Lukanu Mosi ya Mbote Sambu na Mvula ya Kisalu ya Mpa
1. Inki lukanu beto lenda kuditula sambu na mvula ya kisalu ya mpa?
1 Beto fwete kuditula balukanu kana beto kezola kuyela na kimpeve. Inki balukanu nge mekuditula sambu na mvula ya kisalu ya mpa? Kusala bonso mupasudi-nzila nsadisi na nsungi ya ngonda mosi to ya bangonda mingi kele lukanu mosi ya mbote. Sambu mbala mingi kisalu yai ya kitoko kelombaka kudibongisa na ntwala, yai kele ntangu ya mbote ya kuyantika kudibongisa. Sambu na nki kuditula lukanu ya kusala bonso mupasudi-nzila nsadisi?
2. Inki bikuma kepusa beto na kuditula lukanu ya kusala bonso mupasudi-nzila nsadisi?
2 Bikuma ya Kuvanda Mupasudi-Nzila Nsadisi: Kusala kisalu ya kimupasudi-nzila nsadisi kesadisaka beto na kusepedisa Tata na beto ya zulu mingi “kuluta,” sambu beto kelutisaka ntangu mingi na kusamuna. (1 Tes. 4:1) Kana beto tadila mambu yonso ya Yehowa mesalaka sambu na beto, ntima na beto fwete pusa beto na kutela bantu yankaka mambu yango. (Nk. 34:2, 3) Yehowa kemonaka mpi kebakaka na valere bibansa ya beto kesalaka sambu na kusamuna mingi. (Baeb. 6:10) Kuzaba nde kisalu na beto ya ngolo kesepedisaka Yehowa kepesaka beto kyese mingi.—1 Bans. 29:9.
3, 4. Inki mambote beto kebakaka na kisalu ya kimupasudi-nzila nsadisi?
3 Mbala mingi, kana nge kesala kima mosi mingi, yo kekumaka pete na kusala yo mpi nge takuma kuzola mpenza kusala yo. Kulutisa ntangu mingi na kisalu ya kusamuna tasadisa nge na kukuma kutuba kukonda boma ntangu nge kesamuna nzo na nzo. Nge takuma ti mayele mingi ya kuyantika kusolula ti bantu mpi na kusadila Biblia. Kana nge ketubila lukwikilu na nge mingi, yo takuma mpi ngolo mingi. Bantu mingi yina vandaka ve kutwadisa kulonguka ya Biblia kukukaka na kusala yo ntangu bo salaka kisalu ya kimupasudi-nzila nsadisi.
4 Kisalu ya kimupasudi-nzila nsadisi lenda pesa beto mpi kikesa ya kununga kima mosi ya kekanga beto nzila ya kuyela na kimpeve. Mpangi mosi ya vandaka ntete mupasudi-nzila ya ntangu yonso kubakisaka nde yandi vandaka kutula dikebi mingi na kisalu ya kinsuni. Yo yina, yandi bakaka lukanu ya kusala kisalu ya kimupasudi-nzila nsadisi na ngonda mosi. Yandi tubaka nde: “Mu yitukaka mingi kibeni mutindu ngonda mosi mpamba kupesaka munu kikesa na kimpeve! Mu bakaka bangidika sambu na kusala kisalu ya kimupasudi-nzila nsadisi kukonda kuzenga, ebuna nsukansuka yo sadisaka munu na kukuma dyaka mupasudi-nzila ya ntangu yonso.”
5. Inki mutindu beto lenda kuka kununga mawi ya kuyindula nde beto takuka ve kusala kisalu ya kimupasudi-nzila nsadisi?
5 Kununga Bigonsa: Bampangi yankaka lenda vanda ti badute na kulomba kisalu ya kimupasudi-nzila nsadisi sambu bo keyindula nde bo mekonda mayele ya kulonga. Kana nge keyindula nge lenda kuka ve kuvanda mupasudi-nzila nsadisi, Yehowa lenda sadisa nge mutindu yandi sadisaka Yeremia. (Yer. 1:6-10) Ata Moize vandaka kutuba “na kukukama,” Yehowa kusadilaka yandi sambu na kulungisa luzolo na Yandi. (Kub. 4:10-12) Kana nge keyindula nde nge takuka ve, bondila Yehowa sambu yandi pesa nge kikesa.
6. Inki mutindu beto lenda sala kisalu ya kimupasudi-nzila nsadisi ata beto kele ti maladi to kevandaka ti mambu mingi ya kusala?
6 Keti nge kemona nde nge takuka ve sambu na maladi to sambu nge kevandaka na mambu mingi ya kusala? Kana nge kele ve na ngolo mingi, nge kele mbefo to mununu, kusala yo na mutindu yina mefwana na nge lenda sadisa nge na kusala kisalu ya kimupasudi-nzila nsadisi. Kana nge kevandaka ti mambu mingi ya kusala, ziku nge lenda baka lukanu ya kusala bisalu yankaka ya kukonda mfunu na ngonda yankaka. Bampangi yankaka ya kesalaka kilumbu ya mvimba mekukaka na kusumba ntangu sambu na kusala kisalu ya kimupasudi-nzila nsadisi na kulombaka kilumbu mosi to bilumbu zole ya konzie.—Kol. 4:5.
7. Sambu na nki yo kele mfunu na kulanda na kusamba sambu na kisalu ya kimupasudi-nzila nsadisi?
7 Mutindu ya Kusala Yo: Sambaka sambu na mpusa na nge ya kuvanda mupasudi-nzila nsadisi. Lomba Yehowa na kusakumuna bikesa na nge ya kuyedisa kisalu na nge. (Roma 12:11, 12) Yandi lenda sadisa nge na kubaka badesizio ya mbote na yina metala mutindu ya kusoba manaka na nge. (Yak. 1:5) Kana nge kele ve ti mpusa, samba Yehowa sambu yandi sadisa nge na kumona kyese na kisalu ya kusamuna.—Luka 10:1, 17.
8. Inki mutindu kusadila Bingana 15:22 lenda sadisa nge na kusala kisalu ya kimupasudi-nzila nsadisi?
8 Beno tadila na kimvuka na dibuta lukanu ya kusala kisalu ya kimupasudi-nzila nsadisi. (Bing. 15:22) Ziku muntu mosi ya dibuta lenda sala kisalu yango, ebuna bantu yankaka kupesa yandi maboko. Solula ti bampangi yankaka ya dibundu sambu na mpusa na nge ya kukuma mupasudi-nzila, mingimingi ti bayina mambu to luzingu na bo mefwanana ti ya nge. Yo lenda sala nde bampangi yankaka mpi kukuma ti mpusa ya kusala kisalu ya kimupasudi-nzila nsadisi.
9. Inki bangonda nge lenda pona na kusala kisalu ya kimupasudi-nzila nsadisi?
9 Ntangu nge ketadila manaka na nge ya kisalu ya kusamuna sambu na mvula ya kisalu ya mpa, inki ngonda nge takuka kusala kisalu ya kimupasudi-nzila nsadisi? Kana nge kesalaka kilumbu ya mvimba to kekwendaka na nzo-nkanda, nge lenda tadila bangonda yina kele ti bakonzye to yina kele ti bilumbu ya Mposo to ya Lumingu tanu. Mu mbandu, Septembri, Desembri, Marsi, mpi Augusti kele ti bawikendi tanu. Mayi kele ti bilumbu ya Mposo tanu, mpi Yuni kele ti Balumingu tanu. Kana nge kele ti kimbefo, tadila bangonda yina nge lenda sala yo kukonda mpasi. Nge lenda tadila mpi kusala kisalu ya kimupasudi-nzila nsadisi na ngonda yina nkengi ya nzyunga takwisa kutala dibundu na beno. Na viziti na yandi, nge tavanda ti dibaku ya kuvukana na kitini ya ntete ya lukutakanu ya yandi tasala ti bapasudi-nzila ya ntangu yonso. Sambu na mvula ya kekwisa, Lusungiminu tasalama na Marsi 22, ebuna Marsi, Aprili, ti Mayi kele bandonga ya mbote ya kusala kisalu ya kimupasudi-nzila nsadisi. Na nima ya kupona ngonda to bangonda yina nge tasala kisalu ya kimupasudi-nzila nsadisi, yantika kusala manaka yina tasadisa nge na kulungisa bangunga yina bo kelombaka.
10. Inki nge lenda sala kana nge lenda kuka ve kusala kisalu ya kimupasudi-nzila nsadisi?
10 Ata nge keyindula nde nge takuka ve kusala kisalu ya kimupasudi-nzila nsadisi na mvula yai ya kekwisa, nge lenda vanda ti mpeve ya kimupasudi-nzila. Landa na kusala yonso yina nge lenda sala na kisalu ya kusamuna, mpi tula ntima nde Yehowa kesepelaka na bikesa ya masonga ya nge kesala na ntima ya mvimba na kisalu na yandi. (Gal. 6:4) Pesa maboko na bampangi yina takuka kusala bonso bapasudi-nzila nsadisi mpi syamisa bo. Ziku nge lenda soba manaka na nge sambu na kusamuna na bilumbu ya ngika ti bampangi yina kele bapasudi-nzila.
11. Sambu na nki beto fwete sala mambu kukonda kusukinina?
11 Bansadi ya Yehowa kesalaka mambu kukonda kusukinina. Bo kele ti kisalu mosi ya bo fwete sala: kisalu ya kusamuna nsangu ya mbote. Luzingu ya bantu kele na kigonsa, mpi ntangu mebika dyaka mingi ve. (1 Kor. 7:29-31) Zola sambu na Yehowa mpi sambu na nkweno fwete pusa beto na kusala mambu yonso ya beto lenda sala na kisalu ya kusamuna. Kana beto sala bikesa mpi kudibongisa mbote, beto lenda kuka kusala kisalu ya kimupasudi-nzila nsadisi ata ngonda mosi mpamba na mvula yai ya mpa ya kisalu. Ebuna dyambu yai kele lukanu mosi ya mbote mpenza!