Ntendula ya Mbote na Ntwala ya Kutanga Verse

MALONGI ya beto kelongukaka na balukutakanu na beto ya dibundu kekatukaka na Masonuku. Baverse ya Biblia kevandaka mpi mfunu mingi na mambu yina beto ketubaka na kisalu ya bilanga. Kansi, yo tanata mambote mingi na disolo ya beto kesala, kana beto ketendula mambu mbote na ntwala ya kutanga baverse yango.

Yo kelombaka mambu mingi kuluta kupesa kaka verse mpi kulomba bawi na kutanga yo kumosi ti nge. Na ntangu nge ketendula dibanza mosi na ntwala ya kutanga verse mosi, sala ngolo na kulungisa balukanu zole yai: (1) Tedimisa mpusa, mpi (2) benda dikebi na kikuma ya nge ketangila verse yango. Nge lenda lungisa balukanu yai na mitindu mingi ya kuswaswana.

Yula Ngyufula Mosi. Yo kevandaka mbote kuluta kana mvutu kele ntete ve pwelele na ntu ya bawi na nge. Sala ngolo na kuyidika ngyufula yango na mutindu mosi ya kenata bantu na kuyindula. Yezu kusalaka yo. Ntangu Bafarize kukwisaka penepene na yandi na kati ya tempelo mpi kumekaka yandi na meso ya bantu sambu na kutala kana yandi kebakisaka Masonuku, Yezu kuyulaka bo nde: “Nki beno ke banzaka sambu na Mesia? Yandi fweti vanda mwana ya nani?” Bo nde: “Ya Davidi.” Ebuna Yezu kuyulaka bo dyaka nde: “Nki mutindu Mpeve ya Nzambi songaka Davidi na kubinga [yandi] ‘Mfumu’?” Ebuna yandi tangaka mambu yina kele na Nkunga 110:1. Bafarize kukangaka munoko. Kansi, bantu yina vandaka kulanda disolo na bo vandaka kuwidikila Yezu na kyese yonso.​—Mat. 22:41-46.

Na kisalu ya bilanga, nge lenda sadila bangyufula ya kuyantikila disolo mutindu yai: “Nge ti mono konso muntu kele ti zina na yandi. Keti Nzambi mpi kele ti zina? Beto lenda zwa mvutu na Nkunga 83:18, NW.” “Keti bantu yonso tavanda na nsi ya luyalu mosi mpamba? Tala mutindu Daniele 2:44 kepesa mvutu na ngyufula yai.” “Keti Biblia ketubilaka mpenza mambu ya ke na kusalama na ntangu na beto? Fwanisa mambu yina bo ketuba na 2 Timoteo 3:1-5 ti mambu yina ke na kusalama na kisika ya nge kezingaka.” “Keti kilumbu kele mpasi ti lufwa tamana? Biblia kepesa mvutu ya beto lenda tanga na Kusonga 21:4, 5.”

Ntangu nge kesala diskure, kana nge sadila mbote bangyufula na ntwala ya kutanga baverse ya Biblia, yo lenda pusa bawi na nge na kukinga nde bo talonguka mambu ya mpa na baverse ya bo ketangaka dezia mbala na mbala. Kansi keti bo tasala yo? Bo lenda sala yo kana bangyufula ya nge keyula ketubila mpenza mambu yina metala bo to ve. Ata disolo yango kesepidisa bawi, bangindu na bo lenda yantika kutambula ntangu nge ketanga baverse yina bo mewaka mbala mingi. Sambu dyambu yai kusalama ve, nge fwete yindula mingi na ngyufula ya nge keyula sambu malongi na nge kusimba mpenza ntima na bo.

Basisa Dikambu Mosi. Nge lenda basisa dikambu mosi mpi na nima kubenda dikebi ya bawi na verse mosi ya kemonisa mutindu ya kuyidika dikambu yango. Kunata ve bawi na nge na kukinga nde nge tasonga bo mambu mingi kuluta yina nge tatuba. Mbala mingi verse mosi kepesaka kaka kitini ya mutindu ya kuyidika dikambu yango. Kansi, nge lenda lomba bawi na kutala, na ntangu nge ketanga verse yango, inki ndongisila yo kepesa bo sambu na kuyidika dikambu yina.

Mutindu mosi mpi, nge lenda pesa munsiku mosi ya bikalulu ya kewakana na luzolo ya Nzambi mpi na nima nge sadila disolo mosi ya kele na Biblia sambu na kusonga nde yo kele mayele na kuzitisa munsiku yango. Kana verse mosi kele ti bangindu zole (to mbala yankaka mingi) ya kewakana ti mambu ya bo ketubila na disolo, mitubi yankaka keyulaka bawi na kumeka kusosa bangindu yango. Kana dikambu mosi kemonana nde yo kele mpasi mingi sambu na kimvuka mosi ya bawi, nge lenda nata bo na kuyindula kana nge monisa bo mitindu mingi ya kuswaswana ya kuyidika yo mpi na nima bika verse mpi ntendula na yo kupesa mvutu.

Monisa nde Biblia Kele na Kiyeka Mingi. Kana nge metedimisa dezia mpusa ya bawi na disolo na nge mpi nge mepesa dezia dibanza mosi to mingi ya dyambu mosi ya kele na kati ya disolo yango, na ntwala ya kutanga verse mosi nge lenda tuba kaka bangogo yai: “Tala mambu yina Ndinga ya Nzambi ketuba na dyambu yai.” Kutuba mutindu yai kepesaka mambu ya nge tatanga kilo.

Yehowa kusadilaka bantu bonso Yoane, Luka, Polo, mpi Piere sambu na kusonika mikanda ya Biblia. Kansi bo vandaka bansoniki mpamba. Yehowa muntu kele Munkwa na yo. Mingimingi kana nge kesolula na bantu yina kele ve balongoki ya Masonuku ya Santu, kutuba bangogo bonso “Piere kusonikaka” to “Polo kutubaka” na ntwala ya kutanga verse mosi lenda vanda ve na ngolo ya mutindu mosi ti bangogo ya luyantiku ya kemonisa nde verse yina kele ndinga ya Nzambi. Yo kele mbote na kuzaba nde na bisika yankaka, Yehowa kusongaka Yeremia na kuyantika kutuba mambu ya yandi songaka yandi na bangogo yai: “Beno wa mambu ya [Yehowa metuba, NW].” (Yer. 7:2; 17:20; 19:3; 22:2) Ata beto sadila zina ya Yehowa na ntwala ya kutanga baverse to ve, na ntwala ya kusukisa disolo na beto, beto fwete sala ngolo na kutuba nde mambu yina kele na Biblia kele ndinga na yandi.

Tadila Mambu Yina Bo Ketubila. Nge fwete tadila mambu yina bo ketubila ntangu nge kesosa ntendula ya kupesa na ntwala ya kutanga verse mosi. Na bisika yankaka nge tatuba mbala mosi mambu yango, kansi, kuvila ve nde yo lenda nata bawi na kubakisa mambu ya nge ketuba mutindu yankaka. Mu mbandu, keti nge lenda tuba mambu yina Yobi, muntu yina vandaka kutina Nzambi boma, kutubaka mutindu mosi ti mambu yina mosi na kati ya banduku na yandi ya luvunu kutubaka? Luka muntu kusonikaka mukanda ya Bisalu ya Bantumwa, kansi yandi ketanga bantu yankaka ya kusonikaka mpi mambu yankaka ya kele na mukanda yai, bonso Yakobo, Piere, Polo, Filipi, Etiene, ti bawanzyo, yika mpi Gamaliele ti Bayuda yankaka yina kuvandaka ve Bakristu. Nge tatuba nde bangogo yina nge ketanga kele ya nani? Mu mbandu, kuvila ve nde Davidi ve muntu kusonikaka mukanda ya bankunga yonso mpi nde Salomo ve muntu kusonikaka mambu yonso yina kele na mukanda ya Bingana. Yo kele mpi mfunu na kuzaba nani nsoniki ya Biblia vandaka kutubila mpi nki mambu yandi vandaka kutubila.

Sadila Mambu Yina Vandaka Kusalama na Ntangu Yina. Yo kele mpenza mbote mingimingi kana nge lenda monisa nde mambu yina vandaka kusalama na ntangu bo sonikaka mambu yina kele na Biblia mefwanana ti mambu ya nge ketubila. Na bambandu yankaka mambu yina kusalamaka ntama kele mfunu sambu na kubakisa mbote verse mosi. Mu mbandu, kana nge fwete tubila Baebreo 9:12, 24 na diskure mosi ya ketubila nkudulu, ziku na ntwala ya kutanga yo nge lenda mona nde yo ke mfunu na kupesa ntendula mosi ya nkufi ya kemonisa nde suku ya kati ya tempelo yina verse yango ketubila, kele kifwani ya kisika yina Yezu kukotaka ntangu yandi tombukaka na zulu. Kansi kutubila ve mambu yango mingi kana ve yo tavidisa bangindu ya mfunu ya verse ya nge kezola kutanga ketuba.

Sambu na kutomisa mutindu nge ketendula mambu na ntwala ya kutanga baverse, tadila mbote mutindu mitubi yina kele na eksperiansi kesalaka. Tala bametode ya kuswaswana ya bo kesadilaka. Tala mutindu yo kesadisaka bo. Ntangu nge keyidika badiskure na nge, sosa kuzaba baverse yina kele mfunu mingi, mpi yindula mingi na mambu yina konso verse talungisa. Yidika mbote mambu ya nge tatendula na ntwala ya kutanga konso verse na mpila nde nge sadila yo na mutindu ya kuluta mbote. Na nima, salaka mutindu mosi sambu na baverse yonso ya nge kesadila. Kana nge metomisa dyambu yai na badevware na nge, yo tadisa nge na kutula dikebi na Ndinga ya Nzambi.