Syamisa Bantu na Kusadila Biblia

MPUSA na beto kele ya kubenda dikebi ya bantu yonso na Ndinga ya Nzambi, Biblia. Nsangu ya beto kelongaka kekatukaka na mukanda yai ya santu, mpi beto kezola nde bantu kubakisa nde mambu ya beto ketuba, kekatuka ve na ntu na beto, kansi na Nzambi. Bantu kele na mfunu ya kutula ntima na Biblia.

Na Kisalu ya Bilanga. Ntangu nge keyilama sambu na kukwenda na kisalu ya bilanga, ponaka ntangu yonso verse mosi to baverse mingi ya nge tatubila ti bantu yina tandima na kuwa nge. Ata nge kekana kutuba mambu fyoti na ntwala ya kupesa muntu mukanda mosi ya ketendulaka Biblia, yo kevandaka mbala mingi mbote na kutanga verse mosi ya Biblia ya mefwana. Biblia kele na ngolo mingi ya kutwadisa bantu yina kele bonso mameme kuluta kima yankaka ya beto lenda tuba. Na kisika yina mpila ya kutanga mbala mosi na Biblia kele ve, nge lenda baka lukanu ya kutuba mambu yina verse yango ketuba. Na mvu-nkama ya ntete, bakopi ya barulo ya Masonuku kuvandaka mingi ve. Ata mpidina, Yezu ti bantumwa na yandi vandaka kutubila mingi mambu mutindu yo kele na Masonuku. Beto mpi fwete sala ngolo na kusimba baverse na ntu mpi kusadila yo mbote na kisalu ya kusamuna, ntangu yankaka kutuba kaka mambu ya yo ketubaka.

Ntangu nge mezwa mpila ya kutanga verse mosi na Biblia, simba Biblia yango na mpila nde muwi na nge mpi kutanga kumosi ti nge na ntangu nge ketanga. Kana muntu yango kelanda nge na Biblia na yandi, yandi lenda ndima kukonda mpasi mambu ya yandi ketanga.

Kansi, kuvila ve nde bambaludi mingi ya Biblia mesobaka Ndinga ya Nzambi. Mambu mingi yina ba Biblia na bo ketubaka kewakanaka ve ti mambu yina bo sonikaka na bandinga ya kisina ya Biblia. Ba Biblia mingi ya ntangu na beto mekatulaka zina ya Nzambi. Yo ketubaka ve pwelele mambu yina bo sonikaka na ndinga ya kisina na yina metala bafwa, mpi yo mebumbaka mambu yina Biblia ketuba na yina metala lukanu ya Nzambi sambu na ntoto. Sambu na kusonga muntu mambu bambaludi yina mesalaka, yo lenda lomba nde beno fwanisa baverse ya mfunu na ba Biblia mingi ya kuswaswana to na ba Biblia mingi ya ntama na ndinga mosi. Na masolo mingi, Comment raisonner à partir des Écritures kefwanisaka mitindu ya kuswaswana ya bo mesonikaka bangogo ya mfunu na baverse ya bantu kesadilaka mingi. Konso muntu yina kezolaka kyeleka tamonisa ntonda na kuzaba mambu yai ya kyeleka.

Na Balukutakanu ya Dibundu. Nge fwete syamisa bantu yonso na kusadila ba Biblia na bo na balukutakanu ya dibundu. Kusala mutindu yina kenataka mambote na mitindu mingi. Yo kesadisaka bawi na kutula mabanza yonso na mambu yina mutubi ketuba. Yo kesadisaka na kumona na meso na bo malongi yina mutubi ketubila. Mpi yo kendimisaka bantu yina meyantika kusepila na kyeleka ntama mingi ve nde, ya kyeleka, malongi na beto kekatukaka na Biblia.

Sambu bawi kulanda nge na ba Biblia na bo ntangu nge ketanga verse mosi ya Masonuku, yo kelomba nde nge syamisa bo na kusala yo. Mutindu mosi ya kuluta mbote ya kusala yo kele ya kulomba mbala mosi bawi na kukangula ba Biblia na bo.

Yo kele mukumba na nge mutubi, na kupona baverse ya nge kezola kutudila dikebi mingi mpi kulomba bawi na kusosa yo. Yo kele mbote na kutanga kaka baverse yina tasadisa nge na kutubila bangindu ya mfunu ya disolo na nge. Na nima, kana ntangu kele, yika baverse yina kesimba bangindu na nge.

Ya kyeleka, kupesa verse mosi to kulomba bawi na kusosa yo mefwana ve. Kana nge tanga verse mosi mpi na nima nge luta na verse yankaka na ntwala nde bawi na nge kuzwa verse ya ntete ya nge pesaka, bo tasukinina ve na kulemba nitu mpi kuyambula na kulanda nge na ba Biblia na bo ntangu nge ketanga. Talaka mbote bawi. Kana nge memona nde bantu mingi mezwa verse yango, pana nge lenda tanga yo.

Yindula na ntwala mambu ya nge tasala na nima. Pesa verse ya nge kezola kutanga mwa ntangu fyoti na ntwala nde nge tanga yo. Yo tasadisa nge na kufyotuna ntangu yina mitubi kevidisaka na kukinga nde bawi kuzwa verse ya yandi mepesa. Kana nge kebikila bawi ntangu ya kufwana na kusosa baverse, nge tatubila ve bangindu mingi, kansi mambote ya bo tabakila yo mefwana mpenza.