“Kulonga Nsangu ya Mbote”
1. Inki nsangu ya mbote beto fwete zabisa?
1 Na nsi-ntoto yai ya bantu kewaka ve mbala mingi nsangu ya mbote, beto kele na dibaku ya “kulonga nsangu ya mbote nde Nzambi me wilaka bantu mawa.” (Bis. 20:24) Nsangu yango ya mbote kelomba mpi kuzabisa bantu nde kubika fyoti, nsi-ntoto ya mpa ya lunungu ya Yehowa tayinga “bilumbu ya nsuka.” Na nsi-ntoto yina ya mpa, “mambu ya ntama ta vanda me vila.” (2 Tim. 3:1-5; Kus. 21:4) Na ntangu yina, maladi tavanda dyaka ve. (Yez. 33:24) Bantu ya beto kezolaka yina mefwaka tafutumuka mpi tavukana dyaka ti mabuta mpi banduku na bo. (Yoa. 5:28, 29) Ntoto ya mvimba takituka paladisu mosi ya kitoko. (Yez. 65:21-23) Yai kele kaka bambandu fyoti ya nsangu ya mbote yina beto fwete zabisa!
2. Sambu na nki nsungi ya Lusungiminu kele dibaku ya mbote ya kuzabisa nsangu ya mbote?
2 Bangonda ya Marsi, Aprili, ti Mayi tavanda mabaku ya mbote ya kuzabisa nsangu yina ya mbote. Na bangonda yina, nsungi kevandaka mbote na bansi mingi mpi bilumbu kevandaka nda kuluta bampimpa, yo yina, yo kele bangonda ya mbote sambu na kulutisa ntangu mingi na kisalu ya kusamuna. Dyaka, na Mposo, Marsi 22 na nima ya kudinda ya ntangu, na nsi-ntoto ya mvimba, beto tasala Lusungiminu, yina kele dibaku ya kuluta mfunu ya mvula. Beto fwete yantika kudibongisa ntangu yai sambu na kusala mingi kuluta na kisalu ya bilanga.
3. Inki tasadisa dibuta na beno na kusala mingi na kisalu ya kusamuna?
3 Kisalu ya Kimupasudi-Nzila Nsadisi: Keti nge lenda bongisa manaka na nge sambu na kusala kisalu ya kimupasudi-nzila nsadisi ata na ngonda mosi, bangonda zole, to bangonda yonso tatu? Beno lenda baka mwa ntangu na kulonguka na beno ya dibuta yina kelanda sambu na kutadila dyambu yai. Kana beno wakana mbote, muntu mosi to bantu mingi ya dibuta lenda kuka kusala kisalu ya kimupasudi-nzila nsadisi. (Bing. 15:22) Beno tubila dyambu yango na kisambu, mpi beno tadila mutindu Yehowa tasakumuna bikesa ya beno kesala. (Bing. 16:3) Ata kana muntu mosi ve na dibuta lenda sala kisalu ya kimupasudi-nzila nsadisi, bantu yonso ya dibuta lenda baka balukanu ya sikisiki sambu na kusala mingi na kisalu ya kusamuna mpi kusala kumosi ti bampangi yina takuka kusala kisalu ya kimupasudi-nzila.
4. Kana nge kesalaka kisalu konso kilumbu, inki mutindu nge lenda bongisa manaka na nge sambu na kusala kisalu ya kimupasudi-nzila nsadisi?
4 Kana nge kesalaka kisalu konso kilumbu, nge lenda bongisa manaka na nge mbote sambu yo sadisa nge na kusala kisalu ya kimupasudi-nzila nsadisi. Ziku nge lenda sadila ntangu na nge ya kupema sambu na kusamuna. To nge lenda lomba teritware mosi penepene na nzo na nge to ya kisika ya kisalu na mpila nde nge samuna kiteso ya ngunga mosi na ntwala to na nima ya kisalu. Sambu na kuyika ntangu yankaka na manaka na nge, nge lenda soba mambu ya kukonda mfunu ya nge kanaka kusala na ngonda yina sambu na kusala yo na ngonda yankaka, mpi kulutisa bawikendi ya mvimba na kisalu ya kusamuna. Bampangi yankaka mebakaka konzie ya kilumbu mosi to bilumbu zole sambu na kusala mingi na kisalu ya bilanga.
5. Inki mutindu nge lenda sadisa minunu to bambefo na kusala kisalu ya kimupasudi-nzila nsadisi?
5 Kana nge kele mununu, mbefo, to nge kele mpenza ve na ngolo, nge lenda sala kisalu ya kimupasudi-nzila nsadisi kana nge lutisa mwa ntangu konso kilumbu na kisalu ya kusamuna. Lomba Yehowa na kusadisa nge mpi na kupesa nge “ngolo ya nene.” (2 Kor. 4:7) Mpangi-nkento mosi ya bamvula 106 kusalaka kisalu ya kimupasudi-nzila nsadisi. Na lusadisu ya bantu ya fami na yandi yina kuvandaka Bakristu mpi ya bampangi yankaka ya dibundu, yandi samunaka na nzo na nzo, kusalaka bamvutukila, kutwadisaka kulonguka ya Biblia, mpi kusalaka mitindu yankaka ya kisalu ya kusamuna. Yandi sadisaka bantu kumi na kuyantika kulonguka Biblia. Yandi ketuba nde: “Ntangu mu keyindulaka dibaku ya kitoko ya mu vandaka na yo ya kusala bonso mupasudi-nzila nsadisi, ntima na munu kefulukaka mpenza na zola ti ntonda sambu na Yehowa, sambu na Mwana na yandi, mpi sambu na organizasio na Yandi ya zola. Mu kezola kutuba mpenza ‘Mersi na nge, Yehowa!’ ”
6. Inki mutindu baleke yina mebakaka mbotika mpi ya kele ntete na nzo-nkanda lenda sala kisalu ya kimupasudi-nzila nsadisa?
6 Kana nge kele leke ya mebakaka dezia mbotika mpi ya kele ntete na nzo-nkanda, nge mpi lenda sala kisalu ya kimupasudi-nzila nsadisi. Bonso bampangi yina kesalaka kisalu ya kinsuni konso kilumbu, nge lenda sadila ntetentete bawikendi sambu na kusamuna. Mbala yankaka, nge lenda sala mpi kiteso ya ngunga mosi bilumbu yankaka na nima ya nzo-nkanda. Nge lenda sadila mpi nsungi ya nge kele na konzie sambu na kusamuna. Kana nge kezola kusala kisalu ya kimupasudi-nzila nsadisi, solula yo ti bibuti na nge.
7. Inki bankuluntu lenda sala sambu nde bampangi kuvanda na kyese na kisalu ya kusamuna na nsungi ya Lusungiminu?
7 Vanda na Kyese: Mbandu yina bankuluntu kepesaka lenda sadisa mpenza bampangi ya dibundu na kuvanda na kyese. (1 Pie. 5:2, 3) Bo lenda baka lukanu ya kuyika bilumbu yankaka na manaka ya balukutakanu sambu na kisalu ya bilanga sambu na bantu yina tasamuna na suka, na nima ya nzo-nkanda, to na nima ya kisalu. Nkengi ya kisalu ya kusamuna fwete zikisa nde bo mepona bansamuni yina mefwana sambu na kutwadisa lukutakanu ya kisalu ya bilanga. Yandi fwete zikisa mpi nde dibundu kele ti bateritware, bazulunalu, mpi mikanda yina beto takabula na bangonda yina ya kisalu ya sipesiali.
8. Inki dilongi beto kebaka na mambu yina dibundu mosi kusalaka?
8 Na dibundu mosi, bankuluntu yantikaka kusyamisa bampangi na kusala kisalu ya kimupasudi-nzila nsadisi bangonda mingi na ntwala. Konso mposo, bo vandaka kuzabisa dibundu bazina ya bantu yina ya bo ndimaka na kusala kisalu ya kimupasudi-nzila nsadisi. Mpidina, bampangi yina kuvandaka na mpusa ya kusala mingi na kisalu ya kusamuna kuzabaka nde bantu ya kusala ti bo tavanda mingi. Bankuluntu kubongisaka balukutakanu ya ngika sambu na kisalu ya bilanga na suka mpi na nkokila. Nsukansuka, bansamuni 53 kusalaka kisalu ya kimupasudi-nzila nsadisi na Aprili, disongidila katikati ya dibundu ya mvimba!
9. Sambu na nki nsungi ya Lusungiminu kele ntangu ya mbote sambu bantu yina mefwana na kukuma bansamuni kuyantika kusamuna nsangu ya mbote?
9 Sadisa Bankaka na Kusamuna: Kana bantu ya mpa ti baleke mefwana na kukuma bansamuni, bampangi yina kele ti eksperiansi mingi lenda baka bo mpi kusala ti bo na kisalu ya bilanga. Dibaku ya mbote ya kusala mutindu yai lenda vanda na nsungi ya Lusungiminu ntangu bantu mingi ya dibundu tasala mingi na kisalu ya kusamuna. Keti nge kelongukaka Biblia ti muntu mosi yina keyela mbote mpi mewakanisa luzingu na yandi ti minsiku ya lunungu ya Yehowa? Keti nge kele na bana yina kele ti bikalulu ya mbote mpi ya keyela mbote, kansi ya kele ntete ve bansamuni? Kana bo monisa mpusa ya kukuma bansamuni mpi nge kemona nde bo kelungisa mambu ya bo kelombaka na kuvanda bansamuni, zabisa yo nkuluntu mosi. Nkengi-ntwadisi tabaka bangidika na mpila nde bankuluntu zole kusolula dyambu yai ti nge mpi ti mwana to longoki na nge.
10. Inki bankuluntu lenda sala sambu na kusadisa bantu yina kesamunaka dyaka ve?
10 Bangonda yina kekwisa tavanda mpi bangonda ya mbote sambu na bantu yina kesamunaka dyaka ve na kuvutukila kusamuna ti dibundu. Bankengi na Kulonguka ya Mukanda ya Dibundu mpi bankuluntu yankaka fwete sala kikesa mpenza sambu na kukwenda kutala bantu ya mutindu yai mpi kubinga bo na kyese yonso na kusala kumosi ti bo na kisalu ya kusamuna. Kana bo mebikisaka kusamuna banda ntama, bankuluntu zole fwete solula ntete ti bo sambu na kuzaba kana bo kelungisa dyaka mambu ya bo kelombaka na kuvanda nsamuni.—km 11/00 lut. 3.
11. Inki kele mutindu ya kuluta nene yina “Nzambi me wilaka bantu mawa”?
11 Kudibongisa Sambu na Lusungiminu: Nkudulu kele mutindu ya kuluta nene yina “Nzambi me wilaka bantu mawa.” (Bis. 20:24) Na nsi-ntoto ya mvimba, bantu mingi kibeni yina kemonisaka ntonda tavukana na Mposo, Marsi 22, na nima ya kudinda ya ntangu, sambu na kusala Lusungiminu ya lufwa ya Kristu. Beto kezola kubinga mpi kusadisa bantu yonso ya ntima masonga na kukwisa na dibaku yai ya mfunu ya ketaka kimbangi na mawa yina Yehowa mewilaka bantu.
12. Nani beto fwete binga na Lusungiminu?
12 Sala lisiti ya bantu yina nge kezola kubinga. Ntembe kele ve nde nge tatula na lisiti yango bazina ya bantu ya dibuta na nge, ya bamfinangani, ya bantu yina nge mezabaka na kisalu to na nzo-nkanda, bantu ya nge vandaka kulonguka ti bo Biblia na ntama mpi bayina nge kelonguka ti bo bubu yai, mpi bantu yonso yankaka yina nge kevutukilaka mbala na mbala. Kana bantu yina nge mebinga kele ti bangyufula na yina metala Lusungiminu, nge lenda sadila appendice, ya ketubila Madya ya Nkokila ya Mfumu, yina kele na balutiti 206-8 ya mukanda Biblia Kelongaka. Nkutu, yo tapesa nge dibaku ya kusonga mukanda yina beto kesadilaka sambu na kulonguka Biblia ti bantu mpi kusadisa nge na kuyantika kulonguka Biblia ti muntu yango.
13. Inki mutindu Yehowa kusakumunaka bikesa ya bansamuni zole yina kubakaka lukanu ya kubinga bantu yankaka na Lusungiminu?
13 Mpangi-nkento mosi kusalaka lisiti ya mabuta 48 yina yandi zolaka kubinga. Ntangu yandi vandaka kubinga bo, yandi vandaka kutula kidimbu na bazina na bo mpi kusonika dati yina yandi vandaka kubinga bo. Yandi vandaka na kyese kibeni na kumona nde bantu 26 yina yandi bingaka kukwisaka na Lusungiminu! Mpangi-bakala mosi ya kele ti magazini na yandi kubingaka muntu na yandi ya kisalu yina kuvandaka ntete nganga-Nzambi. Muntu yango kukwendaka na Lusungiminu mpi na nima yandi tubaka nde: “Na ngunga mosi, mu melonguka mambu mingi ya metala Biblia, kuluta yina mu longukaka bamvula 30 ya mu lutisaka na eglize ya Katolika.” Ntangu fyoti na nima ya Lusungiminu, yandi ndimaka kulonguka Biblia na mukanda Biblia Kelongaka.
14. Inki kampanye tasalama na ntoto ya mvimba yantika na Marsi 1?
14 Kampanye: Yantika na Mposo, Marsi 1, tii na Marsi 22, beto takabula na ntoto ya mvimba emvitasio ya sipesiali sambu na Lusungiminu. Beto kesyamisa bansamuni yonso na kusala mpenza kampanye yai ya mfunu. Yo tavanda mbote na kupesa emvitasio na maboko ya muntu yandi mosi na kisika ya kubika yo na kyelo ya nzo. Kansi, kana teritware na beno kele nene, bankuluntu lenda zabisa kana beno fwete bika batrakiti na bakyelo ya banzo ya bantu yina beno takuta ve. Na bawikendi, beto takabulaka mpi baperiodike yina tabasika na ntangu yina.
15. Inki beto lenda tuba na ntwala ya kupesa bantu emvitasio ya Lusungiminu?
15 Sambu beto tavanda ve ti ntangu mingi ya kukabula ba emvitasio, yo tavanda mbote kuluta na kusadila bangogo ya nkufi ya kukotila na masolo. Tuba na mutindu mosi ya mbote mpi na kyese yonso. Nge lenda tuba nde: “Beto kezola kubinga nge, bantu ya fami na nge, ti banduku na nge na dyambu mosi ya mfunu yina tasalama na Marsi 22. Emvitasio na nge yo yai. Mambu yonso kele na kati.” Mbala yankaka muwi tavanda ti bangyufula. To yandi lenda ndima emvitasio mpi nkutu kutuba nde yandi tavanda pana. Sonika ba adresi ti bazina ya bantu yina memonisa mpusa, mpi kudibongisa sambu na kuvutukila bo.
16. Inki mbandu kemonisa mfunu ya kampanye ya kubinga bantu ya teritware na Lusungiminu?
16 Na mvula meluta, soda mosi kukutaka emvitasio ya Lusungiminu na kyelo na yandi. Yandi bakaka lukanu ya kukwenda na Lusungiminu, kansi yo lombaka nde yandi lomba nswa na mfumu na yandi. Ntangu yandi songaka emvitasio yango na mfumu na yandi, mfumu yango kubikalaka ntete pima, na nima yandi tubaka nde bibuti na yandi kele Bambangi ya Yehowa ebuna yandi mosi mpi vandaka kukwenda na balukutakanu ti bo. Mfumu yango kupesaka ve kaka soda yina nswa ya kukwenda na Lusungiminu, kansi yandi mpi kukwendaka ti yandi.
17. Inki mutindu beto kemonisaka nde beto kebakisaka lukanu ya mambote yina beto mefwana ve na kubaka yina Nzambi memonisilaka beto?
17 Monisa Ntonda: Mutindu nsungi ya Lusungiminu ya mvu 2008 mekuma penepene, bika nde konso muntu na kati na beto kuyindulula mambote yina beto mefwana ve na kubaka yina Yehowa memonisilaka beto. Ntumwa Polo kusonikaka nde: “Beto ke bondilaka beno nde: Beno vidisa ve mambote yina ya beno me bakaka na Nzambi.” (2 Kor. 6:1) Inki mutindu beto kemonisaka nde beto kebakisaka mpenza lukanu ya mambote yina beto mefwana ve na kubaka yina Nzambi memonisilaka beto? Polo kusonikaka nde: “Beto ke songaka na mambu yonso nde beto ke sadilaka Nzambi.” (2 Kor. 6:4) Yo yina, beto kemonisaka ntonda sambu na dikabu yina Yehowa mepesaka beto na bikalulu na beto ya mbote mpi na kikesa ya beto kesalaka na kisalu ya kusamuna nsangu ya mbote. Na nsungi yai ya Lusungiminu, beto tavanda ti dibaku ya mbote mpenza sambu na kusala mingi na kisalu ya kulonga nsangu ya mbote.
[Lupangu ya kele na lutiti 3]
Banani Lenda Sala Kisalu ya Kimupasudi-Nzila Nsadisi?
◼ Mabuta
◼ Bantu yina kesalaka kisalu konso kilumbu
◼ Minunu ti bambefo
◼ Bana ya nzo-nkanda
[Lupangu ya kele na lutiti 4]
Na Ntangu Nge Kekabula Baemvitasio ya Lusungiminu:
◼ Kutuba mingi ve; tuba ti kyese yonso
◼ Sonika ba adresi ya bantu yina memonisa mpusa, mpi vutukila bo
◼ Pesa baperiodike na bawikendi