Keti Nge Ta Sala Kisalu ya Kimupasudi-Nzila Nsadisi?
1. Sambu na nki nsungi ya Lusungiminu kele ntangu mosi ya mbote ya kuyedisa kisalu na beto ya kusamuna?
1 Nsungi ya Lusungiminu kele ntangu mosi ya mbote ya kuyedisa kisalu na beto ya kusamuna. Yo kele ntangu beto ke yindululaka zola ya nene ya Yehowa, mutindu yandi pesaka mwana na yandi bonso nkudulu. (Yoa. 3:16) Beto ke vandaka na ntonda ya mingi sambu na mambu yina Yehowa me salaka sambu na beto, mpi yo ke kumisaka ngolo mpusa na beto ya kuzabisa bantu ya nkaka mambu ya me tala Yehowa mpi yina yandi ta sala sambu na bantu. (Yez. 12:4, 5; Luka 6:45) Yo kele mpi ntangu yina beto ke vandaka na kiese ya kusala kampanye mosi ya sipesiali sambu na kubingisa bantu ya beto me zaba mbote mpi bantu ya teritware na beto na kuvukana ti beto na Lusungiminu. Na nima, beto ke sosaka kuyedisa mpusa ya bantu yina vukanaka ti beto. Keti nge ta sala kisalu ya kimupasudi-nzila nsadisi na ngonda ya Marsi, Aprili, to Mayi sambu na kuyedisa kisalu na nge ya kusamuna?
2. Sambu na nki Marsi kele ngonda mosi ya mbote mpenza ya kusala kisalu ya kimupasudi-nzila nsadisi?
2 Sala Nde Marsi Kuvanda Ngonda Mosi ya Sipesiali: Marsi ta vanda ngonda mosi ya mbote mpenza ya kusala kisalu ya kimupasudi-nzila nsadisi. Bayina ta fulusa formilere, ta pona na kusala bangunga 30 to 50 yina bo ke lombaka. Kana nkengi ya nziunga ta tala dibundu na beno na Marsi, bapasudi-nzila nsadisi ta vukana na lukutakanu yina yandi ta sala ti bapasudi-nzila ya ntangu yonso mpi bapasudi-nzila ya nene, banda luyantiku tii na nsuka. Lusungiminu ta salama na Kizole, Marsi 26, 2013. Na mvula yai, kampanye ya kukabula baemvitasio ta yantika na Marsi 1 mpi yo ta baka bilumbu mingi kuluta bamvula ya me luta. Diaka, ngonda ya Marsi kele na bawikendi tanu. Yo yina, beto ke lomba nge na kutadila mbote-mbote kana nge lenda pesa maboko sambu ngonda ya Marsi kuvanda ya sipesiali na mvula.
3. Inki mutindu beto lenda kudibongisa sambu na kuyedisa kisalu na beto ya kusamuna?
3 Kudibongisa Ntangu Yai: Yai kele ntangu ya kuyidika manaka na nge mpi kutadila bansoba yina nge lenda sala sambu na kukuma mupasudi-nzila. Yo ta vanda mfunu na kuwakana mbote na dibuta; yo yina, na nkokila ya Lusambu ya Dibuta na beno, beno baka ntangu ya kutubila balukanu ya dibuta na beno mpi beno sala manaka. (Bing. 15:22) Kana nge ta kuka ve kusala kisalu ya kimupasudi-nzila nsadisi, kulemba nitu ve. Keti nge lenda yidika manaka na nge sambu na kulutisa ntangu mingi bilumbu nge ta basikaka na kisalu ya kusamuna? Keti nge lenda yika kilumbu ya nkaka konso mposo sambu na kusamuna?
4. Inki mambote beto ta baka kana beto yedisa kisalu na beto na ngonda ya Marsi, Aprili, mpi Mayi?
4 Ntangu beto ta yedisa kisalu na beto na ngonda ya Marsi, Aprili, mpi Mayi, kiese yina beto ke bakaka kana beto ke sadila Yehowa mpi ke pesa bankaka ta kukuma mingi kibeni. (Yoa. 4:34; Bis. 20:35) Kima ya kuluta mfunu kele nde, bikesa na beto sambu na kuditambika ta pesa Yehowa kiese.—Bing. 27:11.