Kudibongisa Ntangu Yai Sambu na Kuyedisa Kisalu na Nge

1. Inki dyambu ya mfunu kesalamaka na nsungi ya Lusungiminu, mpi nki mutindu beto lenda kudibongisa sambu na yo?

¹ Konso nsungi ya Lusungiminu kepesaka beto mabaku ya mpa ya ‘kupesa Yehowa mersi mingi.’ (Nk. 109:30) Keti nge tayedisa kisalu na nge na ngonda ya Marsi sambu na kumonisa ntonda na Muntu yina pesaka nkudulu? Yai kele ntangu ya kuyantika kudibongisa.—Bing. 21:5.

2. Inki nge, mpi bampangi yankaka, salaka mutindu bo fyotunaka ntalu ya bangunga yina bapasudi-nzila nsadisi fwete sala na Aprili ya mvula meluta?

² Kisalu ya Kimupasudi-Nzila Nsadisi: Na mvula ya meluta, mabundu fulukaka ti kyese ntangu bo waka nde na Aprili bampangi lenda sala kisalu ya kimupasudi-nzila nsadisi sambu ntalu ya bangunga yina bo kelombaka kukulumukaka. Mpangi-bakala mosi sonikaka nde: “Mu kele ntete na nzo-nkanda ya sekondere, mpi mu kemona nde mu takuka ve kusala kisalu ya kimupasudi-nzila ya ntangu yonso. Yo yina, na ngonda ya Aprili, munu tafulusa formilere ya kusala bangunga 30, kansi mu tasala ngolo sambu na kusala bangunga 50.” Mpangi-nkento mosi ya kesalaka kisalu ya kinsuni yina kebakaka yandi ntangu yonso, sonikaka nde: “Yo kele mpasi ve na kulungisa bangunga makumi tatu!” Ntangu bo pesaka luzayisu ya ngidika yai, mpangi mosi ya bamvula 80, yina vandaka ntete mupasudi-nzila, tubaka nde: “Yai kele ntangu ya mono vandaka kuvingila! Yehowa zabaka nde kisalu ya kimupasudi-nzila vandaka kisalu mosi ya kuluta mbote na luzingu na mono!” Bampangi yankaka yina lenda sala ve kisalu ya kimupasudi-nzila nsadisi kevandaka ti lukanu ya kusala mingi na kisalu ya kusamuna.

3. Inki bikuma beto kele na yo ya kusala kisalu ya kimupasudi-nzila nsadisi na Marsi, Aprili, mpi Mayi?

³ Marsi tavanda ngonda mosi ya mbote kibeni ya kusala kisalu ya kimupasudi-nzila nsadisi sambu beto tavanda dyaka ti dibaku ya kusala bangunga 30 to 50 yina bo kelombaka. Dyaka, yantika na kilumbu ya Mposo, Marsi 17, beto tasala kampanye mosi ya sipesiali sambu na kubingisa bantu na kuvukana ti beto na Lusungiminu na Aprili 5. Bampangi mingi tavanda na kyese kana bo sala mingi na kisalu ya kusamuna sambu bo kuka kusala kisalu ya kimupasudi-nzila nsadisi na Aprili mpi na Mayi na kulungisaka bangunga 50 yina bo kelombaka.

4. Inki mutindu beto lenda yedisa kisalu na beto, mpi yo tanatila beto nki mambote?

⁴ Na nkokila ya Lusambu ya Dibuta yina kekwisa, sambu na nki ve kutadila mutindu konso muntu na dibuta lenda yedisa kisalu na yandi na nsungi ya Lusungiminu? (Bing. 15:22) Beno lomba Yehowa na kusakumuna bikesa na beno. (1 Yoa. 3:22) Ntangu beno kesala mingi na kisalu ya kusamuna, beno ta pesa dyaka Yehowa lukumu ya mingi mpi takuma ti kyese ya mingi dyaka.—2 Kor. 9:6.