongisa ntangu yai na kusala ngolo kibeni na Marsi, Aprili, mpi Mayi sambu na kuzabisa bantu nsangu ya mambu ya nene ya Yehowa!
[Lupangu ya kele na lutiti 4]
Keti Beto Lenda Zwa Bapasudi-Nzila Nsadisi 22750 na Aprili?
◼ Tadila mambu ya nge ketulaka na kisika ya ntete
◼ Beno tadila balukanu na beno na dibuta
◼ Tubila bankaka mambu ya nge kekana kusala