Keti Nge Kenwaninaka Ndinga ya Nzambi?

¹ Na ntoto yai ya bantu kendimaka ve Biblia, Bakristu ya kyeleka kenwaninaka Ndinga ya Nzambi na kikesa yonso. Sambu beto kendimaka mpenza nde “Mukanda ya Nzambi yonso” kele ya kupemama, beto kendimaka mambu yai ya Yezu Kristu kutubaka na kisambu mosi na Yehowa nde ndinga ya Nzambi kele “kieleka.” (2 Tim. 3:16; Yoa. 17:17) Inki mutindu beto lenda kuka kunwanina mbotembote Ndinga ya Nzambi?

² Longuka Masonuku: Ntembe kele ve nde Yezu kulongukaka Ndinga ya Nzambi na kikesa yonso. Kulonguka yina kusadisaka yandi na kusadila Masonuku na kisalu ya kusamuna. (Luka 4:​16-21; 24:​44-46) Inki beto lenda sala sambu na kuzaba baverse mingi na ntu? Beto fwete tanga Biblia konso kilumbu mpi kuyindulula verse yina beto kemona nde yo kepesa mpenza kikesa to yina lenda sadisa beto na kisalu ya kusamuna. Na ntangu beto keyidika balukutakanu, beto fwete tanga baverse yina bo mepesa na Biblia, mpi ziku kubongisa komantere mosi na verse yango. Na ntangu beto kele na balukutakanu, beto fwete landa na Biblia na beto ntangu mutubi ketanga baverse. Kulonguka baverse ya Biblia tasadisa beto na ‘kuzabisa nsangu ya kieleka mbote-mbote.’​—⁠2 Tim. 2:⁠15.

³ Bika nde Biblia Kutuba: Na ntangu beto kesamuna, beto fwete bika nde Biblia kutuba. Mu mbandu, kana mpila kele, beto fwete sala ngolo sambu na kutanga mpi kutadila verse mosi ti muwi. Kana yandi yula ngyufula to kubasisa ntembe mosi, yo kele mbote na kusadila Biblia sambu na kupesa mvutu. Kana muwi kele ti kisalu mingi, beto lenda tuba mutindu yai sambu na kubenda dikebi na yandi na dibanza mosi ya Biblia, “Na ntwala nde mu kwenda, pesa munu nzila ya kutangila nge verse mosi ya Biblia.” Kana mpila kele, pesa muwi nzila ya kutanga kumosi ti nge na ntangu nge ketanga Biblia.

⁴ Ntangu bo songaka muwi mosi baverse ya kemonisaka nde dilongi ya Butatu Busantu kele ya luvunu, yandi tubaka nde: “Na luzingu na munu ya mvimba mu vandaka kukwenda na nzo-Nzambi, kansi mu vandaka kuzaba ve ata fyoti nde Biblia ketubaka dyambu yai!” Yandi ndimaka kulonguka Biblia kukonda kusukinina. Yezu kutubaka nde mameme na yandi tawa ndinga na yandi. (Yoa. 10:​16, 27) Mutindu ya kuluta mbote sambu bantu ya ntima ya masonga kuzaba kyeleka kele ya kumona yo mbala mosi na Biblia. Yo yina, bika nde beto vanda bantu yina kenwaninaka Ndinga ya kyeleka ya Nzambi!