Longa na Mutindu ya Kendimisa
1. Kusadila mbote Ndinga ya Nzambi na kisalu ya kusamuna kelombaka mbala mingi inki?
1 Bonso ntumwa Polo, bansamuni ya mbote kebakisaka nde ‘kuzabisa nsangu ya kieleka mbote-mbote’ kelombaka mambu mingi kuluta kutubila kaka Masonuku ya Santu. (2 Tim. 2:15) Ntangu beto kesadilaka Ndinga ya Nzambi, inki mutindu beto lenda longa ti kundimisa?—Bis. 28:23.
2. Inki mutindu beto lenda sadisa bantu na kuyedisa luzitu sambu na Ndinga ya Nzambi?
2 Bika nde Ndinga ya Nzambi Kutuba: Ntetentete, twadisa dikebi na Biblia na mutindu yina kepusa muwi na kundima na luzitu yonso nde yo kele ti mayele ya Nzambi. Ntima ya beto ketulaka na Ndinga ya Nzambi lenda pusa muwi na beto na kutula dikebi na lutangu ya verse. (Baeb. 4:12) Beto lenda tuba kaka nde: “Mu memonaka mbote na kubakisa mabanza ya Nzambi na dyambu yai. Tala mambu yina Ndinga na yandi ketuba.” Konso ntangu yina yo kele mfunu, bika nde Ndinga ya Nzambi kutuba na kutangaka yo mbala mosi.
3. Na nima ya kutanga verse, inki beto lenda sala sambu na kusadisa muwi na beto na kubakisa ntendula na yo?
3 Ya zole, tendula verse ya beno metanga. Bantu mingi kemonaka yo mpasi na kubakisa verse na mbala ya ntete ya bo metanga yo. Mbala mingi, yo kevandaka mfunu na kutendula mutindu verse yango kewakana ti disolo ya beno ketubila. (Luka 24:26, 27) Benda dikebi na bangogo ya mfunu. Ngyufula lenda sadisa na kuzikisa kana muntu mebakisa ngindu yina pwelele.—Bing. 20:5; Bis. 8:30.
4. Inki dyambu ya nsuka kele mfunu sambu beto longa na mutindu ya kendimisa?
4 Yindula na Masonuku: Ya tatu, sala ngolo na kusimba mabanza ti ntima. Sadisa muwi na kumona mutindu verse ya beno ketanga ketadila yandi. Kuyindula na Masonuku lenda ndimisa muntu na kusoba bangindu na yandi. (Bis. 17:2-4; 19:8) Mu mbandu, na nima ya kutanga Nkunga 83:18 (NW), beto lenda yindula na mutindu kuzaba zina ya muntu kevandaka mfunu sambu na kuyedisa bangwisana ya ngolo ti muntu yina. Ziku na nima nge lenda yula nde, “Keti nge keyindula nde kuzaba zina ya Nzambi tasala nde bisambu na nge kukuma ya mudindu?” Kuwakanisa verse ti luzingu ya muwi na mutindu yai kemonisaka mbalu na yo. Kulonga na mutindu yai ya kendimisa na nsadisa ya Ndinga ya Nzambi kebendaka bantu ya ntima-masonga na kusambila Nzambi ya kyeleka mpi ya moyo, Yehowa.—Yer. 10:10.