Nsungi ya Lusungiminu—Dibaku Mosi ya Kusala Mingi Kisalu ya Kusamuna!
1. Inki bikuma beto fwete tadila sambu na kusala mingi kisalu na beto ya kusamuna na nsungi ya Marsi, Aprili, ti Mayi?
1 Keti nge lenda sala mingi na kisalu ya kusamuna na nsungi ya Lusungiminu yina kekwisa? Na bisika mingi beto kemonaka nde nsungi yina kevandaka mbote sambu bilumbu kevandaka nda kuluta bampimpa. Bansamuni yankaka tabaka konzie na kisalu to na nzo-nkanda mpi kusadila ntangu yina sambu na kusamuna. Kubanda na Aprili 2, beto tasala kampanye ya sipesiali sambu na kubingisa bantu yina kesepelaka na kyeleka na kukwisa kuvukana ti beto na Lusungiminu yina tasalama na Aprili 17. Na nima, beto tasala ngolo sambu na kuyedisa mpusa ya bantu yina kukwisaka mpi kulomba bo na kukwisa kulanda diskure ya sipesiali yina tasalama na mposo ya Aprili 25. Ya kyeleka, beto kele ti bikuma mingi ya kutadila sambu na kusala mingi kisalu na beto na nsungi ya Marsi, Aprili, ti Mayi.
2. Inki kele mutindu mosi ya kuluta mbote ya kusala mingi na kisalu na beto ya kusamuna?
2 Kisalu ya Kimupasudi-Nzila Nsadisi: Mutindu mosi ya kuluta mbote ya kusala mingi kele kusala bonso mupasudi-nzila nsadisi. Sambu beto yonso kevandaka ti mambu mingi ya kusala, mbala mingi yo kelombaka nde beto kudibongisa na ntwala mpi kusala bansoba na manaka na beto. (Bing. 21:5) Ziku, nge lenda tula na lweka bisalu yankaka ya kukonda mfunu yina nge kesalaka konso kilumbu. (Filp. 1:9-11) Sambu na nki ve kumonisa mpusa na nge ya kukuma mupasudi-nzila na bantu yankaka ya dibundu sambu na kutala kana bo lenda kuma mpi bapasudi-nzila nsadisi bonso nge?
3. Inki mutindu mabuta lenda yidika manaka sambu na kusala mingi na kisalu na bo ya kusamuna?
3 Na Nkokila ya Lusambu ya Dibuta na beno yina kekwisa, yo tavanda mbote na kutubila balukanu ya dibuta na beno. (Bing. 15:22) Kana beno wakana mbote, mbala yankaka bantu yankaka ya dibuta lenda sala kisalu ya kimupasudi-nzila nsadisi ngonda mosi to bangonda mingi. Kansi, inki beno lenda sala kana beno mona nde yo tavanda mpasi? Dibuta lenda yidika dyaka manaka na bo sambu na kusala mingi na kisalu ya kusamuna na bankokila yankaka to kusala bangunga mingi na wikendi.
4. Inki balusakumunu beto tabaka na kusalaka mingi na kisalu na beto ya kusamuna na nsungi yai ya Lusungiminu?
4 Yehowa kemonaka mambu yonso ya beto kesalaka sambu na kusadila yandi mpi kesepelaka ti bibansa yina beto kesalaka. (Baeb. 6:10) Beto tavanda na kyese ntangu beto kepesa Yehowa mpi bankaka. (1 Bans. 29:9; Bis. 20:35) Keti nge lenda sala mingi na kisalu na nge ya kusamuna na nsungi ya Lusungiminu yai mpi kubaka kyese ya mingi ti balusakumunu yina yo kenataka?