Mabaku ya Kukumisa Yehowa Me Kuma Mingi

1. Inki ngidika ya mpa ta sadisa beto na kukumisa Yehowa mingi?

¹ Na ngonda ya Marsi ya me katuka kuluta, ngidika mosi ya mpa yantikaka; yo ke pesa bansamuni dibaku ya kusala kisalu ya kimupasudi nzila-nsadisi konso ngonda ya Marsi, Aprili mpi ngonda ya viziti ya nkengi ya nziunga, na kupesaka bangunga 30 yina bo ke lombaka. Kana viziti ya nkengi ya nziunga kele ti bilumbu yina ke bwa na bangonda zole, bansamuni yina lombaka na kusala bangunga  30 lenda pona ngonda yina bo lenda sala kisalu ya kimupasudi-nzila nsadisi. Bapasudi-nzila nsadisi yonso lenda landa lukutakanu ya mvimba yina nkengi ya nziunga ta sala ti bapasudi-nzila ya ntangu yonso mpi ya nene. Yo ke tendula nde, kana beto ke kuka ve bangunga 50 yina bo ke lombaka, beto lenda kukumisa mpi Yehowa mingi na kupesaka bangunga 30 na kisalu ya kimupasudi-nzila nsadisi mbala iya na mvula!—Nk. 109:30; 119:171.

2. Bansamuni yina ta sala kisalu ya kimupasudi-nzila nsadisi na nsungi ya viziti ya nkengi ya nziunga ta baka nki mambote?

² Na Viziti ya Nkengi ya Nziunga: Ntangu yai bantu mingi ta kuka kusala kisalu ya kimupasudi-nzila nsadisi na nsungi ya viziti ya nkengi ya nziunga mpi kubaka mambote ya kupesana kikesa ti yandi na ntangu bo ke samuna kumosi. (Bar. 1:11, 12) Ziku bapasudi-nzila nsadisi mingi ta sosa kubaka konzie kilumbu mosi sambu na kusamuna ti nkengi ya nziunga. Bayina ke salaka kisalu ya kinsuni bilumbu yonso ya mposo lenda yula yandi kana bo lenda samuna kumosi na Sabala to na Lumingu. Diaka, bapasudi-nzila nsadisi ta baka mpenza kikesa ntangu bo ta landa lukutakanu kumosi ti bapasudi-nzila ya ntangu yonso mpi ya nene!

3. Sambu na nki nsungi ya Lusungiminu kele ntangu mosi ya kuluta mbote ya kusala kisalu ya kimupasudi-nzila nsadisi?

³ Na Marsi mpi na Aprili: Bansamuni yina me salaka dezia kisalu ya kimupasudi-nzila nsadisi ya bangunga 30, ngonda mosi na nsungi ya Lusungiminu, lenda fokula ntangu yai ‘kimenga na bo ya lukumu’! (Baeb. 13:15) Marsi mpi Aprili kele bangonda ya kuluta mbote ya kukuma bapasudi-nzila nsadisi sambu na kuyedisa kisalu na beto. Konso mvula na bangonda yai, beto ke salaka kampanye mosi ya mbote sambu na kubingisa bantu ya nkaka na Lusungiminu. Diaka, sambu bampangi mingi ke samunaka mingi na nsungi ya Lusungiminu, beto ta vanda ti mabaku ya kusamuna ti bansamuni ya kuswaswana. Na nima ya Lusungiminu, beto ke vutukilaka bantu yina kwisaka, sambu na kusadisa bo na kusepela diaka na kukwisa kulanda diskure ya sipesiali. Keti ntima na nge ta pusa nge na kubaka mambote ya mabaku yai ya ngika ya kusala kisalu ya kimupasudi-nzila nsadisi?—Luka 6:45.